Na'i Maromak tau marak baa Niakaan ema na'in rihun atus ida haat nulu resin haat, nebee sia keta kona dinu
7
Hotu, ha'u ktitu-karee makbukar lale'an na'in haat nariik baa raiklaran lidun haat. Sia saseni anin, nebee anin lalika nuu iha tasi, iha rai maran, no iha alas.a 2 Na'i Maromak latan beran baa sia atu nadodok rai maran no tasi. Hotu, ha'u ktitu-karee makbukar lale'an ida tenik mai nosi lorosa'e. Nia nodi marak nosi Na'i Maromak mak moris nima-nimak. Nia nahii baa makbukar na'in haat nia na'ak, 3 “Hein lai to'o ami tau marak baa Na'i Maromak eman sia baboton, nebee sia keta kona dinu. Hotu ti'an, foin emi bele hahaat rai maran, no tasi, no alas sia.”b4 Hotu, ha'u krona ka'ak, makbukar nia sia marak nola ema na'in rihun atus haat haat nulu resin haat. Sia nia, husar-binan Isra'el, mak ne'e:
5 nosi uma huun Yahuda, ema na'in rihun sanulu resin rua;
nosi uma huun Ruben, ema na'in rihun sanulu resin rua;
nosi uma huun Gad, ema na'in rihun sanulu resin rua;
6 nosi uma huun Aser, ema na'in rihun sanulu resin rua;
nosi uma huun Naftali, ema na'in rihun sanulu resin rua;
nosi uma huun Manase, ema na'in rihun sanulu resin rua;
7 nosi uma huun Simeon, ema na'in rihun sanulu resin rua;
nosi uma huun Lewi, ema na'in rihun sanulu resin rua;
nosi uma huun Isakar, ema na'in rihun sanulu resin rua;
8 nosi uma huun Sebulon, ema na'in rihun sanulu resin rua;
nosi uma huun Yusuf, ema na'in rihun sanulu resin rua;
no nosi uma huun Benyamin, ema na'in rihun sanulu resin rua.
Ema moon sia tonu-naboot Na'i Maromak no Bibi Malae Oan
9 Hotu, sarebak ha'u ktitu-karee ema lear. Sia wa'in basuk, to'o la bele sura hola. Sia mai nosi klubun hotu-hotu, nosi hunun hotu-hotu, no nosi ema mak dale nodi lia hotu-hotu nosi rai hotu-hotu. Sia libur malu se'i oin baa habesi aan fatin nia no Bibi Malae Oan nia. Sia tau faru mutin, no kaer beet tahan. 10 Sia foti tonun bele-bele na'ak,
“Ami tonu-haboot amikaan Maromak
mak nabesi aan iha habesi aan fatin ne'e.
Ami moos foti-hahaas
Bibi Malae Oan ne'e.
Sia ne'e, mak sori ami.
Sia ne'e, mak loke dalan moris bodik ami.”
11 Dale hotu nunia, Maromak Niakaan makbukar lale'an mak nariik satan nola sia, nakni'a nodi sudur se'i oin baa habesi aan fatin nia. Fukun nia sia no buat horis kasalak matan haat nia moos, nalo nunia. Sia hotu-hotu lo'u-sudur baa Na'i Maromak 12 nodi na'ak,
“Tebes! Nunia, tebes!
Ami moos tonu-haboot Na'i Maromak!
Ami moos foti-hahaas Niakaan naran!
Na'i Maromak hanoin, matenek kaliuk.
Na'i Maromak beran, boot kaliuk.
Na'i Maromak maka'as, biit kaliuk.
Ami sera dodan baa Na'i Maromak nohuun.
Ami sera kneter baa Ama Maromak nima-nimak.”
13 Sia tonun hotu nunia, ida nosi fukun nia sia nusu ha'u na'ak, “O matene ema lear mak tau faru mutin ne'e sia ka lale? Sia nosi nabee?”
14 Mais ha'u kataa ka'ak, “Lale, Ama. Ha'u la katene sia.”
Nia moos katak baa ha'u na'ak, “Sia nia, ema mak sasin ti'an nosi dinu boot.
Sia nia, ema mak nodi Bibi Malae Oan raan,
atu fasi siakaan tais,
nodi namutin siakaan faru.c
15 Tan baa nia, sia bele nariik iha Na'i Maromak habesi aan fatin oin.
Loron-kalan sia naliku Nia iha Niakaan Uma Hamulak.
Nia namutuk no sia nohuun.
Nia daka sia bei-beik.
16 Sia la noran salaen ona.
Sia la noran hanroo ona.
Sia la namotuk ona, tan loro manas.
Siakaan isin kulit la nakfolu ona, tan kona manas.d
17 Bibi Malae Oan mak kre'is habesi aan fatin nia,
atu dadi siakaan makbalin.
Nia atu nala'o nodi sia,
baa nemu iha wee matan mak nalo ema moris nohuun.
Na'i Maromak moos atu kasu mohu siakaan susar,
nebee sia la tanis ona.”e