Uisneno nahakeb lais manba'an nok na' Noh
9
Uisneno nfee tetus-athoen neu na' Noh ma in fee ma in anah sin. In na'uab ma nak, “Hi mihoni he miheun pah-pinan ii ntein. 2 Mui' fui sin, kolo ma ika' sin of namtausan ki. Au 'nona' sin 'eu ki. 3 Hi mibei' meuk mui't eun nane sin siisk eun on le' hi mibei' miah ai' meuk hau fua' sin. Au 'fee ale' saa'-saa' eun le' ii neu ki.4 Mes hi kais meuk sisi le' in naa' fe' ka nsai npoi fa, natuin mui't eun sin i'moink eun et nane.
5-6 Au 'moe' mansian utuin Au humak ma Au masak, Au 'mo'ek ma Au 'taok. Es nane te, kais amlool mansian. Kaul anmui' tuaf, ai' mu'it, na'maet mansian, hi lo he mi'mate msa'. Plenat le' ii, neem na'ko Kau. 7 Hi lo mees he mihoni, ma miheun pah-pinan ii ntein.”
8 Uisneno ntaul In a'an nane ma nak, 9 “Tabu ii, Au he uhakeb manba'an 'ok ki tal antia hi sufam ma hi ka'um amsa'. 10 Lais manba'an le' ii anmatoom neu ale' kanan amonit amsa'. Es eun le': mui' aem, mui' fui, ma kolo. Lefi te, apoit eun le' nok ki na'ko bnao nane in nanan. 11 Au lais manba'an nane, on ii: Au ka 'fee 'tein fa oe snama' he naneuk na'maet ale' kanan amonit anbin pah-pinan le' ii.
12-13 Au 'tao Au enus a'bi neno tnanan he nfani 'taka'. Enus nane, of namnauba' Kau neu Au lais manba'an ii le' ka natfeek niit fa neu ki, neu amoint eun ok-oke', ma neu pah-pinan le' ii msa'. 14-17 Kaul anmui' nope nbi neno tnanan, nalalit enus anpoi, in of namnauba' Kau ma nak: oe snama' of ka nale'u ntein fa ale' amoint eun anbin pah-pinan le' ii. Nok lanan nane, Au lais manba'an abal-balat ii, nmafuut piut nok ki, ma nok ale' kanan amonit.”
Na' Noh anmauf tua miin-kase
18 Na' Noh in aanh eun le' anpoin na'kon abnao nane es eun le': na' Sem, na' Yafet, ma na' Ham. (Na' Ham nane, es le' na' Kana'an in amaf). 19 Mansian pah-pinan le' ii ok-oke', amneemk eun na'kon na' Noh in aan teun eun le' ii.
20 Na' Noh nane, atoin atoof lene. In es le' aseen hau anggur ahun-hunut. 21 Neno wes, na' Noh niun tua miin-kase tal antia nmauf ka nahiin yon fa. On nane te in nholo' nain in paken, nalalit in antuup natneen moons aah anbi in uim la'at. 22 Tabu na' Ham antaam ate, in niit in amaf antuup moons aah. On nane te in naen anpoi, ma nnao ma n'etun in tataf, na' Sem ma na' Yafet. 23 Nalalit in taatf eun nua sin naitin mau' ma nauf mau' nane anbi sin beenk enu. Nalalit sin nnaon ntet-kotin antaman neun uim la'at nane, ma na'been mau' nane neu sin amaf. Sin ka niit fa sin amaf a'maen. Nalalit sin npoin.
24 Tabu na' Noh in mafu nsanu wen, in nahiin in aan mone 'heut susu in i'mo'en. 25 Nalalit in na'uab ma nak, “Hoe! Kana'an amaf! Au 'kaas ko! Ho of amfain ate meu ho tata' sin!
26 Pules ma liatas neu UISNENO, natuin na' Sem!
Mes na' Kana'an anlail na' Sem in ana' lenu'.
27 Maut he Uisneno anfeons am anheinua ntein na' Yafet in pah.
Ma in sufan in ka'un anmonin anbin mamut ma tainine nok na' Sem in sufan ma in ka'un.
Mes maut he na' Kana'an anlail na' Yafet in ana lenu'.”