Mansian aa maufinun
6
Tabu nane, mansian namfau wen. Ma sin anmonin ansiksaan ok anbin ale' bale. Sin nahonin li'aan feto msa'. 2 Uisneno In aan monena niit li' feot munif mansian eun ate, lo maas leuf eun. On nane te sin es-es ate nnao ma anmafee li' feto mee le' in lomi. 3 Nalalit UISNENO nak, “Au 'hae 'maet een nok mansian sin monit amle'ut. Au Smanak le' namonib sin nane, ka nloim fa he sin anmonin piut.b Sin lo mees he nmaten. On nane te sin anmoni ntu'an toon nautn es am bo' nua yaah (120).”4 Na'ko batan nane, tal antia batan-batan amunit, atoni 'naes anmonin anbin pah-pinan.c Tabu nane, Uisneno In aan mone sin anmafee mansian eun sin aan feot muinf eun, ma nahonin sin atoin ma'tane', es le' solalu' nakaf makenat, le' mateka' anbin nu'un ahunut.
5 Tabu nane, UISNENO nkiso te mansian anbin pah-pinan anmo'en amle'ut a'teeb-teeb. Sin neek eun ala haa nateenb eun lais amle'ut piut. 6 On nane te UISNENO antoof on, natuin In nmo'e nlail sin, ma natokob sin anbin pah-pinan le' ii. Lasi nane lo nasuseb niis Uisneno. 7 Etun In na'uab ma nak, “On nane te, Au of uleu' mansian le' Au 'moe' ulail sin anbin pah-pinan le' ii. Au of u'maet ale' kanan kolo ma mu'it bian amsa'. Au 'toof ok natuin Au 'mo'e 'lail sin.” 8 Mes ala haa na' Noh, es le' anhaliin UISNENO In nekan.
Na' Noh in nu'un
9-10 Na' Noh in nu'un on ii: in anmui' aan mone teun, es eun le': na' Sem, na' Yafet, ma na' Ham. Na' Noh anmoin nok neek amneot neu Uisneno, ma ka nmoe' fa 'moe' amle'ut. Tabu nane, aal in es le' atoin leko. In anmoni nhaumaakb on nok Uisneno.
11-12 Mes Uisneno nkiso te ale' kanan mansian anmoe' amle'ut ok-oke. Anbi mee-mee yah mansian namle'u nmaet. Uisneno nkiso te mansian anbin pah-pinan nane, anmoe'n ahaa lais amle'ut. 13 Nalalit Uisneno nakua' a'an neu na' Noh ma nak, “Au 'iit a'lail mansian in 'moe' amle'ut anbi bale mee-mee. On nane te Au ufeek ulail 'ak, Au lo he uleu' 'ain pah-pinan ii nok in nesan ok-oke'. 14 Es nane te, on ii, Noh! Tabu ii ho mmoe' maan abnao oe naek es ampaek hau amepat. Ho mmoe' ke'an-ke'an anbi bnao nane in nanan. Nalalit ho mlaep kotin ma nanan meik ter. 15 Ho mmo'e bnao nane in imnanun metel nautn es am bo' tenu mteun (133); in manuan panan-panan metel bo' nua mnua' (22); ma in imnanun neki nsae' metel bo'es am teun (13). 16 Amtefi bnao nane, ma mu'lupi mpaek hau 'been pisa'. Mes amfaleiba' tefis nane on le' metel asteen es na'ko lupit in fafon. Ho mbati bnao nane ktuta' teun. Nalalit ammoe' eno wes anbi in ibnapan.
17 Mumnau mulek-leko'! Au of usanut uul sako' he naneuk ale' amonit anbin pah-pinan, tal antia ka tiit taan fa saa' es. 18 Mes Au he 'moe' lais manba'an 'ok ko. Ho of amtaam meu bnao nane mok ho fee, ho anah, ma ho naenf enu.
19-20 Na'ko ale' kanan mu'it pah-pinan ii, ho lo mees he meik mutaam pasan-pasan meu bnao nane in nanan, maut he sin anmonin amsa' on le' ho. Sin es le': mui' aem, kolo, anonok, maut he sin anmonin. 21 Ho lo mees he mutaam amnahat huma'-huma' meu bnao nane in nanan neu ki ma neu mui't eun nane msa'.”
22 Nalalit na' Noh anmoe' natuin Uisneno In a'an ma plenat nane oke'.