Yakob sia nalai baa Betel
35
Hotu, Maromak katak baa Yakob na'ak, “Ha'u ne'e, Maromak mak natadu aan baa o, baa oras o malai mosi okaan maun Esau. Oras ne'e, lori baa Betel ona. To'o nebaa, mariik taroman bodik Ha'u. Hotu, tuur iha nia.”2-3 Tan lia nia, Yakob katak baa niakaan ema uma laran sia na'ak, “Oras ne'e, ita lori baa Betel. Uluk, oras ha'u iha susar laran, Maromak tulun ha'u iha nia. Ha'u kakara kariik taroman ida iha nia. Tan baa nia, emi musti soe emikaan ai'oi lulik sia hotu-hotu. Hamoos isin lolon, foin seluk tais, tan ita atu lo'u-sudur baa Maromak.” 4 Rona nola nunia, Yakob ema uma laran sia moos latan kedan siakaan ai'oi lulik no karabu sia hotu-hotu.a Hotu, Yakob nakoi naha nia sia iha ai huun boot ida ohak kre'is leo Sikem. 5 Oras Yakob sia la'o lolok nosi Sikem, Maromak nalo nata'uk ema iha rai nia, to'o sia la naksakar aan nalo aat baa Yakob sia.
6 Hodi nunia, Yakob no niakaan ema sia, la'o no dame to'o leo Betel (mak uluk naran ‘Lus’) iha rai Kana'an. 7 To'o nia, Yakob nariik taroman. Nia nanaran fatin nia El Betel, tan lia isin na'ak, ‘Maromak iha Betel’. Uluk Maromak natadu aan baa Yakob iha nia, baa oras nia nalai nosi maun.
8 Kre'is leo Betel, no ai huun boot ida naran Alon Bakut. Lia isin na'ak, ‘ai tanis hade'un aan’. Ai naran nunia, tan Ribka inan haliku naran Debora, mate, hotu sia nakoi nia iha ai nia ohak.
9 Yakob fila nikar nosi Padan-Aram, Maromak natadu aan tenik nodi natuun matak-malirin baa nia 10 na'ak, “Nahuu baa oras ne'e, okaan naran lahoos Yakob tenik. Ha'u ktau naran foun baa o ka'ak, Isra'el.b 11 Ha'u ne'e, Maromak mak Beran Kaliuk. O atu metan husar-binan wa'in lear! Ema klubun sia atu mosu mai nosi okaan husar-binan. O moos mahoris na'in lear. 12 Rai mak Ha'u klatan baa okaan bei Abraham no okaan aman Isak nia, oras ne'e Ha'u klatan baa o mo okaan husar-binan sia.”
13-14 Rona notu nunia, Yakob nariik fatuk ida iha fatin nia, dadi tadak ida, nebee nodi nanoin Maromak mamenon. Nia fui kedan anggor ween no mina morin iha fatuk nia leten, nodi lo'u-sudur baa Maromak. 15 Yakob nanaran fatin nia, Betel.
Yakob feen Rahel mate nahoris
16 Hotu, Yakob sia la'o nela Betel. Oras nia Rahel ko'us. Oras sia sei dook nosi leo Efrata (mak oras ne'e, ema temi na'ak Betlehem), Rahel loron nahoris moos to'o mai. Mais nia nahoris susar, 17 to'o makaer mii katak baa nia na'ak, “Ina Rahel! Makbiit neon! Ina netan oan mane ida tenik!” 18 Masik Rahel nawan kre'is atu kotu moos, nia sei tau nela naran baa oa nia na'ak, Ben-Oni (tan ben-oni lia isin na'ak ‘oa susar’). Hotu, nawan moos kotu. Mais Yakob nanaran oan nia, Benyamin (tan benyamin lia isin na'ak ‘oa liman kwana’.
19 Hotu, sia nakoi Rahel iha dalan tehen baa Efrata (mak oras ne'e, ema temi na'ak Betlehem). 20 Nakoi ti'an, Yakob nariik fatuk rate ida iha nia. To'o oras ne'e moos, Rahel niakaan fatuk rate nia sei nafati.
Yakob oan sia
21 Nunia hotu, Yakobc lori baa-mai bei-beik. Dala ida, nia nariik batane iha tetu Eder sorin. 22 Oras sia nein iha nia, Ruben toba no aman feen ki'ik, Bilha. Yakob moos natene nola lia nia.
Yakob oan mane sia, na'in sanulu resin rua.
23 Lea oan sia, Ruben (mak Yakob oan ulun), Simeon, Lewi, Yahuda, Isaskar no Sebulon.
24 Rahel oan sia, Yusuf no Benyamin.
25 Rahel ata feto Bilha oan sia, Dan no Naftali.
26 Hotu, Lea ata feto Silpa oan sia, Gad no Aser.
Yakob netan oan nia sia iha Padan-Aram.
Yakob aman Isak mate