Maromak mako'an maka'as na'in rua
11
Hotu, sia lolo baa ha'u ai sasukat naruk ida hanesan kno'an. Na'i Maromak moos naruka ha'u na'ak, “Yohanis, madeer ona! Baa sukat Ha'ukaan Uma Hamulak no hadak sera iha kota Yerusalem. O moos sura mola ema hotu-hotu mak namulak iha nia.a 2 Mais, lalika sukat Uma Hamulak lalawar, tan fatin nia fa'e ti'an, foo baa ema klubun seluk mak la natene Ha'u. Sia atu sama nasobos Ha'ukaan kota moon, to'o fulan haat nulu resin rua laran (ne'e mak, loron rihun ida, atus rua neen nulu).b 3 Oras nia moos, Ha'u ksolok Ha'ukaan ema na'in rua, nebee sia dadi Ha'ukaan mako'an iha nia. Sia atu natais hene metan susar, nodi dale Ha'ukaan lia, to'o loron rihun ida, atus rua neen nulu nia siku.”4 Maromak mako'an Sakaria nakerek kedan hori uluk nosi mako'an na'in rua nia. Nia natetek nodi ai saitun huun rua, no badut sasukun rua mak nariik se'i oin baa Maromak mak dadi Na'in baa ema raiklaran hotu-hotu.c 5 Kalo ema beer nase'i dinu baa Maromak mako'an na'in rua ne'e, ha'i atu sai nosi mako'an siakaan ibun, namotu sia hotu-hotu. Hodi nunia, sia nanis mate. 6 Baa oras nia moos, Na'i Maromak latan beran baa mako'an na'in rua nia atu sena udan. Nia moos latan beran atu nalo wee matan dadi raa, no beran atu nodi susar oi-oik baa raiklaran ne'e, tuir siakaan hakara dei.d
7 Siakaan loron serwisu siku ti'an, buat fuik kasalak matan ida atu sai nosi kuak boot mak la noo nidin nia. Nia atu natuda sakar sia, to'o natoba nola, no no'o sia.e 8-9 Hodi nunia, sia mate iha kota boot ida. Uluk ema no'o siakaan Maromak baa ai karuus iha kota nia. Kota nia dadi baa kota aat ti'an, hanesan Sodom no Mesir baa otas uluk. Oras mako'an rua nia mate, ema soe lerek siakaan maten iha dalan tehen. Hotu, ema nosi klubun hotu-hotu, ema nosi hunun hotu-hotu, no ema mak dale nodi lia hotu-hotu nosi rai hotu-hotu mai nobun maten rua nia, to'o loron tolu no balun laran. Sia nakahik ema nakoi maten rua nia,f 10 tan sia beer basuk nobun maten rua nia. Tan uluk, ema rua nia nasusar ema hotu-hotu iha raiklaran. Dadi, ema nadahur bele-bele maten nia sia, nodi foo parsen baa malu.
11 Mais, loron tolu no balun nia siku ti'an, Na'i Maromak foo nikar nawan baa mako'an rua nia, nebee sia moris nikar. Ema hotu-hotu mak naree sia, kiki mate.g 12 Hotu, mako'an rua nia atu rona lia maliak maka'as ida nosi lale'an, naruka sia na'ak, “Hei! Sa'e mai ona!” Sia moos ni'it aan sa'e baa lale'an no kalo'an nakalus nola sia. Naree nunia, siakaan funu sia ibun nakaka loos.h 13 Sarebak, kakekuk boot moris. Uma moos nakro'on. Kalo sura uma hotu-hotu iha kota nia, halo baa fa'ek sanulu, fa'ek ida nakro'on. Ema na'in rihun hitu moos mate. Ema mak la mate, nata'uk tebe-tebes. Hotu, sia foo kneter baa Na'i Maromak, tan Nia mak kaer ukun iha lale'an.i
14 Hodi nunia, dinu nomer rua liu ti'an. Mais sintidu, tan dinu nomer tolu sei iha ikus.
Huu kfui dikur nomer hitu, Na'i Maromak no Yesus Kristus kaer ukun iha raiklaran
15 Nunia hotu, makbukar lale'an nomer hitu nuu niakaan kfui dikur. Sarebak, ha'u krona kola lia maliak wa'in mai bele-bele nosi lale'an na'ak,
“Oras ne'e, itakaan Na'i Maromak
no Kristus mak Nia boi kedan hori uluk,
mak kaer ukun hotu-hotu iha raiklaran.
Nia atu kaer ukun hanesan Na'in, to'o nima-nimak.”j
16 Iha nia moos, fukun na'in rua nulu resin haat mak tuur iha siakaan kadera ukun iha Na'i Maromak oin. Sia moos rona lia maliak nia sia. Hotu, sia nakni'a nodi sudur, hotu tonu-naboot Na'i Maromak 17 na'ak,
“Aaa, Na'i Maromak!
Amikaan Na'i!
Amikaan Maromak!
Ita Boot mak ukun hotu-hotu.
Ita Boot mak kaer beran baa hotu-hotu.
Ita Boot mak moris hori uluk aan.
Ita Boot mak moris baa oras ne'e.
Ami sera dodan baa Ita Boot,
tan Ita hodi beran boot,
kaer ukun iha raiklaran.
18 Ema klubun seluk sia krakat,
tan la no'uk tuir Ita Boot.
Oras ne'e, Ita Boot moos hahibu,
tan sia la no'uk natene Ita Boot.
Oras ne'e, Ita Boot oras to'o ti'an,
atu kastikar sia mak la no'uk titu Ita Boot.
Oras ne'e, Ita Boot oras to'o ti'an,
atu nadodok sia mak nadodok ema seluk.
Oras ne'e, Ita Boot oras to'o ti'an,
atu hakotu lia bodik ema mak mate ti'an.
Oras ne'e, Ita Boot oras to'o ti'an,
atu selu ata kolen.
Ne'e mak, Ita Boot mako'an sia,
no Itakaan ema sia,
ki'ik-boot, matas-lawarik.
Ita Boot atu selu baa ema hotu-hotu,
mak foo kneter baa Ita Boot.”k
19 Tonu-naboot hotu, ha'u ktitu-karee Na'i Maromak Niakaan Uma Hamulak iha lale'an. Odamatan nakloke ti'an. Ha'u moos titu-karee ai balun, mak uluk sia nodi nahulin Na'i Maromak Ukun Sanulu, mak hakerek iha fatuk. Mameran moos taba tutan malu baa-mai. Kokur botu maka'as simu malu. Raiklaran nawae no udan fatuk boot nakfakar nosi lale'an.l