Yohanis nobun lale'an no raiklaran foun
21
Hotu, ha'u ktitu-karee lale'an foun no raiklaran foun, tan lale'an tuan no raiklaran tuan lakon mohu ti'an. Tasi moos la iha ti'an.a 2 Ha'u moos karee Na'i Maromak Niakaan kota tuun nosi lale'an. Kota nia, kota moon mak sia temi na'ak Yerusalem Foun. Kota nia tetuk no nesan ti'an, hanesan sasudin feto mak nadi'a aan ti'an atu simu sasudin mane.b 3 Ha'u moos rona kola lia maliak maka'as ida mai nosi habesi aan fatin iha nia na'ak,“Mana di'a-di'ak!
Nahuu baa oras ne'e, Na'i Maromak hutun-renun bele tama-sai Niakaan Tofatik.
Nahuu baa loron ne'e, Na'i Maromak eman sia moris namutuk no Nia.
Nia dadi baa siakaan Maromak.
Sia moos dadi baa Niakaan hutun-renun.
Nia atu moris no sia nohuun.
Nia atu nein no sia nohuun.c
4 Nia atu no'as namara siakaan luun,
hotu sia la tanis ona.
Iha kota nia, moras la iha ona.
Iha kota nia, mate moos la iha ona.
Tan hotu-hotu mak nasusar ema hori uluk, la iha ona.
Tan hotu-hotu mak naloot ema hori uluk, lakon mohu ona.”d
5 Hotu, Nia mak nabesi aan iha nia dale na'ak, “Mana lai! Ha'u kalo hotu-hotu foun.” Hotu, Nia dale no ha'u tenik na'ak, “Makerek mola lia ne'e ona! Ema bele fiar Ha'ukaan Manfatin ne'e, tan Manfatin ne'e tebes no loos!”
6 Hotu, Nia katak tenik baa ha'u na'ak,
“Hotu-hotu mak Ha'u kameno hori uluk aan, dadi ti'an.
Ha'u ne'e,
Alfa to'o Omega.
Ha'u ne'e,
Ulun to'o Ikun.
Hotu-hotu huun nosi Ha'u,
nosi huun to'o rohan.
Ema hotu-hotu mak nanroo tan nakara moris,
Ha'u karoo sia baa wee matan mak foo moris nima-nimak.
Wee nia, Ha'u kfoo loos dei.e
7 Ema hotu-hotu mak tuir Na'i Maromak dalan nohuun,
sia atu simu nola
matak-malirin nia.
Tan Ha'u atu kdadi baa siakaan Maromak,
sia moos atu dadi baa Ha'ukaan oan.f
8 Mais, ema seluk sia atu kona soe
baa tasi ha'i fatuk lobot mak laka la nakotu.
Sia mak, ema ta'uk teen,
ema mak se'i kotuk baa Yesus,
ema lisan aat,
ema mahalo lia kfo'er,
ema maho'o ema,
ema mak lo'u-sudur baa ai'oi lulik,
ema mak nakneko ema,
no ema tolek teen.
Sia hotu-hotu atu kona kastikar soe baa tasi ha'i nia.
Kastikar nia na'ak ‘Mate Dala Rua.’”
Yohanis nobun kota Yerusalem foun
9 Hotu, ha'u ktitu-karee makbukar na'in ida nosi makbukar lale'an na'in hitu mak uluk kaer hanek mahisi Na'i Maromak hahibun. Makbukar nia mai nasoru ha'u nodi dale na'ak, “Mai ne'e lai! Ha'u atu katudu baa o sasudin feto mak atu nala'e Bibi Malae Oan.”
10 Baa oras nia moos, ha'u kona Maromak Kmalar Lulik. Makbukar lale'an nia foti nodi ha'u baa foho ida mak aas tebes. Iha nia, nia natudu baa ha'u kota Yerusalem mak tuun mai nosi lale'an. Kota nia, Na'i Maromak Niakaan kota lulik.g 11 Kota nia, kabaas kaliuk. Noo sinak mak tubu sai nosi Na'i Maromak ahar boot, to'o naroma kota nia tomak. Sinak nia, hanesan fatuk mahoo matan molen. 12 Noo lutu fatuk aas boot mak satan nola kota nia, no odamatan nanokar sanulu resin rua. Noo makbukar lale'an na'in sanulu resin rua mak daka odamatan nia sia. Iha odamatan ida-idak leten, noo hakerek naran nosi ema Isra'el siakaan uma huun sanulu resin rua.h 13 Odamatan nanokar tolu se'i oin baa lorosa'e. Tolu se'i oin baa loromonu. Tolu baa lorokaras, no tolu tenik baa lorokbelan.i 14 Lutu fatuk nia nariik baa tatuur fatuk boot sanulu resin rua. Iha fatuk ida-idak noo hakerek naran nosi Bibi Malae Oan klosan na'in sanulu resin rua mak serwisu bodik Nia iha raiklaran.
15 Nunia hotu, makbukar lale'an mak dale no ha'u, kaer nola kno'a sasukat mean ida, atu sukat kota no odamatan nanokar no lutu fatuk nia.j 16 Nia sukat uluk kota nia lutu fatuk lidun haat. Niakaan naruk no belar no aas, hotu-hotu manesak. Ne'e mak, kilo rihun rua atus rua, rua nulu.k 17 Hotu, nia sukat lutu nia ma'ar, kona ro'a neen nulu resin lima, tuir ema raiklaran sasukat.l 18 Lutu nia, halo hosi fatuk mahoo matan. Hotu-hotu mak iha kota nia laran moos, halo hosi mean isin mak molen hanesan lalenok.
19 Tatuur fatuk sanulu resin rua nia moos, halo hosi fatuk mahoo matan oi-oik. Fatuk nia sia folin todan. Fatuk nomer ida, fatuk lakan ilas matak, naran fatuk yaspis. Nomer rua, fatuk lakan ilas flahuk, naran fatuk nilam. Nomer tolu, fatuk lakan mean, naran fatuk mirah. Nomer haat, fatuk lakan ilas matak, naran fatuk zamrud. 20 Nomer lima, fatuk mak ilas mean no mutin mak kraan malu, naran fatuk unam. Nomer neen, fatuk mak lakan ilas mean, naran fatuk sardius. Nomer hitu, fatuk mak lakan ilas modok mean, naran fatuk ratna cempaka. Nomer walu, fatuk mak lakan ilas flahuk matak, naran fatuk beril. Nomer siwi, fatuk mak lakan modok, naran fatuk krisolit. Nomer sanulu, fatuk mak lakan matak nurak, naran fatuk krisopras. Nomer sanulu resin ida, fatuk mak lakan flahuk tasi ween, naran fatuk lazuardi. Nomer sanulu resin rua, fatuk mak lakan mean asuaten, naran fatuk kecubung. 21 Nunia moos, odamatan nanokar sanulu resin rua nia, halo hosi morteen lolon sanulu resin rua. Odamatan ida halo hosi morteen lolon ida. Kota nia dalan sia moos, halo hosi mean isin mak naksinak hanesan lalenok.m
22 Mais ha'u karee, iha kota nia la noo Uma Hamulak, tan ema lo'u kedan ti'an baa Na'i Maromak mak beran kaliuk no Bibi Malae Oan. 23 Loro no fulan moos la naroma iha nia, tan Na'i Maromak ahar mak naroma kota nia. Bibi Malae Oan ahar moos naroma.n 24 Ema nosi klubun hotu-hotu iha raiklaran la'o iha kroman nia laran. Na'i raiklaran sia moos nodi siakaan sasoin kabaas baa kota nia.o 25 Iha nia, kalan la iha ona. Tan baa nia, sia la taka kota odamatan nanokar. 26 Kabaas hotu-hotu no kneter hotu-hotu nosi rai hotu-hotu iha raiklaran noo hotu iha kota nia.p 27 Mak la bele tama iha nia, a'aat hotu-hotu. Nu'u ema mak lo'u-sudur baa ai'oi lulik, ema mahalo lia kfo'er, no ema tolek teen. Mak bele tama, ema mak naran noo iha Bibi Male Oan hakerek dei. Tan hakerek nia noo ema naran mak bele moris nima-nimak no Na'i Maromak.q