Oe snama'
7
Nalalit UISNENO na'uab neu na' Noh ma nak, “Au 'kiso 'bi mee-mee, mes aal ho mmees-mees es neek amneo'. On nane te ho mok ho fee ma ho anah sin amtaam nai' meu bnao nane. 2-3 Na'ko ale' kanan mu'it le' sin siisk eun nabei' he hi meuk sin, ma le' nabei' he hi mitulu' sin meu Kau, ho mutaam pasan hit-hiut meu bnao nane. Na'ko ale' kanan kolo ho mutaam pasan hit-hitu msa'. Mes mu'it bian antein ho ala mutaam pasan mes-mese' aah. Nok lanan nane, mui't eun nane, anlalin on le' fini neu sin sufan sin, he sin anmonin amsa'.4 Mumnau mulek-leko'! Ala neno hitu te, Au of usanut ulan le' ka nasnaas niit fa, tal antia neno bo' haa' ma fai bo' haa'. Au 'paek lanan nane, he u'maet 'ain ale' amoint eun anbin nai meto', le' Au 'mo'e 'lail sin.”
5 Nalalit na' Noh anmoe' natuin on le' UISNENO In iplenat nane oke'. 6 Tabu oe snama' nane nsae te, na' Noh anmoin naan toon natun nee yen (600). 7 Nalalit na' Noh nok in fee, in aanh eun, ma in naenf eun, ntaman neun abnao nane, he sin nsoi naan ok. 8-9 Na' Noh natuin UISNENO In iplenat nane, on nane te in nataam ale' kanan kolo ma mu'it, es-es ate nok nain in bian, na'ko mu'it le' mansian nabei' neuk sin neesk enu, ma na'ko mu'it le' ka nabei' fa neuk sin siisk enu. 10 Neno hiut namsopu te, noe oe snama' nane neem ma nmulai naneuk pah-pinan ii no tem-teme.
11 Tabu na' Noh anmoin naan toon natun nee (600) mfunan nua' mneno bo'es am hitu te, oe snama' nmulai ntaam. Tabu nane on le' neno tnanan antalfei, es na' oe nat'oop aah. Ma ale' oe maat eun anpe'en lafu'-lafu' ma npulan napoitn eun oe. 12 On nane te ulan nane ansaun ka nasnaas niit fa, fai-manas, tal antia neno bo' haa'.
13 Mes neno nane, na' Noh, in fee, in aanh eun teun sin, es le': na' Sem, na' Yafet, ma na' Ham, ma in naenf eun antaman oke' neun abnao nane. 14 Sin ntaam nabuan nok mui' aem eun, mui' fui sin, mui' anoonk eun, kolon, ma mu'it bian le' manine' amsa'. 15-16 Pasan mese'-mese' na'ko ale' amoint eun, antaam nabuan nok na' Noh anbin abnao, namnees nok saa' le' Uisneno naplenat.
Tabu sin antaman nlalin oke' te, UISNENO neikn On an'eek ma anletu' bnao nane in enon.
17-19 Uul a'naek nane nsaun piut, tal antia neno bo' haa'. On nane te oe snama' ansae piut tal antia bnao nane natboe. Oe ansae piut tal naneku 'tubu mnaun eun oke'. 20 Oe nane nsae piut, tal in imnanun metel hiut anneis na'ko tubu le amnaun le'uf.