1-2 Tabe nosi ha'u, Yohanis, mak Yesus Kristus ain-liman.

Iha ne'e ha'u kakerek kosi lia saa mak nosi ikus atu dadi. Ha'u kbele simu lia ne'e sia, nune'e: Na'i Maromak du'uk mak natudu kedan baa Yesus Kristus nebee nato'o baa Niakaan ema sia. Hotu, Yesus naruka makbukar lale'an ida, baa nalore lia ne'e sia hotu-hotu baa ha'u, nebee kakerek kola kedan. La kleur ona, lia ne'e sia hotu-hotu nanis dadi. Tan baa nia, hanono di'a-di'ak Na'i Maromak Manfatin ne'e mak Yesus solok.

3 Na'i Maromak nameno ti'an na'ak, Nia atu natuun matak-malirin baa ema hotu-hotu mak leno no nanono hakerek ne'e nodi nala'ok Niakaan Manfatin. Tan niakaan oras atu hotu ona.

4 Ha'u ksolok hakerek ne'e baa Yesus Niakaan ema klubun hitu iha rai Asia.

Ha'u kusu moris manek no dame kosi Na'i Maromak bodik emi hotu-hotu. Nia iha kedan ti'an hori uluk. Nia iha baa oras ne'e. Nia moos iha to'o nima-nimak. Ha'u moos kusu moris manek no dame kosi Maromak Kmalar Lulik. Ha'u ktitu-karee Kmalar Lulik nia, hanesan kmalar hitu mak se'i oin baa Na'i Maromak habesi aan fatin.^{a b} 5 Ha'u moos kusu moris manek no dame kosi Yesus Kristus. Nia katak malorek lia hotu-hotu mak Na'i Maromak katak ti'an baa Nia. Uluk, Nia mate, mais Na'i Maromak nalo Nia moris nikar, nebee dadi ema dala uluk mak moris nikar nosi mate. Nosi ikus, Nia moos atu dadi Na'in baa na'in hotu-hotu iha raiklaran.

Yesus raan nakduar to'o mate, tan Nia nadomi ita. Nodi mate, Nia loke dalan atu sori ita nosi itakaan salan.^c 6 Hotu, Nia foti ita baa Niakaan renu, nebee ita serwisu bodik Niakaan Ama Maromak. Yesus Kristus maka'as nanis! Niakaan beran la nakotu! Ne'e, tebes!^d

7 Dadi, loke matan, mana di'a-di'ak! Oras ne'e, Yesus no Aman iha lale'an baa. Mais la kleur ona, Nia atu namaan aan tuun mai nosi lale'an nodi kalo'an. Baa oras nia, ema hotu-hotu iha raiklaran titu-naree Nia. Nunia moos, ema mak uluk sona no'o Nia. Baa oras titu-naree Nia, ema klubun hotu-hotu iha raiklaran moos, sadi'a nodi tanis naro'an aan. Lia nia sia hotu-hotu, nanis dadi. Ne'e, tebes!^e

8 Na'i Maromak dale na'ak,

9 Tan ita fiar bele-bele ha'ak, Yesus, itakaan Na'in, etuk ha'u kdadi emikaan maluk. Ema balu krakat tan ita tuir Yesus, mais Yesus nakbiit itakaan neon, to'o ita bele haterus aan bei-beik. Sia moos krakat ha'u, tan ha'u katak Na'i Maromak Manfatin baa ema, kodi kanorin lia Yesus. Tan lia nia, sia kohi nodi soe ha'u ti'an baa rai ne'e, mak naran Patmoos. 10 Hotu, baa loron hamulak ida, Maromak Kmalar Lulik kona ha'u. Teki-tekis, ha'u krona lia maliak maka'as ida, nu'u kfui dikur lian nalian nosi kotuk. 11 Lia maliak nia naruka na'ak, “Yohanis! Ha'u kakara kalore lia ida baa o. O musti makerek mola hotu-hotu lia mak o maree ne'e. Hotu, o musti solok baa ema sarani klubun hitu, mak ida-idak iha kota Efesus, kota Smirna, kota Pergamus, kota Tiatira, kota Sardis, kota Filadelfia no kota Laodikia.”

12 Rona kola nunia, ha'u kfila baa kotuk atu karee ema mak dale nia. Mais, karee loos badut lolon hitu iha badut sasukun mak halo hosi mean. 13 Noo ema ida mak nariik iha badut nia sia klaran. Ilas hanesan Ema Raiklaran Isin. Tau faru klobor ida, nodi sakat tais mean ida baa karas.^g 14 Fuuk, mutik hanesan kabas rahun.^h Matan, laka hanesan ha'i lakan.ⁱ 15 Ain, mean laak hanesan besi riti hamotu. Lian maliak boot, hanesan wee tatolik.^j 16 Liman kwana kaer fitun matan hitu. Surik matan ruak ro'at ida naklosu sai nosi ibun. Oin, naksinak kroman hanesan loro sinak.

17 Titu-karee ema nia, ha'u kakloti kedan iha ain. Mais Nia kebit ha'u nodi liman kwana, hotu dale na'ak, “Oa! Keta mata'uk! Lia hotu-hotu huun nosi Ha'u, hori uluk fohon to'o mohu.^k 18 Uluk, Ha'u kmate. Mais maree mai! Oras ne'e, Ha'u kmoris kikar ti'an. Ha'u moos atu kmoris to'o nima-nimak. Ha'u, makaer sabi matebian fatin. Ha'u mak karuka taka-loke fatin nia, tan Ha'u koo beran kalo ema moris nikar. 19 Dadi, o musti makerek mola lia hotu-hotu mak o maree baa oras ne'e, no lia hotu-hotu mak nosi ikus atu dadi. 20 Ha'u kalore uluk lia isin nune'e: Badut mean hitu nia na'ak, ema sarani klubun hitu. Fitun matan hitu nia mak o maree iha Ha'ukaan liman kwana nia na'ak, makbukar na'in hitu mak nodi lia nosi Na'i Maromak baa ema sarani klubun hitu nia.”