Tabu sin nua sin na'naen ate, na' Habel atuuk mu'it, ma na' Kain ameup lene. 3 Tabu wes ate, na' Kain neik in lene sin neesk eun bian, ma na'tulu' sin neun UISNENO. 4 Na' Habel neik in i'bib-kaes einf enu sin aan unu' amsa'. In anlolo 'bib-kasen nane, nalalit in natnaat neik sisi 'tuul alekot neu Uisneno. Ankius niit on nane te, UISNENO nmalinan na' Habel in fua-'tuul' eun nane. 5 Mes In ka nloim fa na' Kain in fua-'tuul' eun nane. On nane te na' Kain natoo' anmaet, tal antia in huum putu' teeb-teeb.

6 On nane te UISNENO na'uab nok na' Kain ma nak, “Hoe, Kain! Nasaa' am es ho mutoo' on nane? On mee m'es ho mhuum mpuut on nane? 7 Bait ho mmoe' leko te, Au 'sium ko nok leko. Mes mumnau, woo! Kaul ho mmoe' amle'ut ate, 'mo'et nane of naah nafani' ko, on le' meo annuu' he nheke 'nafo. On nane te kaul ho mutenab he mmoe' amle'ut ate, leko nneis ho mpolin main tenab nane!”

8 Neno wes, na' Kain nakeo na' Habel ma nak, “Habel! Oum he nua kit atnao teu lene.”^a Tabu sin antian ate, nok askeken na' Kain anbius na'maet in olif.

9 Nalalit UISNENO nataan na' Kain ma nak, “Hoe, Kain! Ho oli' et mee?”

Na' Kain nataah ma nak, “Au ka uhinef! Au es ka 'naa' fa in haen ma in i'niman!”

10 On nane te Uisneno nakua' a'an ma nak, “Nasaa' am es ho mmoe' lais maufinu on nane? Ho kais mutenab mak ho oli' in naa' anmeit nalail anbi nain a'pinan. Au 'iit ulail saa' le' ho mmo'e neu ho oli'! 11 Tabu ii, naa' ansaena' ko. Tabu ho mlool miis ho oli', nain anmuis in naa'. Es nane te, nain ka nfee ntein ko fa in nesan he ho mmoin. 12 Kaul ho mmoe' lene, nain of ka nfee ko fa nesa' saa'-saa'. Anmulai tabu ii, ho of amfain a'onit le' ampaisuun om bute-bute mbi pah-pinan ii.”

13 Mes na' Kain na'uab neik haan ma'fena' neu UISNENO ma nak, “Hae, Usi'! Nasaa' am es Ho mfee maan kau kasat ma'tan-tane' nane? Au ka 'sutai ube'i ye fa, ahoit! 14 Natuin Ho mli'u mlail kau u'ko bale ii, au of u'loo Ko, ahoit. Au of u'oin a'bi mee-mee on le' anao-amnemat. Nalalit sekaum-sekau le' na'euk nok kau te, of anlool niis kau, ahoit.”

15 Mes UISNENO nataah ye ma nak, “Ka on fa nane! Sekau es anlool ko, Au 'huukn ee ma'fena' nneis hae hiut!” Nalalit UISNENO ntao 'taka' neu na' Kain, henati' tuaf sekaum-sekau le' na'euk nokan ate, nahinen nak sin ka nabei' fa he nlool nisan. 16 Nalalit na' Kain annao nasaitan bale nane, na'loo na'ko UISNENO. In nnao ntia bale yes, anbi etu Eden antoom neon-saet. Bale nane in kanan Not, le' in otan nak ‘npaisuun’. In natua nbi nane.

17 Nalalit na' Kain anmafee. In fee ye na'aup. In nahoin li'aan mone yes, ma sin nakanab, na' Henok. Ma na' Kain nafena' kuan es. Nalalit in nakanab, Henok, on le' in aanh ee kanan. 18 Na' Henok in aanh ee, es le' na' Irat. Na' Irat in aanh ee, es le' na' Mehuyael. Na' Mehuyael in aanh ee, es le' na' Metusael. Ma na' Metusael in aanh ee, es le' na' Lamek.

19 Na' Lamek anmafee bifee nua'. Es kanan bi Ada; es antein in kanan bi Sila. 20 Eina' Ada nahoin na' Yabal. In sufan ma in ka'un anlalin atuuk mu'it. Sin i'moink eun na'oon-oin naah, he namin huun neu sin mui't enu. Sin na'umen anbin uim la'at. 21 Na' Yabal in oilf ee, na' Yubal. Na' Yubal in sufan ma in ka'un anlalin atoin alekut, afuu feku, ma a'lekut huma' bian antein.

22 Na' Lamek in fee bi Sila nahoin na' Tubal Kain. In sufan ma in ka'un anlalin atuut besi. Sin nmo'en blua huma'-huma' na'ko besi ma noin molo'. Na' Tubal Kain in feotf ee, bi Na'ama.

23 Neno wes, na' Lamek anpuils on anbi in fee sin nua sin. In nak, “Hi mneen lek-leko! Fe' le' ii li' moen muinf es antuuf kau, mes au 'tuuf u'mate. 24 Tuaf le' anlool niis na' Kain, napein hukun hae hiut. Mes kaul anmui' tuaf le' he nbalas in neek tenab amle'ut neu kau, sin of napenin hukun hae bo' hitu mhiut (77).”

25 Na' Adam in fee bi Hawa nahoin naan li'aan mone yes antein. Sin nakanab, na' Set (le' in otan nak, ‘anfee’) natuin eina' Hawa nak, “Uisneno nfee li'ana ii neu kau he nseka na' Habel, le' na' Kain anlool niis ne nane.” 26 Loo-loo te, na' Set anmafee. In napein li'aan mone yes, ma in nakanab, na' Enos.

Tabu nane, mansian nmulai na'luli' ma na'besan neun UISNENO.