1-2 Tabu Uisneno nmoe' mansian, In anmoe' sin natuin In human ma In masan, In i'mo'en ma In i'taon. In anmoe' sin atoni ma bifee. Nalalit In nteek sin nak “mansian”, ma In nfeen sin tetus nathoe msa'.

3 Tabu na' Adam in nmoin naan toon nautn es am bo' teun (130), in napein li'aan mone yes. Li'ana ii in nausn aah in amaf. On nane te in nakanab li'ana nane, na' Set. 4 Nalalit na' Adam fe' anmoni ntein toon natun faun (800). In napeni ntein li'aan mone ma li'aan feto. 5 In anmaet tabu in anmoin naan toon natun sio mbo' teun (930).

6 Tabu na' Set anmoin naan toon nautn es am niim (105), in napein li'aan mone yes, es le' na' Enos. 7 Nalalit na' Set fe' anmoni ntein toon natun fanu mhiut (807), ma in napeni ntein li'aan mone ma li'aan feto. 8 In anmaet tabu in anmoin naan toon natun sio mbo' es am nua' (912).

9 Tabu na' Enos anmoin naan toon bo' sio (90), in napein li'aan mone yes, es le' na' Kenan. 10 Nalalit na' Enos fe' anmoni ntein toon natun fanu mbo'es am niim (815), ma in napeni ntein li'aan mone ma li'aan feto. 11 In anmaet tabu in anmoin naan toon natun sio mniim (905).

12 Tabu na' Kenan anmoin naan toon bo' hiut (70), in napein li'aan mone yes, es le' na' Mahalalel. 13 Nalalit na' Kenan fe' anmoni ntein toon natun fanu mbo' haa' (840), ma in napeni ntein li'aan mone ma li'aan feto. 14 In anmaet tabu in anmoin naan toon natun sio mbo'es (910).

15 Tabu na' Mahalalel anmoin naan toon bo' nee mniim (65), in napein li'aan mone yes, es le' na' Yaret. 16 Nalalit na' Mahalalel fe' anmoni ntein toon natun fanu mbo' teun (830), ma in napeni ntein li'aan mone ma li'aan feto. 17 In anmaet tabu in anmoin naan toon natun fanu mbo' sio mniim (895).

18 Tabu na' Yaret anmoin naan toon nautn es am bo' nee mnua' (162), in napein li'aan mone yes, es le' na' Henok. 19 Nalalit na' Yaret fe' anmoni ntein toon natun faun (800), ma in napeni ntein li'aan mone ma li'aan feto. 20 In anmaet tabu in anmoin naan toon natun sio mbo' nee mnua' (962).

21 Tabu na' Henok anmoin naan toon bo' nee mniim (65), in napein li'aan mone yes, es le' na' Metusalak. 22 Nalalit na' Henok in nmoni nmafuut neek nok Uisneno tal antia toon natun tenu ntein (300). Ma in napeni ntein li'aan mone ma li'aan feto. 23-24 In anmoin ma anneek mees nok Uisneno. Tabu in anmoin naan toon natun tenu mbo' nee mniim (365), in ka mamnita' fa, natuin Uisneno nait nasaeba'.

25 Tabu na' Metusalak in anmoin naan toon nautn es am bo' fanu mhiut (187), in napein li'aan mone yes, es le' na' Lamek. 26 Nalalit na' Metusalak fe' anmoni ntein toon natun hitu mbo' fanu mnua' (782), ma in napeni ntein li'aan mone ma li'aan feto. 27 In anmaet tabu in anmoin naan toon natun sio mbo' nee msio' (969).

28 Tabu na' Lamek anmoin naan toon nautn es am bo' fanu mnua' (182), in napein li'aan mone yes. 29 Na' Lamek nakanab li'ana nane na' Noh (le' in hanan, on le' uab es, le' in otan, ‘nfee halinat ma haan noet’), natuin in nak, “Li'ana ii of anfee halinat ma haan noet neu hit neek suset anbi afu le' napein kasat na'ko Uisneno.” 30 Nalalit na' Lamek fe' anmoni ntein toon natun niim am bo' sio mniim (595), ma in napeni ntein li'aan mone ma li'aan feto. 31 In anmaet tabu in anmoin naan toon natun hitu mbo' hitu mhiut (777).