Kananuk iha lale'an
5
Hotu, ha'u ktitu-karee kikar Nia mak nabesi aan iha habesi aan fatin nia. Nia kaer hakerek ida iha liman kwana. Hakerek nia, nakonu oin-kotuk. Hakerek nia moos lulun metin hodi hanit hitu.a2 Hotu ha'u ktitu-karee makbukar lale'an maka'as ida. Nia nusu nodi lian maka'as na'ak, “See mak noo beran atu bele loke nodi leno hakerek nia?” 3 Nusu nunia, mais la netan ema ida moos mak noo beran atu bele loke nodi leno hakerek nia isin. Iha lale'an no raiklaran, la noo ida kedan. Iha matebian fatin moos, la noo kedan. 4 Ha'u ktitu-karee nunia, ha'u moos tanis karo'an aan, tan la noo ema ida kois mak noo beran atu bele loke nodi leno hakerek nia isin. 5 Hotu, na'in ida nosi fukun rua nulu resin haat nia, dale no ha'u na'ak, “Hei, mau! Keta tanis. Mana lai! Noo Na'i Daud husar-binan maka'as ida mak ema temi na'ak, ‘Busa fuik boot nosi husar-binan Yahuda’. Nia nabe'o mohu lia aat hotu-hotu. Nia mak noo beran loke hanit nia sia, nodi leno hakerek nia isin.”b
6 Ha'u krona hotu nunia, karee kola Bibi Malae Oan ida. Nia no'i nariik iha buat horis kasalak matan haat no fukun na'in rua nulu resin haat nia klaran. Bibi Malae Oan nia, nu'u ema no'o ti'an. Nia noo dikur hitu. Matan fuan, hitu. Matan fuan hitu nia, mak Maromak kmalar hitu mak Nia solok ti'an baa raiklaran tomak.c 7 Hotu, ha'u ktitu-karee Bibi Malae Oan nia baa nasoru Nia mak nabesi aan iha habesi aan fatin. Nia nola hakerek lulun nia nosi Niakaan liman kwana.
8 Baa oras nola, buat horis kasalak matan haat nia, no fukun na'in rua nulu resin haat nia, nakni'a nodi lo'u-sudur baa Nia. Sia ida-idak kaer bareka no mako ida halo hosi mean. Mako nia nakonu noo ai morin mak ema tunu nalo baa dubun morin. Dubun morin nia, mak Na'i Maromak eman siakaan hamulak.d 9 Hotu, sia hotu-hotu nananu kananuk foun ida na'ak:
“Bibi Malae Oan mak fatan simu hakerek ne'e.
Bibi Malae Oan mak noo beran loke hanit iha hakerek nia.
Tan Nia kona ho'o ti'an.
Hotu, Na'i Maromak nodi raan,
kasu ema raiklaran salan.
Hodi nunia, ema nosi hunun no klubun hotu-hotu
bele dadi Na'i Maromak eman.
Hodi nunia, ema mak dale nodi lia hotu-hotu iha rai hotu-hotu
bele dadi Na'i Maromak eman.e
10 Bibi Malae Oan libur nola sia ti'an,
dadi baa Niakaan hutun-renun.
Bibi Malae Oan boi nola sia ti'an,
dadi Na'i Maromak eman serwisu.
Sia atu kaer ukun iha raiklaran.
Sia atu serwisu bodik Na'i Maromak iha raiklaran.”f
11 Sia nananu hotu, ha'u kfoti oin. Ha'u krona kola lia maliak boot ida. Karee no buat horis kasalak matan haat nia, no fukun na'in rua nulu resin haat nia, no tenik, Maromak Niakaan makbukar lale'an lear, to'o maliun-maliun.g 12 Sia hotu-hotu nananu nodi lian maka'as na'ak,
“Ami foti-hahaas Bibi Malae Oan mak kona ho'o.
Nia mak fatan simu amikaan tonun!
Niakaan beran, boot kaliuk.
Niakaan sasoin, wa'in kaliuk.
Niakaan kakutak, matenek kaliuk.
Niakaan babiit, maka'as kaliuk.
Ami foti-hahaas Niakaan naran.
Ami sera kneter baa Nia.
Ami tonu-haboot Nia.”
13 Sia nananu hotu, ha'u krona kola tenik kananuk seluk ida. Makmoris hotu-hotu iha lale'an, iha kalo'an, iha raiklaran, no iha tasi laran, foti lian nodi nananu. Ema nosi matebian fatin moos, tuir nananu. Sia nananu bele-bele na'ak,
“Ami tonu Na'i Maromak mak nabesi aan iha habesi aan fatin ne'e.
Ami moos foti-hahaas Bibi Malae Oan ne'e.
Ami sera kneter baa Sia.
Ami lo'u-sudur baa Sia.
Tan Sia mak kaer ukun nima-nimak!
Siakaan beran moos la mohu kois!”
14 Hotu, buat horis kasalak matan haat nia, nataa bei-beik na'ak, “Tebes, nunia! Nia, tebes ti'an!” Fukun nia sia moos nakni'a tenik nodi lo'u-sudur baa Na'i Maromak no Bibi Malae Oan nia.