Sia kesi diabu ulun nodi besi talik to'o tinan rihun ida
20
Nunia hotu, ha'u ktitu-karee makbukar lale'an ida tuun mai nosi lale'an. Nia kaer besi talik boot ida, nodi kaer sabi odamatan kuak mak la noo nidin. 2 Hotu, nia kohi nola samea inan nia mak sia temi na'ak, “Diabu Ulun”. Hori uluk, nia mak be'ur nola ema raiklaran. Makbukar lale'an nia kesi nola nia nodi besi talik atu neti natoos iha kuak nia to'o tinan rihun ida.a 3 Nia dudu natama samea inan nia baa kuak laran. Hotu, taka mate kuak nia nodi neti natoos samea nia iha nia, to'o tinan rihun ida laran. Hodi nunia, samea nia la bele be'ur ema raiklaran to'o tinan rihun ida. Nunia hotu, foin habusik nia, mais la oras dei.4 Hotu, ha'u ktitu-karee kadera ukun wa'in lear no ema mak tuur iha nia. Na'i Maromak foti ema nia sia, nalo baa makotu lia. Uluk, sia ne'e, mak baa keke Yesus Manfatin Di'ak no Maromak Manfatin, to'o ema no'o sia. Sia la lo'u baa buat krakat aat nia no niakaan ai'oik. Sia moos la simu niakaan marak baa siakaan baboton no liman. Sia kona ho'o, mais Na'i Maromak nalo sia moris nikar, nebee sia kaer ukun namutuk no Kristus to'o tinan rihun ida.b 5-6 Hodi nunia, sia dadi baa ema dala uluk mak Na'i Maromak nalo moris nikar nosi mate. Sia sotir tebes, tan sia dadi baa Na'i Maromak eman ti'an. Sia la kona soe baa fatin susar, mak ema noran mate dala rua iha nia. Mais sia dadi hanesan na'ilulik mak naliku Na'i Maromak no Kristus. Sia moos kaer ukun namutuk no Kristus to'o tinan rihun ida.
Mais, ema seluk mak mate ti'an sia, musti nein to'o tinan rihun ida lai, foin Na'i Maromak nalo sia moris nikar.
Sia soe diabu ulun baa tasi ha'i
7 Tinan rihun ida nia siku, Na'i Maromak atu naruka habusik samea inan nia nosi kuak. 8 Hotu, samea inan nia atu baa be'ur ema klubun sia mak naran Gog no Magog. Sia mai nosi nabee dei iha raiklaran. Sia ema lear, hanesan raihenek iha tasi tehen. Samea inan nia libur sia atu baa natuda.c 9 Hodi nunia, sondadu Gog no Magog nariik naktuik atu la'o lema raiklaran lidun sia. Sia mai satan nola Na'i Maromak niakaan kota no niakaan ema sia mak Nia nadomi. Mais, Na'i Maromak atu natuun ha'i nosi lale'an, sunu mohu sondadu nia sia. 10 Hotu, kohi nola samea inan mak be'ur nola ema lear nia, fi'it soe baa tasi ha'i lobot mak laka la nakotu. Nia atu kona sena iha nebaa namutuk no buat krakat aat nia no niakaan mako'an tolek teen nia. Loron-kalan sia netan susar iha nia to'o nima-nimak.
Na'i Maromak tetu ema hotu-hotu hahalok
11 Nunia hotu, ha'u ktitu-karee habesi aan fatin mutin boot ida. Na'i Maromak nabesi aan baa. Sarebak, raiklaran no lale'an nalai karin, to'o lakon mohu la bele haree tenik. 12-13 Hotu, ha'u ktitu-karee ema mak mate ti'an sia, ki'ik-boot hotu-hotu nariik se'i oin baa habesi aan fatin nia. Ema mak mate iha rai maran, iha tasi, no ema seluk nosi matebian fatin nariik se'i oin baa habesi aan fatin nia. Hotu, Na'i Maromak naruka loke hakerek ida atu leno siakaan hahalok hotu-hotu. Hotu, Na'i Maromak nakotu siakaan lia ida-idak, tuir siakaan hahalok iha hakerek nia. Hotu, Na'i Maromak naruka loke tenik hakerek ida seluk, nodi leno ema naran mak atu moris no Nia to'o nima-nimak.d 14-15 Ema mak naran la noo iha hakerek nia, kona kastikar soe baa tasi ha'i laran. Nunia hotu, la noo mate ona. Matebian fatin moos la noo ona, tan ema hotu-hotu mak naran la noo iha Na'i Maromak hakerek nia, kona soe baa tasi ha'i laran ti'an. Kastikar iha tasi ha'i laran nia, ne'e na'ak, Mate Dala Rua.