3 Hotu, ha'u kona Maromak Kmalar Lulik. Makbukar lale'an nia foti nodi ha'u baa fatin fuik ida. Iha nia, ha'u ktitu-karee feto ida sa'e buat meak ida. Buat nia noo ulun hitu, dikur sanulu. Iha isin tomak noo hakerek lia fuan mak tolak nahaat Na'i Maromak.^c 4 Feto nia natais tais mamar mak ilas mean asuaten. Fafutar sia nosi mean, fatuk matan folin todan, no morteen. Liman kwana kaer hemu fatik halo hosi mean. Hemu fatik nia nakonu tua. Tua nia, hatetek baa feto nia niakaan sala kfo'er no hahalok aat hotu-hotu.^d 5 Iha baboton hakerek naran ida. Naran nia isin sei subar. Mais hakerek nia na'ak nune'e:

6 Hotu, ha'u ktitu-karee feto nia lanu todan ti'an, tan nemu nola Na'i Maromak eman raan. Nia no'o Na'i Maromak eman sia, tan sia la nanawa dale lia Yesus.

Karee kola nunia, ha'u moos kakaka beik.

7 Mais makbukar lale'an nia nusu ha'u na'ak, “Tan saa o makaka beik nunia? Mai ona, nebee ha'u katak baa o lia hatetek isin nosi feto aat nia. Nunia moos lia hatetek isin nosi buat meak ulun hitu no dikur sanulu mak feto aat sa'e nia. 8 Uluk, buat meak nia moris iha raiklaran, mais oras ne'e la iha ti'an. La kleur, nia mosu nikar nosi kuak susar mak la noo nidin nia. Baa oras nia, noo ema mak moris iha raiklaran, mak naran la iha Bibi Malae Oan Hakerek. Hakerek nia, Na'i Maromak nakerek uluk ti'an, hori sei la nase'i raiklaran dauk. Baa oras ema titu-naree buat meak nia mai nikar, sia atu nakaka beik. Mais nosi ikus, Na'i Maromak atu soe lakon nia baa tasi ha'i mak laka bei-beik.”^e

9 Hotu, makbukar lale'an nia dale natutan na'ak, “Ema mak matenek, bele natene lia hatetek ne'e isin. Buat meak ulun hitu nia, lia isin na'ak, foho hitu. Feto dalan aat nia tuur iha foho nia sia leten. Ulun hitu nia moos, lia isin na'ak, na'i hitu. 10 Nosi na'i hitu nia, lima mate ti'an. Oras ne'e, ida sei kaer ukun. Ida tenik, sei la kaer ukun dauk. Kalo niakaan oras mai ti'an, nia moos atu kaer ukun, mais la kleur falik. 11 Ha'u kalore moos lia isin nosi buat meak mak uluk moris iha raiklaran, mais oras ne'e la iha ti'an. Uluk, nia moos tama na'i hitu nia. Nia atu fila mai, dadi tenik baa na'i nomer walu. Mais nia moos atu simu kastikar mak la nakotu.

12 Dikur sanulu nia, lia isin na'ak, na'i sanulu. Sia sei la kaer ukun dauk. Sia atu simu beran nodi kaer ukun namutuk no buat meak nia, mais la oras dei.^{f g} 13 Sia hotu-hotu ko'a namutuk lia fuan atu latan siakaan beran baa buat meak nia. 14 Na'i nia sia atu baa natuda sakar Bibi Malae Oan. Mais Bibi Malae Oan no Niakaan ema sia atu natoba nola sia hotu-hotu. Ema mak tuir Bibi Malae Oan, sia mak Nia boi nola no bolu nola atu tuir Nia nohuun. Sia atu natoba nola funu, tan Bibi Malae Oan maka'as kaliuk. Nia mesan dei mak dadi Na'in baa na'i hotu-hotu, no Ulun baa ulun hotu-hotu.

15 Wee wa'in mak kre'is feto dalan aat nia, ne'e mak ema nosi klubun hotu-hotu, ema nosi hunun hotu-hotu, no ema mak dale nodi lia hotu-hotu nosi rai hotu-hotu. 16 Na'i sanulu no buat meak nia hirus feto oin ma'ar moe lalek nia. Sia atu nadau nola niakaan tais no naha sia tomak, hotu nabusik nela nia nakwalan iha nia. Hotu, sia moos naa niakaan isin. Hotu, sia soe lerek isin resin baa ha'i laran. 17 Na'i Maromak du'uk mak nase'i nebee na'i sanulu nia kabuar lia fuan atu latan beran baa buat meak nia, nebee buat nia nadodok feto nia. Hodi nunia, Na'i Maromak lia kakotun hotu-hotu atu dadi.”

18 Dale notu nunia, makbukar lale'an nia dale tu'an tenik na'ak, “Feto dalan aat mak o maree nia, ne'e mak kota boot mak ukun baa na'i hotu-hotu iha raiklaran.”