Buat krakat aat ida sai nosi tasi
13
Nunia hotu, ha'u ktitu-karee buat krakat aat ida sai nosi tasi. Nia noo ulun hitu, dikur sanulu. Nia ta'u sabeo na'in baa dikur ida-idak. Ulun sia noo hakerek mak nahaat Na'i Maromak.a 2 Isin, hanesan busa fuik boot. Ain, hanesan asu fuik ain. Nunun, hanesan busa fuik boot nunun. Samea inan latan beran baa buat krakat aat nia, atu tuur baa kadera ukun nodi nala'ok niakaan ukun hotu-hotu.b 3 Iha buat nia ulun ida, noo kanek fitar boot, ahan kona taa to'o kre'is mate, mais la mate falik. Naree buat nia, ema hotu-hotu iha raiklaran blaar. Hotu, sia moos tuir nia. 4 Sia nakneter nodi foti-nahaas samea inan nia, hanesan Maromak, tan nia latan beran baa buat nia ti'an. Sia moos tonu-naboot buat nia na'ak, “Nia, maka'as basuk! La noo ida mak bele natoba nola nia!”5 Tuir loos, Na'i Maromak nabusik buat krakat aat nia dale naksa'ek aan nodi nahaat Maromak naran. Buat nia netan leet atu kaer ukun, to'o fulan haat nulu resin rua laran. 6 Nia dale nahaat Na'i Maromak no Na'i Maromak eman sia hotu-hotu iha lale'an.c 7 Na'i Maromak moos nabusik buat krakat aat nia atu natuda sakar Niakaan ema sia, to'o natoba nola sia. Hodi nunia, buat nia netan beran atu ukun baa ema nosi klubun hotu-hotu, ema nosi hunun hotu-hotu, no ema mak dale nodi lia hotu-hotu nosi rai hotu-hotu.d 8 Tan baa nia, ema hotu-hotu iha raiklaran sudur baa buat krakat aat nia. Ne'e mak, ema hotu-hotu mak naran la iha Bibi Malae Oan Hakerek. Uluk, ema no'o Bibi Malae Oan nia, mais Na'i Maromak nalo moris nikar. Baa oras Na'i Maromak la nase'i raiklaran dauk, Nia nakerek kedan ema makfiar hotu-hotu naran iha hakerek nia na'ak, sia mak atu moris no Nia to'o nima-nimak.e
9 “Hanono di'a-di'ak!
10 Kalo Na'i Maromak nakotu ti'an na'ak, ema ida musti kona kohi,
ema nia nanis kona kohi.
Kalo Na'i Maromak nakotu ti'an na'ak, ema ida kona ho'o hodi surik,
ema nia nanis kona ho'o hodi surik.”
Tan baa nia, Na'i Maromak eman sia musti naterus aan iha susar laran, hodi fiar bei-beik baa Nia.f
Buat krakat aat nomer rua sai nosi rai
11 Nunia hotu, ha'u ktitu-karee buat krakat aat ida tenik. Nia sai mai nosi rai. Nia noo dikur rua, hanesan bibi malae dikur. Lian, hanesan samea inan lian. 12 Nia dadi mako'an baa buat krakat aat nomer ida mak kona taa kre'is mate nia. Hotu, niakaan ulun naruka nia nebee seten ema hotu-hotu iha raiklaran, atu sudur baa ulun nia. 13 Buat krakat aat nomer rua nia nalo tadak blaar maka'as sia, to'o bele natuun ha'i nosi lale'an iha ema lear oin. 14 Hodi nunia, nia nodi ulun beran tolek nola ema iha raiklaran. Nia moos naruka ema atu nalo ai'oik ida, hanesan niakaan ulun oin, nebee sia nakneter ulun mak uluk kona taa kre'is mate nia. 15 Na'i Maromak nabusik buat krakat aat nomer rua nia, atu foo nawan baa ai'oik nia, nalo moris. Hodi nunia, ai'oik nia bele dale. Hotu ai'oik nia naruka ho'o kedan ema hotu-hotu mak la no'uk sudur baa nia.
16 Buat krakat aat nia moos seten ema hotu-hotu atu netan marak baa liman kwana, lale netan baa baboton. Ema ki'ik-boot, soi-mukit, na'in-ata, hotu-hotu musti netan marak nia. 17 Kalo lale, sia la bele fa'an sa-saa, la bele sosa sa-saa. Marak nia no hakerek buat krakat aat nomer ida naran no niakaan nomer.
18 Ema musti tetu di'a-di'ak lia ne'e. Nomer nia, “666” (atus neen neen nulu resin neen). Nomer nia, kona baa ema raiklaran ida naran. See mak matenek, katak kokon nomer ne'e na'ak saa.g