Klibur boot nananu iha lale'an
19
Makbukar lale'an nia dale notu nunia, ha'u moos rona kola lia maliak boot, hanesan klibur boot no'i nananu iha lale'an. Sia nananu na'ak,“Aleluya! Aleluya!
Ami tonu amikaan Maromak, tan Nia mak boot kaliuk.
Aleluya! Aleluya!
Na'i Maromak mak sori ami
nosi amikaan salan.
Na'i Maromak mak nahulin ami
nosi amikaan a'aat.
2 Ami tonu amikaan Maromak,
tan Nia mak nakotu lia nodi moon.
Ami tonu amikaan Maromak,
tan Nia taa ukun nalo makonak.
Na'i Maromak taa ukun baa feto dalan aat nia,
tan nia seten ema iha raiklaran,
atu tuir niakaan a'aat.
Na'i Maromak selu nikar baa feto aat nia,
tan nia no'o hei-hein
Na'i Maromak Niakaan ema sia.”a
3 Hotu, sia nananu tenik kananuk ida seluk na'ak,
“Aleluya! Tonu-haboot Na'i Maromak!
Aleluya! Foti-hahaas Niakaan naran!
Tan dubun nosi ha'i mak namotu feto nia maten,
sa'e bei-beik la nanawa.
Tan dubun nosi ha'i mak sunu kota boot nia,
sa'e bei-beik la nakotu.”b
4 Nunia hotu, katuas na'in rua nulu resin haat no buat horis kasalak matan haat nia, nakni'a lo'u-sudur se'i oin baa Na'i Maromak habesi aan fatin. Sia nakneter Nia nodi dale na'ak,
“Tebes! Mai ita tonu-haboot Na'i Maromak!
Aleluya! Mai ita foti-hahaas Niakaan naran!”
Dahur bodik Bibi Malae Oan no sasudin iha lale'an
5 Hotu, ha'u krona kola lia maliak ida tenik mai nosi habesi aan fatin nia na'ak,
“Hei, Maromak ain-liman hotu-hotu!
Hei, Maromak eman hotu-hotu!
Mai foti-hahaas Niakaan naran.
Ki'ik-boot, matas-lawarik, mai tonu Nia.”c
6 Hotu, ha'u krona kola hanesan ema lear dale baa malu. Siakaan lian, maliak boot hanesan wee tatolik, no maka'as hanesan kokur. Sia dale na'ak,
“Aleluya! Ami tonu-haboot Na'i Maromak.
Aleluya! Ami foti-hahaas Niakaan naran.
Nia mak beran kaliuk.
Nia mak ukun hotu-hotu.d
7 Oras ne'e, itakaan neon di'ak ti'an.
Oras ne'e, itakaan neon boot ti'an.
Ita tonu-haboot Nia.
Tan dahur bodik Bibi Malae Oan to'o ti'an.
Ita foti-hahaas Niakaan naran.
Tan Bibi Malae Oan sasudin feto nadi'a aan ti'an.
8 Na'i Maromak natais tais mamar baa sasudin nia.
Na'i Maromak natais tais mutin molen baa sasudin nia.”
(Tais mutin molen mak Na'i Maromak natais sasudin feto nia, ne'e mak, Niakaan ema siakaan hahalok di'ak.)
9 Hotu, makbukar lale'an nia moos katak baa ha'u na'ak, “Yohanis! O musti makerek nune'e:
‘Na'i Maromak atu nalo dahur bodik Bibi Malae Oan no Niakaan sasudin. Ema hotu-hotu mak kona hamata, sotir tebes!’”
Hotu, makbukar nia dale natutan tenik na'ak, “Na'i Maromak Manfatin ne'e, tebes no loos!”e
10 Ha'u moos kakni'a atu klo'u-sudur baa makbukar lale'an nia. Mais nia de'an ha'u na'ak, “O keta malo nunia! Tan ha'u moos Maromak atan hanesan o mo okaan mamaluk sia mak keke lema Yesus hanorin. Yesus hanorin nia, manesak no hanorin mak uluk Maromak foo baa Niakaan mako'an sia. Tan baa nia, keta lo'u-sudur baa ha'u. Lo'u-sudur baa Na'i Maromak dei!”
Na'i Yesus mai sa'e kuda mutik
11 Hotu, ha'u kfoti oin, ha'u ktitu-karee lale'an nakloke. Sarebak, karee kuda mutik matan ida nariik iha nia. Noo ema ida sa'e kuda nia. Ema nia naran, “Ema Mak Kaer Metin Mamenon” no “Ema Mak Tebes no Loos”. Ema nia, oras nakotu lia, nia nakotu nalo loos. Oras baa natuda, nia baa nodi neon moon.f 12 Matan laka nu'u ha'i. Tau sabeo na'in lear iha ulun. Naran hakerek iha isin, mais nia na'in du'uk mak natene naran nia isin.g 13 Niakaan tais, loban baa raa ti'an. Ema temi Nia na'ak, “Maromak Manfatin”. 14 Hotu, ha'u karee sondadu lale'an sia sa'e kuda mutik atu tuir Nia. Sondadu sia hotu-hotu moos tau tais mamar mutin molen. 15 Surik ro'at ida naklosu sai nosi ema nia ibun. Nia nodi surik nia, baa natuda sakar ema klubun hotu-hotu iha raiklaran, to'o natoba nola sia. Hotu nia atu ukun sia nodi meik no ro'at, to'o sia moos noran hahibun nosi Na'i Maromak mak beran kaliuk. Na'i Maromak hahibun nia, hatetek baa lia ema sama hei-hein anggor fuan atu nasai ween.h
16 Iha Ema nia tais no kelen, noo hakerek nune'e:
Na'in baa na'i hotu-hotu,
Ulun baa ulun hotu-hotu.
Yesus natoba nola buat krakat aat no niakaan maktuir sia
17 Hotu, ha'u ktitu-karee makbukar lale'an ida nariik iha loro matan leten. Nia bolu kawaa hotu-hotu mak semo iha lale'an na'ak, “Mai libur malu hotu-hotu iha ne'e ona! Mai haa Na'i Maromak dahur boot! 18 Mai haa ema maten na'an! Haa na'in no meo ulun na'an. Haa sondadu na'an. Haa kuda no maksa'e kuda na'an. Haa ema ki'ik-boot na'an. Haa ata no ulun na'an. Badak dei, mai haa ema maten hotu-hotu na'an.”i
19 Hotu, ha'u ktitu-karee buat krakat aat mak uluk sai nosi tasi nia. Buat nia kabuar lia no na'i hotu-hotu iha raiklaran. Hotu, sia no siakaan sondadu sia baa natuda sakar ema maksa'e kuda mutik nia, no niakaan sondadu lale'an sia. 20 Mais, ema maksa'e kuda mutik nia, kohi nola buat nia no niakaan mako'an tolek teen nia. Uluk, mako'an nia nalo tadak blaar oi-oik nodi tolek ema, nebee simu niakaan marak no lo'u baa niakaan ai'oik. Mais, oras ne'e, ema maksa'e kuda mutik nia, le'ak lerek buat krakat aat nia no niakaan mako'an baa ha'i tasi fatuk lobot mak laka la nakotu.j 21 Hotu, ema maksa'e kuda mutik nia, no'o sondadu seluk sia nodi surik mak naklosu sai nosi ibun. Hotu, kawaa sia mai naa mohu maten nia sia hotu-hotu.