Esau husar-binan sia
36
Ne'e mak Esau husar-binan sia. Esau niakaan naran seluk, Edom. 2 Nia nola feto Kana'an na'in rua nalo baa feen. Feto ida, naran Ada. Ada nia, ema Het ida naran Elon oan. Esau feen ida tenik, ema Hewi, naran Oholibama. Oholibama aman, naran Anah. Bein, naran Sibeon. 3 Esau moos nola noo Ismael oan feto ida, naran Basmat. Basmat maun, naran Nebayot.4 Esau feen Ada nahoris Elifas. Basmat nahoris Rehuel. 5 Oholibama nahoris Yeus, Yalam no Kora. Esau feen sia nahoris oan ne'e sia hotu-hotu iha rai Kana'an.
6 Dala ida, Esau lori baa rai seluk, dook nosi Yakob. Nodi feen-oan, ema serwisu, bibi no karau no naha hotu-hotu. 7 Esau sasa aan nosi Yakob, tan bibi no karau no sasoin seluk sia wa'in liu resik to'o sia moris seti malu iha rai nia. 8 Tan lia nia, Esau (mak Edom), baa tuur iha rai foho iha Seir.
9 Ne'e, Esau husar-binan, mak ema temi na'ak, ‘ema Edom’. Sia tuur iha rai foho iha Seir.
10-13 Esau feen Ada nahoris oan mane ida, naran Elifas. Elifas netan oan mane na'in lima mak: Teman, Omar, Sefo, Gatam no Kenas. Elifas feen ki'ik, naran Timna. Nia nahoris oan mane ida naran Amalek.
Esau feen Basmat nahoris oan mane ida naran Rehuel. Hotu, Rehuel netan oan mane na'in haat mak: Nahat, Sera, Syama no Misa.
14 Esau feen Oholibama, Anah oan, mak Sibeon oa bein nia. Nahoris oan mane na'in tolu, mak: Yeus, Yalam no Kora.
15-16 Esau oan no bein oan sia sasa fa'e malu, dadi ema hunun wa'in, ida-idak no du'uk fukun. Esau oan ulun, Elifas oan sia, dadi baa fukun Teman, fukun Omar, fukun Sefo, fukun Kenas, fukun Kora, fukun Gatam no fukun Amalek. Sia hotu-hotu nia, mak Esau no feen Ada husar-binan.
17 Esau oan Rehuel oan sia, dadi fukun Nahat, fukun Sera, fukun Syama no fukun Misa. Sia hotu-hotu nia, mak Esau no feen Basmat husar-binan.
18 Esau no feen Oholibama oan sia, dadi fukun Yeus, fukun Yalam no fukun Kora.
19 Ema hunun nia sia hotu-hotu, mak Esau husar-binan.
Seir husar-binan
20-21 Iha fatin nia moos noo ema Hori ida, naran Seir. Niakaan oan sia sasa fa'e malu, dadi baa ema hunun wa'in, ida-idak no du'uk fukun. Oan sia dadi baa fukun Lotan, fukun Sobal, fukun Sibeon, fukun Anah, fukun Dison, fukun Eser no fukun Disan.
22 Lotan oan sia mak Hori no Heman. (Lotan feton mak Timna).
23 Sobal oan sia mak Alwan, Manahat, Ebal, Sefo no Onam.
24 Sibeon oan sia mak Aya no Anah. Anah nia mak netan nola wee matan manas iha raihenek raat, oras naliku aman kuda keledai sia.
25-26 Anah oan feto mak Oholibama. No oan mane mak Dison. Dison oan mak Hemdan, Esban, Yitran no Keran.
27 Eser oan mak Bilhan, Sa'awan, no Akan.
28 Disan oan mak Us no Aran.
29-30 Fukun ema hunun Hori sia mak ne'e: Lotan, Sobal, Sibeon, Anah, Dison, Eser no Disan. Sia hotu-hotu nein iha rai Seir.
Rai Edom na'in sia
31 Rai Isra'el sei dauk no na'in, rai Edom no na'in ti'an. Naran sia tuir malu, nune'e:
32 Sia foti Beor oan Bela, dadi na'in kota Dinhaba.
33 Bela mate, Yobab seluk nia. Yobab aman, naran Sera nosi leo Bosra.
34 Yobab mate, Husam seluk. Husam nia, nosi ema Teman rain.
35 Husam mate, Hadad seluk. Hadad aman, naran Bedad, nosi leo Awit. (Hadad ne'e, mak natoba nola ema Midian, baa oras sia natuda iha Moab).
36 Hadad mate, Samla seluk. Samla nia, nosi leo Masreka.
37 Samla mate, Saul seluk. Saul nia, nosi leo Rehobot iha mota di'in.
38 Saul mate, Ba'al-Hanan seluk. Ba'al-Hanan aman, Akbor.
39 Ba'al-Hanan mate, Hadar seluk. Hadar nia, nosi leo Pahu. Niakaan feen naran Mehetabel. Mehetabel aman, naran Matret. Bein, naran Mesahab.
40-43 Fukun nosi Esau sia, mak ne'e: Timna, Alwa, Yetet, Oholibama, Ela, Pinon, Kenas, Teman, Mibsar, Magdiel no Iram. Sia ida-idak nanaran rai, tuir siakaan naran du'uk.
Nunia dei, Esau husar-binan mak ema Edom.