Nain anmulai nmeot
8
Mes Uisneno ka nnikan fa na' Noh ma ale' mui't eun anbin abnao nane. On nane te In anpaek anin he nfuu nasanut oe nane. 2 In an'eek nain oe maat eun, ma nasnasab ulan. 3 On nane te oe nane ansaun piut. Neno nautn es am bo' niim (150) namsopu te, oe nane in i'latan ansanu kle'o. 4 Na'euk nok fuun hitu' antaam neno bo'es am hitu te, bnao nane natuu'b on anbi tubu mnanu es, kanan Ararat. 5 Oe nane ansaun piut. Tabu nane fuun bo' antaam neno mese', 'tubu sin i'puupk eun mamniit eun een. 6 Anfiin na'ko neno bo' haa' te, na' Noh nasoitan abnao nane in eon ana'. 7 Nalalit in nafetin kool kaa' es. Kolo nane natpeen neu-mneem tal antia oe nane ansaun namneo-namneo. Ma in ka nfain fa on abnao nane. 8 On nane te na' Noh nafetin antein kool otos he nliun ma nahiin niit kal-kaul ai' oe nane nmeit nalali yen. 9 Mes oe nane fe' naneuk pah-pinan, etun kolo nane ka napein fa bale he ntook. On nane te in nfain on abnao. Na' Noh annona' in i'niman, ma nasnaat nataam kolo nane anfain neu bnao.
10 Na' Noh anpao ntein neno hiut. On nane te in nafetin antein kool otos nane. 11 Manas anmabe te, kool otos nane anfain neem. In nteo neik saitun noo es. Nalalit na' Noh nahiin nak oe nane ansaun namneo wen. 12 In npao ntein neno hiut. In nafetin antein kool otos nane. Mes neno le' nane, kool otos nane ka nfain nemaf.
13 Fuun mese' antaam neno mese', tabu na' Noh anmoin naan toon natun nee mmese' (601), oe nane anmeit nalali yen. Na' Noh nasoitan antein eon ana'. In napene te, nain anmeot nalail yen. 14 Anbi fuun nua' antaam neno bo' nua mhiut, nain nane anmeto nfini yen.
15 Nalalit Uisneno nleun na' Noh ma nak, 16 “Noh! Tabu ii, hi msaun nai' mi'ko bnao nane. 17 Misanut mui't eun nane ok-oke'! Es le': mui' aem, mui' fui, anonok, ma kolo. Maut he sin naka'un, he naheun pah-pinan.”
18-19 Nalalit na' Noh, in fee, in aanh eun, ma in naenf eun, ansanun oke' na'kon abnao nane. Mui't eun nane ansanun amsa', es-es ate natuin in nonot.
Na' Noh anfee fua'-tulu' he nseun banin Uisneno In manekan
20 Nalalit na' Noh anbakin fatu he nmoe' mei tulu' neu UISNENO. Na'ko mui't eun le' nabei' he npaek sin anlalin fua'-tulu', na' Noh anheek mes-mese'. Nalalit in nlool sin ma nout sin anbin mei tulu', he nlali 'taka' nak in nasaeb seun-banit neu UISNENO. 21 Tabu UISNENO naskiu niit fua'-tuul' eun nane sin foo boonk eun, In nmaliin. On nane te In natenab ma nak,
“Anmulai tabu le' ii, Au ka 'kaas a'tein fa pah-pinan natuin mansian eun sin 'moe' amle'ut. Maski sin nateenb ahaa lais amle'ut na'kon aan'-ana', mes Au of ka ule'u 'tein fa ale' kanan amonit, on le' Au fe' uleu' ulali ye nane. 22 Anbi tabu pah-pinan ii fe' anbin, tabu sin nanaob ok piut, natuin ahaa sin liisk eun. Es eun le': tabu senat ma sekit, tabu manikin ma maputu', tabu fauk-nais ma oe-faat, fai ma manas.”