Samea inan natuda sakar feto no oan
12
Nunia hotu, sarebak ha'u ktitu-karee tadak kasalak ida mosu iha lale'an. Ema raiklaran sei la dala ida dauk naree tadak oin nunia. Ha'u karee feto ida, loro nakalus nola. Nia rai ain baa fulan. Nia tau sabeo mahoo fitun matan sanulu resin rua. 2 Nia moos ko'us. Nia no'i tanis, tan moras atu nahoris.3 Sarebak, ha'u ktitu-karee tenik tadak kasalak seluk. Samea inan mean boot ida mosu iha lale'an. Nia ulun hitu, dikur sanulu. Nia tau sabeo na'in baa ulun hitu nia sia.a 4 Nodi ikun saar namoos fitun nia sia, to'o nalakon fa'ek ida nosi fa'ek tolu iha lale'an. Hotu, samea inan nia le'ak fitun nia sia baa raiklaran. Hotu, nia baa nariik se'i oin baa feto nia, atu nein to'o nahoris, tan atu folan nola kedas oan nia.b 5 Hotu, feto nia nahoris nola oan mane ida. Mais Maromak Niakaan makbukar lale'an ida mai nadau nola, nodi baa Na'i Maromak, nebee oan nia kaer ukun namutuk no Nia iha lale'an. Oan nia atu ukun ema klubun hotu-hotu iha raiklaran nodi beran mak boot kaliuk.c 6 Hotu, feto nia moos nalai baa fatin mamuk ida mak Na'i Maromak nadi'a ti'an bodik nia. Hotu, naliku nia iha nia to'o tinan tolu no balun (ne'e na'ak, loron rihun ida atus rua neen nulu).
Mikael natuda sakar samea inan iha lale'an
7 Hotu, hatuda boot moris iha lale'an. Noo Maromak Niakaan makbukar lale'an siakaan meo ulun ida, naran Mikael. Mikael no maktuir sia natuda sakar samea inan nia no niakaan maktuir sia.d 8 To'o ikus, Mikael sia natoba nola samea inan nia no niakaan maktuir sia. Mikael sia nakahik, nebee keta nein iha lale'an tenik. 9 Hotu, te'ur sai sia nosi lale'an, soe lakon baa raiklaran. Hanono! Samea inan nia, mak diabu ulun. Hori uluk aan, nia mak tolek nola ema raiklaran monu baa sala.e
10 Nunia hotu, ha'u krona tenik lia maliak maka'as ida nosi lale'an na'ak,
“Uluk, samea inan nia nariik iha Na'i Maromak oin,
nodi tula sala bei-beik baa itakaan mamaluk makfiar sia.
Oras ne'e, nia kona soe sai nosi lale'an ti'an.
Oras ne'e, Na'i Maromak oras to'o ti'an, atu sori ema raiklaran.
Oras ne'e, Na'i Maromak kaer ukun ti'an nodi beran boot.
Nia moos foti Kristus ti'an,
Ema nia mak Nia boi kedan atu dadi Na'in bodik ema klubun hotu-hotu.f
11 Itakaan mamaluk sia natoba nola samea inan nia mak uluk tula sala baa sia,
tan Bibi Malae Oan raan nakduar ti'an, bodik kasu siakaan salan.
Sia moos natoba nola nia,
tan sia naberan aan keke lema Na'i Maromak Manfatin.
Masik ema krakat atu no'o sia moos,
sia la nata'uk.
12 Tan lia nia, emi hotu-hotu iha lale'an musti neon di'ak!
Mais emi hotu-hotu iha raiklaran musti neon susar, tan dinu atu kona emi.
Diabu ulun tuun mai baa emi ti'an.
Nia krakat basuk,
tan nia natene na'ak, niakaan oras nalo aat atu mohu ona!”
Samea inan buka feto nia iha raiklaran
13 Baa oras nia, samea inan nia natene na'ak, nia kona soe baa raiklaran ti'an. Hotu, nia baa buka feto mak nahoris Oan nia, atu nasusar nia. 14 Mais feto nia netan liras rua, hanesan kikit liras, nebee semo baa nakfunin iha fatin fuik mak dook nosi samea nia. Iha nia, ema naliku feto nia, to'o tinan tolu no balun.g 15 Titu-naree nunia, samea krakat, hotu nakbuut sai wee hanesan motasa'e, atu lulun nodi feto nia. 16 Mais raiklaran tulun feto nia. Rai nakloke, nodi folan mohu wee mak sai nosi samea nunun, nebee wee keta to'o feto nia. 17 Hotu, samea krakat basuk baa feto nia. Nia sai atu baa natuda sakar feto niakaan oan seluk sia. Sia ne'e, ema mak tuir Na'i Maromak ukun, nodi keke lema nohuun Na'i Yesus Manfatin Di'ak. 18 Nunia hotu, samea nia baa nariik iha tasi tehen, nodi ruun ne'an.