Yesus solok hakerek baa ema sarani sia iha kota Efesus
2
Hotu, Ema Raiklaran Isin nia naruka ha'u na'ak, “Yohanis. O musti makerek mola hakerek ida. Hakerek nia lian nune'e:‘Bodik ema sarani sia iha kota Efesus:
Hakerek ne'e, nosi Ha'u, mak Yesus. Ha'u mak kaer fitun matan hitu iha liman kwana. Ha'u moos la'o kasirin atu karee badut mean hitu nia ida-idak. Hanono ha'u kdale ne'e.
2 Karee ti'an emikaan moris iha kota Efesus. Emi haterus aan hodi serwisu susi ruin bodik Na'i Maromak. Oras ema aat mai iha emikaan klaran, emi dudu sai. Oras ema mai naktolek na'ak, nia mak Ha'ukaan klosan, emi leno di'a-di'ak niakaan moris, to'o hatene hola niakaan tolek teen. Hotu, emi dudu sai, la hanono nia. 3 Masik ema nasusar emi tan fiar Ha'u, emi haterus aan, la hakiduk kois.
4 Mais, emi monu ti'an iha lia ida. Uluk, oras emi foin fiar Ha'u, emi hadomi malu. Mais oras ne'e, la nunia ti'an. 5 Tan baa nia, emi musti hanoin oras uluk nia hodi hanawa ona hosi sala nia, nebee hadomi malu hikar hanesan uluk. Kalo lale, atu kmai kola kikar badut mean nia nosi emi. 6 Masik nunia, Ha'ukaan neon sei di'ak netik, tan emi la simu hanorin tolek nosi Nikolai eman sia. Ha'u moos la simu hanorin nia.a
7 Hanono di'a-di'ak lia mak Maromak Kmalar Lulik katak baa ema sarani sia. Ema mak tuir Ha'u to'o mate, Ha'u kfoo leet baa nia atu naa nosi ai huun iha Na'i Maromak to'os etu. Tan ema mak naa ai huun nia fuan, netan moris namutuk no Na'i Maromak to'o nima-nimak.’”b
Yesus solok hakerek baa ema sarani sia iha kota Smirna
8 Hotu, Ema Raiklaran Isin nia dale natutan na'ak, “Yohanis, dala ida ne'e o musti makerek tenik hakerek ida. Hakerek nia lian nune'e:
‘Bodik ema sarani sia iha kota Smirna:
Hakerek ne'e nosi Ha'u, mak Yesus. Lia hotu-hotu huun nosi Ha'u, hori uluk fohon to'o mohu. Uluk, Ha'u kmate, mais oras ne'e, Ha'u kmoris kikar ti'an. Hanono Ha'u kdale ne'e.c
9 Karee ti'an emikaan moris susar iha Smirna. Emi ne'e, mukit iha ema raiklaran oin, mais, soi iha Na'i Maromak oin. Noo ema mak dale na'ak, sia, Na'i Maromak eman. Mais, sia moos nadois emikaan naran. Tuir loos, sia lahoos Na'i Maromak eman. Sia tuir diabu ulun dei. 10 Dadi, hanono di'a-di'ak. Lalika hata'uk hetan susar. Surak hatene, diabu ulun buka atu natama emi balu baa bui to'o loron sanulu laran, tan nia nakara nebee emi se'i kotuk baa Ha'u. Masik emi kona ho'o, keta halu'a Ha'u. Tan ema mak tuir Ha'u to'o mate, atu kselu kikar nia kodi moris nima-nimak.
11 Hanono di'a-di'ak lia mak Maromak Kmalar Lulik katak baa ema sarani sia. Tan ema mak tuir Ha'u to'o mate, nia la terus susar iha tasi ha'i mak laka nohuun. Hodi nunia, nia la mate dala rua.’”d
Yesus solok hakerek baa ema sarani sia iha kota Pergamus
12 Hotu, Ema Raiklaran Isin nia dale natutan tenik na'ak, “Yohanis, dala ida ne'e o musti makerek tenik hakerek ida. Hakerek nia lian nune'e:
‘Bodik ema sarani sia iha kota Pergamus:
Hakerek ne'e nosi Ha'u, mak Yesus. Ha'u mak kaer surik ro'at matan ruak. Hanono Ha'u kdale ne'e.
13 Katene ti'an emikaan kota Pergamus nia. Makaer ukun iha nia, diabu ulun. Masik nunia moos, emi kaer metin Ha'ukaan naran, hodi fiar Ha'u bei-beik. Uluk, Ha'ukaan ema ida iha nia, naran Antipas. Nia nanorin nalo loos nosi Ha'ukaan dalan moris, mais ema no'o nia. Masik nunia moos, emi la heli Ha'u.
14 Mais, emi monu baa lia ida-rua, tan emi na'in hira tuir Balam hanorin kale'uk. Uluk, Balam nanorin Balak atu sokur ema Isra'el sia, nebee nakur Na'i Maromak beer, to'o sia naa hahaak mak sera baa ai'oi lulik no nakur biti-kluni.e 15 Emi na'in hira moos tuir Nikolai hanorin. 16 Dadi, emi musti hanawa hosi emikaan salan nia sia. Kalo lale, la kleur Ha'u kmai karoe emi kodi Ha'ukaan lia fuan mak ro'at hanesan surik.
17 Hanono di'a-di'ak lia mak Maromak Kmalar Lulik katak baa ema sarani sia. Ema mak tuir Ha'u to'o mate, Ha'u kfoo leet baa nia atu naa tubi manna mak rai kedan ti'an nosi lale'an. Ha'u moos atu foo fatuk mutin ida mak noo hakerek niakaan naran foun. Nia mesan mak natene naran nia. Ema seluk la natene.’”f
Yesus solok hakerek baa ema sarani sia iha kota Tiatira
18 Hotu, Ema Raiklaran Isin nia dale natutan tenik na'ak, “Yohanis, dala ida ne'e o musti makerek tenik hakerek ida. Hakerek nia lian nune'e:
‘Bodik ema sarani sia iha kota Tiatira:
Hakerek ne'e nosi Ha'u, Yesus, mak Na'i Maromak Oan! Ha'ukaan matan laka nu'u ha'i. Ha'ukaan ain mean laak nu'u besi riti hamotu. Hanono Ha'u kdale ne'e.
19 Karee emikaan moris ti'an. Emi hadomi Ha'u no fiar biit baa Ha'u. Emi moos tuir Ha'ukaan ukun nohuun. Masik ema nasusar emi moos, emi haterus aan bei-beik. Ha'u moos katene, oras ne'e emi serwisu maka'as liu tenik bodik Ha'u.
20 Mais, emi monu baa lia ida, tan emi simu feto naran Isabel nia. Nia naksa'ek aan na'ak, nia, Maromak mako'an. Hotu emi habusik nia bosok nola Ha'ukaan ema sia nodi hanorin kale'uk, to'o sia nalo lia kfo'er no tuir naa haan mak sera baa ai'oi lulik. 21 Ha'u kde'an feto nia hei-hein ti'an, nebee la'o nela sala nia, mais nia la no'uk.
22 Mana di'a-di'ak. Oras ne'e Ha'u kakotu ti'an atu kastikar nia kodi moras ida, to'o nia la bele la'o nela toba fatin. Nunia moos, baa ema mahalo lia kfo'er no nia. Kalo sia la la'o nela feto aat nia, la kleur ona Ha'u moos kastikar sia. 23 Ha'u moos atu ko'o feto aat nia oan sia. Kodi nunia, emi makfiar hotu-hotu hatene ha'ak, Ha'u katene ema raiklaran neon ain. Ha'u moos atu selu baa emi tuir emikaan hahalok.g
24 Mais, emi seluk sia iha Tiatira la tuir feto nia hanorin aat. Emi dudu fila hanorin funin nosi ema mak kaer ai tahan aat. Tan baa nia, Ha'u lalika de'an tenik emi, 25 surak kaer metin emikaan fiar to'o kmai kikar. 26-27 Ha'u atu kfoo beran bodik ema mak tuir Ha'u to'o mate. Beran nia, beran boot, manesak no beran mak Ha'u ketan kosi Ha'ukaan Ama kodi ukun ema klubun hotu-hotu iha raiklaran. Kalo ema sakar Ha'u, Ha'u kodi beran nia, Ha'u ksakar kikar sia, hanesan kodi kno'an besi, ta'e karoe sasanan rai.h 28 Ha'u moos atu foo fitun na'in baa emi.
29 Hanono di'a-di'ak lia mak Maromak Kmalar Lulik katak baa ema sarani sia.’”