Lia kota Babel nakro'on
18
Nunia hotu, ha'u ktitu-karee makbukar lale'an ida seluk tuun mai. Nia kaer beran maka'as, to'o naksinak nodi naroma raiklaran tomak. 2 Nia katak nodi lian maliak boot na'ak,“Nakro'on ti'an! Nakro'on ti'an! Kota Babel nakro'on ti'an!
Nakloti ti'an! Nakloti ti'an! Kota Boot nia nakloti ti'an!
Oras ne'e, kota nia dadi diabu moris fatin.
Oras ne'e, kota nia dadi kukun aat moris fatin.
Oras ne'e, kota nia dadi kawaa fatin.
Oras ne'e, kota nia dadi asu fuik fatin.a
3 Nia nakro'on ti'an, tan ema nosi klubun hotu-hotu iha raiklaran,
mai hei-hein nemu tua to'o lanu iha nia.
Nia nakloti ti'an, tan ema nosi hunun hotu-hotu iha raiklaran,
mai hei-hein nalo lia kfo'er iha nia.
Na'i nosi rai hotu-hotu,
mai nakur biti-kluni iha nia.
Ema maksauk nosi fatin hotu-hotu
mai naksauk to'o soi iha nia.
Kota nia, nu'u feto dalan aat mak beer loos sosa naha kabaas dei.
Kota nia, nu'u feto dalan aat mak buka loos midar dei.”b
4 Nunia hotu, ha'u krona kola lia maliak ida seluk tenik nosi lale'an na'ak,
“Hei! Ha'ukaan ema sia!
Halai sai hosi kota nia ona!
La'o hela kota nia ona!
Keta halo tuir ema kota nia siakaan a'aat,
nebee keta kona siakaan kastikar.c
5 Tan siakaan a'aat
wa'in basuk ti'an.
Siakaan salan moos
butuk tetek malu to'o kalo'an ti'an.
Oras ne'e, Na'i Maromak la nalu'a
siakaan dalan moris aat nia.
Oras ne'e, Na'i Maromak nadi'a aan ti'an,
atu natuun kastikar baa sia.d
6 Musti selu nikar siakaan a'aat,
manesak no a'aat mak sia nalo baa ema seluk.
Mais musti selu baa sia
dala rua.
Uluk, sia seten ema nemu nosi siakaan hemu fatik halo hosi mean.
Hemu fatik nia nakonu tua mak nahoris dinu.
Oras ne'e sia musti nemu du'uk tua nia,
mais musti nemu dala rua.e
7 Sia naboot aan.
Sia nahaas aan.
Sia beer loos moris kabaas dei.
Sia nakara loos midar dei.
Tan lia nia, sia musti moris susar.
Sia musti neon susar.
Uluk, sia dale loko aan nu'u feto dalan aat na'ak,
‘Ha'u ne'e, Ina Na'i!
Ha'u la kdadi feto faluk kois!
Ha'u la ktanis karo'an aan kois.
Ha'u la ktau hene metan kois.’
8 Sia dale nunia to'o Na'i Maromak nahibu ti'an.
Oras ne'e Na'i Maromak atu kastikar sia ona.
Iha loron ida laran dei,
sia atu noran salaen tebes,
sia atu tanis naro'an aan tebes.
Sia mate dodok,
to'o ema foti soe sia baa ha'i,
to'o ema tunu siakaan maten.
Na'i Maromak beran kaliuk, mak natuun kastikar ne'e.
Na'i Maromak boot kaliuk, mak nakotu lia ne'e.f
9 Uluk, na'i sia mai hei-hein
nalo lia kfo'er iha kota nia,
nodi moris furak iha nia.
Mais oras ne'e sia atu nobun ha'i dubun sai,
foin sia natene na'ak kota nia namotu karin ti'an.
Hotu, sia tanis naro'an aan tan kota nia.
10 Sia nata'uk naree ema kota nia siakaan susar.
Mais sia nariik loos nosi dook dei.
Sia nobun loos nosi nebaa dei.
Hotu, sia dale na'ak,
‘Adeei! Babel mak hadomi!
Adeei! Kota mak hadomi!
Tuku ida laran dei, o kona kastikar ti'an.
Laku matan dei, o kona dinu ti'an.’g
11 Rona nola nunia, ema fatin hotu-hotu mak uluk mai naksauk iha kota nia,
sia moos tuir tanis naro'an aan,
tan la noo ema ida kois iha kota nia,
mak atu sosa tenik siakaan naha ona.h
12 La noo ema ida mak atu sosa tenik
siakaan fafutar nosi mean no mutin,
nosi fatuk mahoo matan no morteen.
La noo ema ida mak atu sosa tenik
siakaan tais mamar,
no tais kabaas seluk sia.
La noo ema ida mak atu sosa tenik
siakaan naha nosi ai morin, dikur ba'at,
no ai ba'at seluk sia.
La noo ema ida mak atu sosa tenik
siakaan naha nosi besi, besi riti, no fatuk marmar.
13 La noo ema ida mak atu sosa tenik
siakaan hae na'an, lisa, no babudun seluk sia.
La noo ema ida mak atu sosa tenik
siakaan ai ween morin no mina morin oi-oik.
La noo ema ida mak atu sosa tenik
siakaan tua, mina saitun,
tubi rahun, no hare gandum.
La noo ema ida mak atu sosa tenik
siakaan karau, bibi malae, no kuda.
La noo ema ida mak atu sosa tenik
siakaan karobak naha,
no siakaan ata.i
14 Ema maksauk sia atu sadi'a na'ak,
‘Adeei, Babel!
Adeei, kota boot!
Naha kabaas sia mak okaan ema sia beer kaliuk,
la noo ti'an.
Hotu-hotu lakon ona.
Ema sia mukit karin ti'an to'o taka karas baa rai.’
15 Uluk, ema maksauk sia soi, tan feto dalan aat nia.
Mais oras ne'e, siakaan neon moras la mo-mohu.
Sia nata'uk,
naree ema kota nia siakaan susar.
Sia kiki,
naree ema kota nia siakaan kastikar.
Mais sia nobun loos nosi dook dei.
Sia nariik loos nosi nebaa dei.
16 Hotu, sia dale na'ak,
‘Adeei! Kota Babel susar!
Adeei! Kota boot susar!j
Uluk, okaan ema natais tais mamar
nosi tais folin todan kaliuk.
Uluk, sia tau fafutar nosi mean, morteen,
no fatuk mak folin todan kaliuk.
17 Mais tuku ida laran dei,
naha sia mohu ti'an.
Laku matan dei,
sasoin sia lakon ti'an!’
Uluk, roo ulun sia no makserwisu sia
baa-mai bele-bele nosi kota nia.
Mais oras ne'e, sia nobun loos nosi dook dei.
Mais oras ne'e, sia titu loos nosi nebaa dei.k
18 Sia nobun dubun sai nosi ha'i.
Hotu, sia natene nola na'ak kota nia namotuk mohu ti'an.
Sia moos dale na'ak,
‘Adeei, susar! La noo kota seluk
mak atu boot nu'u Babel tenik.
Adeei, susar! La noo kota seluk
mak atu kabaas manesak no nia tenik.’l
19 Hotu, sia ra'ut ahukresan tau baa ulun,
tan sia neon susar.
Sia tanis naro'an aan,
tan sia neon dodok.
Hotu, sia dale na'ak,
‘Adeei! Kota Babel susar!
Adeei! Kota boot susar!
Ami baa-mai hodi naha baa o,
to'o ami moos soi.
Ami hatiu hodi okaan naha,
to'o ami moos moris furak.
Mais tuku ida laran dei,
hotu-hotu lakon mohu.
Mais, laku matan dei,
hotu-hotu dodok mohu.’m
20 Hotu, ha'u krona kola lia maliak boot ida dale nune'e:
‘Hei, emi mak moris iha lale'an!
Emi lalika neon ki'ik tenik ona.
Hei, emi mak dadi Na'i Maromak eman sia,
emi lalika neon susar tenik ona.
Emi, mak dadi Na'i Maromak klosan sia,
neon boot baa ona.
Emi, mak dadi Maromak mako'an sia,
neon di'ak baa ona.
Uluk, ema Babel nasusar emi.
Uluk, ema kota nia naloot emi.
Mais oras ne'e, Na'i Maromak selu emikaan susar nia ti'an.
Oras ne'e, Nia selu nikar kota nia niakaan a'aat ti'an.’”n
21 Dale hotu nunia, ha'u karee tenik makbukar lale'an biit ida. Nia mai kaer nola fatuk ida, boot nu'u ema. Hotu le'ak natama baa tasi. Nia moos katak na'ak,
“Na'i Maromak atu le'ak lerek kota Babel nunia.
Na'i Maromak atu nalakon kota boot nia nunia.o
22 La noo ema ida kois,
mak nananu nadahur tenik iha kota nia.
La noo ema ida kois,
mak rona tenik bareka,
no kfui lian iha kota nia.
La noo ema ida kois,
mak loke tenik uma fa'an naha iha kota nia.
La noo ema ida kois,
mak ledu tenik hare iha kota nia.p
23 La noo ema ida kois,
mak sunu tenik badut iha kota nia.
La noo ema ida kois,
mak nalo tenik dahur hola malu iha kota nia.
Uluk, ema maksauk nosi Babel nia,
soi ti'an.
Uluk, ema makfa'an nosi kota nia,
moris furak ti'an.
Mais sia tau matenek kukun,
nodi be'ur ema nosi klubun hotu-hotu iha raiklaran.
Sia tau matenek hakneko,
nodi tolek ema nosi hunun hotu-hotu iha raiklaran.q
24 Babel netan kastikar todan nia,
tan no'o hei-hein Maromak mako'an sia.
Kota boot nia dodok ti'an,
tan naloot hei-hein Na'i Maromak eman sia.
Na'i Maromak eman sia moos kona ho'o iha fatin seluk sia.
Mais, Babel mak musti natiu sala nia sia hotu-hotu.
Kota boot nia mak musti nataa nola hotu-hotu.”r