Yesus solok hakerek baa ema sarani sia iha kota Sardis
3
Hotu, Ema Raiklaran Isin nia dale natutan tenik baa ha'u na'ak, “Yohanis, dala ida ne'e o musti makerek tenik hakerek ida. Hakerek nia lian nune'e:‘Bodik ema sarani sia iha kota Sardis:
Hakerek ne'e nosi Ha'u, mak Yesus. Ha'u ukun kodi Maromak Kmalar Lulik mak hanesan kmalar hitu. Ha'u moos kaer fitun matan hitu kodi Ha'ukaan liman. Hanono Ha'u kdale ne'e.
Karee ti'an emikaan hahalok iha Sardis nebaa. Ema dale na'ak, emi moris tuir Ha'ukaan beer. Mais tuir loos, emikaan hahalok la fatan no ema mak moris foun.
2 Hanoin di'a-di'ak! Hetak hakbiit emikaan fiar mak kre'is atu mohu. Ha'u kleno ti'an emikaan hahalok sia. La noo ida moos mak loos iha Na'i Maromak oin. 3 Keta halu'a hanorin loos mak emi simu ti'an hori uluk nia. Tuir tebe-tebes Na'i Maromak beer hodi la'o hela emikaan salan. Kalo emi la halo lai-lais nunia, emi la hadi'a aan baa oras Ha'u kmai kikar. Tan Ha'u kmai teki-tekis, nu'u ema na'ok mak emi la hanoin hola.a
4 Mais, emi balu iha Sardis sei moris loos, hanesan ema mak la nadoor faru. Tan lia nia, emi fatan tau faru mutin, la'o hamutuk ho Ha'u. 5 Ema mak tuir Ha'u to'o mate, fatan tau faru mutin. Ha'u la ko'as niakaan naran kosi hakerek mak noo ema hotu-hotu naran mak atu moris nima-nimak no Na'i Maromak. Ha'u moos katak baa Ha'ukaan Ama no makbukar lale'an sia ka'ak, nia, Ha'ukaan ema.b
6 Hanono di'a-di'ak lia mak Maromak Kmalar Lulik katak baa ema sarani sia.’”
Yesus solok hakerek baa ema sarani sia iha kota Filadelfia
7 Hotu, Ema Raiklaran Isin nia dale natutan tenik na'ak, “Yohanis, dala ida ne'e o musti makerek mola tenik hakerek ida seluk. Hakerek nia lian nune'e:
‘Bodik ema sarani sia iha kota Filadelfia:
Hakerek ne'e, nosi Ha'u, mak Yesus. Ha'u, mak moon no loos. Ha'u moos mak kaer Na'i Daud sabin. Kalo Ha'u kloke odamatan, la noo ema ida mak bele taka. Kalo Ha'u ktaka, la noo ema ida mak bele loke.c
8 Katene ti'an lia hotu-hotu mak emi halo. Ha'u moos katene ka'ak, ema la duun natene emi. Masik nunia moos, emi la heli Ha'u, mais emi tuir Ha'u nohuun. Mana di'a-di'ak, tan Ha'u kloke ti'an odamatan bodik emi. Dadi, la noo ema ida mak bele taka nikar.
9 Hanono di'a-di'ak! Noo ema mak dale bosok na'ak, sia Na'i Maromak eman. Mais tuir loos, sia tuir diabu ulun. Emi lei haree! Ha'u atu kalo sia to'o nakni'a iha emikaan oin, nodi katak sain na'ak, Na'i Maromak nadomi emi tebes.d 10 Tan emi haterus aan hodi tuir Ha'ukaan Manfatin, Ha'u atu ksara kola emi nosi susar mak Na'i Maromak atu nodi koko ema raiklaran.
11 La kleur ona, atu kmai kikar. Dadi, kaer metin Ha'ukaan hanorin mak emi simu hori uluk nia. Kalo tuir hanorin seluk, lia hotu-hotu mak Maromak nameno atu selu baa emi iha lale'an, lakon mohu. 12 Ema mak tuir Ha'u to'o mate, sia atu nein no Na'i Maromak nima-nimak, hanesan ai rii boot mak taman iha Na'i Maromak Tofatik. Ha'u atu kakerek Ha'ukaan Maromak naran no Niakaan kota naran iha siakaan isin. Kota nia, Maromak natuun nosi lale'an. Ema temi kota nia na'ak, Yerusalem Foun. Ha'u moos atu kakerek Ha'ukaan naran foun iha siakaan isin.e
13 Hanono di'a-di'ak lia mak Maromak Kmalar Lulik katak baa ema sarani sia.’”
Yesus solok hakerek baa ema sarani sia iha kota Laodikia
14 Hotu, Ema Raiklaran Isin nia moos dale natutan tenik na'ak, “Yohanis, oras ne'e, o musti makerek mola hakerek tatakan. Hakerek nia lian nune'e:
‘Bodik ema sarani sia iha kota Laodikia:
Hakerek ne'e nosi Ha'u, Yesus, mak ema temi na'ak, ‘Loos Huun’. Ha'u kdale lo-loos Maromak Manfatin. Lia hotu-hotu mak Na'i Maromak nase'i, huun nosi Ha'u.f
15 Karee ti'an emikaan hahalok iha Laodikia nebaa. Mais, emi nunabee?! Manas, lale; malirin moos, lale. Di'ak liu, kalo manas, manas tebe-tebes! Kalo malirin, malirin tebe-tebes! 16 Mais, tan emi tuir Ha'u hodi neon ruak, Ha'u atu kakbuut sai emi kosi Ha'ukaan ibun, hanesan ema nakbuut kaban.
17 Emi dale loko aan ha'ak, ‘Ita ne'e, ema maksoin. Ita moris di'a-di'ak. Sa-saa iha hotu!’ Mais tuir loos, emikaan neon naktomak ti'an, to'o emi la hatene tenik lia di'ak sia. Tan baa nia, emi dadi mukit no kwalan. 18 Di'ak liu, mai sosa hola mean isin hosi Ha'u, nebee emi dadi maksoin tebe-tebes. Sosa hola noo, faru mutin hodi taka hola emikaan kwalan nia. Sosa hola noo, ai tahan matan hodi ho'as emikaan matan, nebee emi bele haree hikar.
19 Ema mak Ha'u kadomi, kalo nalo sala, Ha'u kde'an kodi taa ukun baa nia, nebee nia bele nanorin aan. Dadi, emi musti haloos neon, tuir Ha'u hodi laran maluak.g
20 Rona di'a-di'ak! Ha'u kariik ti'an iha odamatan oin. Ha'u kbolu atu tama. Kalo ema ida rona Ha'ukaan lian, hotu loke odamatan, Ha'u ktama baa kaa kamutuk ko nia. 21 Ema mak tuir Ha'u to'o mate, Ha'u klatan beran baa nia, nebee tuur kaer ukun namutuk no Ha'u. Tan Ha'u moos katerus aan tuir Ha'ukaan Ama, oras ne'e Ha'u ktuur kaer ukun kamutuk ko Nia.
22 Hanono di'a-di'ak lia mak Maromak Kmalar Lulik katak baa ema sarani sia.’”