Loke hanit nomer hitu, makbukar lale'an sia simu nola kfui dikur hitu
8
Hotu, Bibi Malae Oan nia loke hanit nomer hitu. Sarebak, hotu-hotu iha lale'an no-nook. La noo ida mak nasai lian, to'o kre'is tuku balun ida. 2 Hotu, ha'u ktitu-karee makbukar lale'an na'in hitu mak nariik bei-beik iha Na'i Maromak oin, nadi'a aan naliku Nia. Sia ida-idak simu kfui dikur.3 Hotu, makbukar lale'an ida seluk baa nariik iha hadak ida oin. Hadak nia, halo hosi mean. Sia nodi tunu ai morin raan. Makbukar nia kaer mako mean ida mak ai morin raan fatin. Hotu, sia foo baa nia ai morin raan wa'in lear, nebee kahur no Na'i Maromak eman siakaan hamulak. Hotu, nia nodi mako mean nia hanesan sera nuhar morin, rai baa hadak nia leten, iha habesi aan fatin nia oin.a 4 Hotu, nia tunu ai morin raan nia. Knuhar morin sa'e baa Na'i Maromak oin, namutuk no Na'i Maromak eman siakaan hamulak hotu-hotu.
5 Hotu, makbukar nia nola ha'i nosi hadak nia, tau baa mako mean nia, nalo nakonu. Hotu, fakar mako isin baa raiklaran. Sarebak, ha'u ktitu-karee mameran botu karuk-kwana baa raiklaran. Kokur tarutu maka'as natutan malu, no kakekuk boot.b
6 Hotu, makbukar lale'an na'in hitu nadi'a aan atu nuu siakaan kfui dikur.
Huu kfui dikur nomer ida, alas no hae namotuk
7 Baa oras makbukar nomer ida nuu niakaan kfui dikur, udan fatuk no ha'i kahur raa nakfakar baa raiklaran, to'o alas no hae namotuk mohu. Kalo fa'e raiklaran halo baa fa'ek tolu, mak namotuk nia, fa'ek ida.c
Huu kfui dikur nomer rua, tasi laran isin mate
8 Baa oras makbukar nomer rua nuu niakaan kfui dikur, buat ida hanesan foho boot mak laka, soe aan baa tasi laran. Hotu, tasi dadi raa. Kalo fa'e raiklaran halo baa fa'ek tolu, tasi hotu-hotu mak dadi baa raa nia, fa'ek ida. 9 Hotu, buat horis tasi laran hotu-hotu iha fa'ek nia mate mohu. Roo hotu-hotu mak iha fa'ek nia moos, dodok hotu.
Huu kfui dikur nomer tolu, wee dadi moru
10-11 Baa oras makbukar nomer tolu nuu niakaan kfui dikur, fitun boot ida monu nosi lale'an, hanesan klonus boot ida laka. Fitun nia naran ‘Moru’. Baa oras monu, wee mota no wee matan dadi moru. Hotu, ema mak nemu wee nia, mate wa'in. Kalo fa'e mota no wee matan hotu-hotu iha raiklaran, halo baa fa'ek tolu, mak dadi moru nia, fa'ek ida.d
Huu kfui dikur nomer haat, loro, fulan no fitun nakukun luri
12 Hotu, makbukar nomer haat nuu niakaan kfui dikur. Sarebak, loro, fulan no fitun sia kona ta'e, hotu nakukun. Kalo sura oras loron, halo baa fa'ek tolu, fa'ek ida nakukun, tan loro matan la laka tenik ona. Kalo sura oras kalan, halo baa fa'ek tolu, fa'ek ida nakukun luri, tan fulan no fitun la laka ona.e
13 Hotu, ha'u kfoti oin, ha'u ktitu-karee kikit matan ida semo aas iha kalo'an, nodi nakrake na'ak, “Susar liu! Susar liu! Dinu boot atu monu kona ema mak moris iha raiklaran, tan makbukar na'in tolu seluk atu kre'is nuu siakaan kfui dikur.”