Makbukar lale'an no hakerek lulun ki'ik
10
Hotu, ha'u ktitu-karee Maromak Niakaan makbukar maka'as ida tuun mai nosi lale'an. Kalo'an nakalus nola nia. Baur moos satan nola ulun. Oin naksinak, hanesan loro. Ain moos laka, hanesan ha'i. 2 Nia nariik nodi ain kwana baa tasi, ain karuk baa rai maran. Nia kaer hakerek lulun ki'ik oan ida mak nakloke ti'an. 3 Hotu, nia nahii nodi lian maka'as, hanesan busa fuik boot soo. Nahii notu, kokur nataa natutan dala hitu. 4 Baa oras kokur nataa, ha'u atu kakerek kola siakaan dalen. Mais, ha'u krona kola lia maliak ida nosi lale'an nakahik na'ak, “Hoi! O keta katak kokur hitu nia siakaan dalen baa ema! O moos la bele makerek mola.”5 Hotu, makbukar mak nariik nodi ain ida baa tasi, ida baa rai maran nia, foti niakaan liman kwana baa lale'an, nodi narai aan na'ak, 6 “Ha'ukaan dalen ne'e, tebes nanis! Karai aan kodi Na'i Maromak naran, tan Nia mak moris nima-nimak! Nia mak nase'i lale'an no raiklaran no sasoin hotu-hotu. Tan lia nia, hanono di'a-di'ak! Loron mak ita hein nia, kre'is mai ona. 7 Kalo makbukar nomer hitu nuu ti'an niakaan kfui dikur, Na'i Maromak atu nala'ok Niakaan lia kakotun. Uluk fohon ema sei la natene dauk lia kakotun nia. Mais oras ne'e, Nia katak ti'an lia nia baa Niakaan mako'an sia mak naliku Nia. Dadi, hanono di'a-di'ak, tan Ha'ukaan dalen ne'e, tebes!”a
8 Hotu, lia maliak mak ha'u krona kosi lale'an nia, dale nikar tenik na'ak, “Yohanis! O baa makbukar lale'an mak nariik nodi ain ida baa tasi, ida baa rai maran nia, hotu mola hakerek lulun ki'ik mak nakloke iha liman nia.”
9 Krona kola nunia, ha'u kbaa makbukar nia. Ha'u kusu hakerek nia. Hotu, nia katak baa ha'u na'ak, “Mola baa, maa ona! Atu moran midar iha okaan ibun, hanesan wani ween. Mais, moru iha okaan kabun laran.”
10 Nia dale notu nunia, ha'u ksimu kola hakerek nia kosi liman. Hotu, kaa kola kedas. Iha ha'ukaan ibun, koran midar tebes, hanesan wani ween. Mais oras ha'u ktolan ti'an, koran moru iha kabun laran.b
11 Hotu, sia naruka ha'u na'ak, “O musti fila mikar, katak kedan saa mak Na'i Maromak atu nalo iha raiklaran. Katak lia saa mak atu dadi baa na'in hotu-hotu, baa ema nosi klubun hotu-hotu, baa ema nosi hunun hotu-hotu no baa ema mak dale nodi lia hotu-hotu iha raiklaran.”