Sin neer Uisif Yesus nuu nateef nok gubernor Pilatus
(Naiꞌ Mateos 27:1-2, 11-14; Naiꞌ Lukas 23:1-5; Naiꞌ Yohanis 18:28-38)
15
Neis noi nmeu te, kafeer raisn ne sin nnera mese' nuu na'maet Nai' Yesus. En nai ma sin nfuut neer Je nuu nateef nok gubernor Pilatus. 2 Oros sin ntean gubernor ee te, hin nataan Nai' Yesus am nak, “En mee? Namneo Ho he' ai atoin Yahudis sin Uisf ee, oo?”Nai' Yesus nataah am nak, “Batuur! Ama' gubernor ho uabm aan, batuur.”
3 Oke te, ka'naak rais pirsait Yahudi sin kanaakt iin na'uab iin nok gubernor ee mnak, “Atoni ai Hin saant ii mfau reu'uf!” En nai ma sin ansoi' Hin saant iin ee mese'-mese'.
4 Oke te, gubernor nataan anteni Nai' Yesus am nak, “Ho mneen sin uabr ini oo, ai' mae'? Sin nasaeb ko sanat namfau. Bait ho mutaah miit fe'!”
5 Mes Nai' Yesus antoin fefa' mes'e aa mae' amsa', tar antea gubernor ee nsanmaak.
Gubernor Pilatus nafeer hukun maetes nuu Uisif Yesus
(Naiꞌ Mateos 27:15-26; Naiꞌ Lukas 23:13-25; Naiꞌ Yohanis 18:39-19:16)
6 Toon-toon te, karu atoin Yahudis sin anmoe'en feset Paska, bijasa too mfaun iin anpiir naan atoin bui tuaf es, nuu gubernor ee nafeitn ee na'ko bui. 7 Oros naan, anmui' atoin bui tuaf es, kaann ee nai' Barabas. Nahuun te, sin nheek je nok hin aon-bian iin ee, natuin hin nraban kanaa' prenet pah Roma, ma hin nroor atoni msa'. 8 Natuin feset Paska naan anpaumaak hen, es nai' atoin mfaun iin nnao neu gubernor Pilatus ma nhuun iin im nak, “Ama' gubernor! Neon ko'u Paska anpaumaak hen. Karu reko te, mufetin atoin bui tuaf es, en he' toon-toon.”
9 Oke te, gubernor ee ntoin sin im nak, “En naan te, au nuu kufeti ki seku naa? Karu au kufeti ki atoin Yahudis sin Uisif he' ai te, hi mromi, oo?” 10 Gubernor ee na'uab en naan, kamneon ii hin nahiin narair nak, ka'naak rais pirsait Yahudi sin kanaakt iin neer Nai' Yesus nuu ne, natuin sin neer iin namenen nmaeten nuu Nai' Yesus.
11 Mes aar he' ka'naak rais pirsait Yahudi sin kanaakt iin ee anhuita' too mfaun iin nuu sin ntoit nuu gubernor ee mnak, “Hai mroim maan Je mae'! Mufeti' kai nai' Barabas, tua!”
12 Oke te, gubernor ee nataan nteni' sin im nak, “Karu en naan te, au nuu 'moe saa' neu Nai' Yesus he' ai, he' sin nteek naan Je mnak ‘atoin Yahudis sin Uisf aa’?”
13 En nai ma sin nhuun iin ok-oke' am nak, “Mu'maat je! Amkuus mu'peit' Ee meu hau nehe, tua!”
14 Oke te, gubernor ee nataan am nak, “Hin saant ii saa' naa? Au kuprikis kuraar Je, mes au kupein sanat mes'e aa mae' msa'!”
Mes sin aar sin anhunun naher-heren nteni' am nak, “Mu'maat je! Amkuus Ee ek hau neeh je, tua!”
15 Natuin gubernor ee nuu nhairinib too mfaun iin sin neer iin ee, en nai ma hin nafeti' nai' Barabas natuin sin roimr iin ee. Oke te, hin naprenet atoin kapaot iin nuu sin nnao nbius Nai' Yesus anpaek kauboe.a Anbeos narair Je te, soraurs iin neer Nai' Yesus anpoi nnao nuu nkuus niis Ne ek hau nehe.
Soraurs iin anbius nafan-fainik Uisif Yesus
(Naiꞌ Mateos 27:27-31; Naiꞌ Yohanis 19:2-3)
16 Oke te, soraurs iin anheer neer Nai' Yesus nuu sin kintal.b Ek naan, sin noe'en nabuab soraurus puukn es, of oni' tuaf nautun niim. 17 Ma sin nabaur Nai' Yesus neer baur mnanu' maas mee-umub, en he' uisf iin bijaas anpaeken. Oke te, sin nait noon ma'aika' ma sin nria'an soob es. Ma sin ntuma'nia nataam soeb ma'aika' naan nuu Nai' Yesus Hin naakn ee, nuu sin na'raar win en he' nuu nasaeba' 'piru'-baru nuu uis feu' gwes.
18 Oke te, sin na'ruur iin ma na'besen, oke te nakree't Ee mnak, “Tabe, Ama Usi' Yahudi!” 19 Ma sin na'ruur iin napo-poin ek Nai' Yesus Hin maatn ee. Ma sin npuurn iin hape fani-fani nuu Hin huumn ee. Oke te, sin ntee' nafan-faink Ee neirin hau. 20 Sin nakre'et naraar Je en naan te, sin npua' nafani baur mnanu' naan. Ma sin napaekeb nafani' Hin baer paekn ee. Oke te, sin neer Je npoi na'ko kota Yerusalem, nuu nkuus na'peit Ee ek hau nehe tar anmaet.
Sin nkuus na'peti Uisif Yesus ek hau nehe
(Naiꞌ Mateos 27:32-44; Naiꞌ Lukas 23:26-43; Naiꞌ Yohanis 19:17-27)
21 Oros sin npoin nnao na'ko Yerusalem, sin nateef nok atoon' es ek raan tnana'. Atoni naan na'ko kota Kirene, kaann ee nai' Simon. Hin he' naan, nai' Aleksander ma nai' Rufus sin aamn aa. Hin fe' nuu ntaam nuu kota Yerusalem te, soraurs iin anheer naan ee, ma na'seek' ee nuu nasaah Nai' Yesus Hin hau nehe.c 22 Sin nheer neer Nai' Yesus antea baar jes, kaann aa Golgota. (Hin moufn ii ‘bare 'naak nuif’.) 23 Ek naan, sin nuu na'inu' Nai' Yesus neer raur mai'ninu' maseor hau, nuu Hin bisa ntahan menes. Mes Hin nroim nuu ninu mae'. 24-25 Oke te, sin nkuus natneneb Nai' Yesus ek hau nehe. En nai ma sin nahake' hau nehe naan, of oni' fe' anreuk seo. Oke te soraurs iin anheren suur ana' nuu napara' seku naa es napein Nai' Yesus Hin baer paekn ee.d 26 Oke te, sin ntuin ek hau pisa' es am nak:
“Atoni ai, atoin Yahudis sin Uisf aa”
Oke te, sin nkuus hau pisa' naan, ek hau neeh je faofn ee anhaumaak Nai' Yesus Hin naakn ee. Sin npaek rais matu'i naan nuu nhuukn Ee. 27 Ek naan, sin nkuus na'maet kaburaurut tuaf nua msa'. Es ek Nai' Yesus Hin bnapan reko, ma es anteni ek 'rii. 28 [Nok rasi naan te, sin natuin saa' he' matu'i nain ek Uisneno Hin Suru Kninu' he' nak, “Sin nmoo' Je nahuum en he' atoin kamaufiunut.”]e f
29 Aar he' atoni mfaun iin he' nnao natuin ranan naan, niit Nai' Yesus makfiri' ek hau nehe. En nai ma sin nkiu'n iin ma nakre'et Nai' Yesus am nak, “Hoe! Ho es he' mak, Ho nuu mpukai mureu' Uisneno Hin Uim Oenen Uuf, oke te mufena' mufaan' ee ek neno teun hin naann aa.g 30 Reko te Ho msaun mu'ko hau nehe naan, nuu mufetin Ho tuam aan neu! Karu Ho mmoe' en naan te, nai' hai mpirsai mak Ho he' ai Uisneno Hin Aann aa.”
31 Ka'naak rais pirsait Yahudi sin kanaakt iin nok tunggur agama sin nakre'et Nai' Yesus amsa' am nak, “Hin nsoi nafetin biar iin ee, mes Hin bisa nafeti naan Hin tuan ee mae'. 32 Hin nteek Hin tuan ii nak ‘Kristus’, Atoni he' Uisneno anba'an naan Je na'ko un-unu'. Bian nak, Hin he' naan atoin Israel sin Uisf aa. Karu namneo en naan te, reko te Hin nsaun na'ko hau neeh ji fe' nuu nai hai miit Ee. Oke te, nai' hai mpirsaa Je.”
Tua nua' iin he' na'peti sin bu'-bua' nok Nai' Yesus ek sin hau nehe mese'-mese', sin nakre'et Nai' Yesus amsa'.
Uisif Yesus anmaet
(Naiꞌ Mateos 27:45-56; Naiꞌ Lukas 23:44-49; Naiꞌ Yohanis 19:28-30)
33 Oke te, mesi'noorn ii n'aum naan bare naan, na'ko maans ii na'puup tar antea nreuk teun maans ii nmaeb. 34 Oros nreuk teun en naan te, Nai' Yesus anhunun neer uab Aram am nak, “Eloi! Eloi! Lema sabaktani?” (He' neer hit uab ii te nak, “Koi, Au Usi'! Koi, Au Uisneno! Nansaa' am es Ho mparakan Kau en he' ai?”)h
35 Tuaf fauk he' anhaumakan ek he' naan, sin nneen Nai' Yesus Hin haann ee. En nai ma sin na'uab iin im nak, “Hoe! Hi mneen fe'! Hin nkoa' ka'o Elia, Uisneno Hin mafefa kninu' un-unu'.” 36 Oke te, tuaf es naen nait ani'-tei meto' ma nareep ee ek raur mai'ninu'. Oke te, na'puun ee ek haa gwes hin paann aa, ma naraimib Nai' Yesus nuu nmuis. Oke te, atoni naan na'uab am nak, “Tpao nuu hit tkius tiit ee! Kais-kaisa' ka'o Elia neem ma nasaan Oe na'ko hau nehe.”i
37 Oke te, Nai' Yesus anhuun anteni', ma Hin nmaet.
38 Anbia' ek Uim Oenen Uuf, nakfiri' tai eon' kou' gwes nuu nanini' Uisneno Hin Kea'an Akninu'. Oros Nai' Yesus snaasn ii natfeer te, tai eno' naan natpisu nbait nua, na'ko faofn ee tar antea nuupn ee.j
39 Ek Golgota, atoin ka'naak soraurs es anhaek nhaumaak Nai' Yesus Hin hau neeh Je. Oros hin niit Nai' Yesus Hin 'maetn ee, hin naskeek. Oke te, hin na'uab am nak, “Airoo! Atoni ai namneo-namneo Uisneno Hin Aann aa!”
40-41 Bifee fauk napeen Nai' Yesus Hin 'maetn ee na'ko roo. Sin es he' nahuun te antuthae Nai' Yesus sin ek pah Galilea. Sin es he' ina' Salome, bi Maria na'ko ruan Makdala, nok ina' Maria (he' nai' Yakobus muni' nok nai' Yosesk sin iinn ee), ma bifee mfaun bian anteni' he' neem nabu-buan nok Nai' Yesus neu Yerusalem.l
Sin nsuub Uisif Yesus Hin aon-tau'un ek noup fatu
(Naiꞌ Mateos 27:57-61; Naiꞌ Lukas 23:50-56; Naiꞌ Yohanis 19:38-42)
42-43 Oke te, atoon' es naim ranan nuu nasanu' Nai' Yesus Hin aon-tau'un kamaetes na'ko hau nehe. Atoni naan kaann ee, nai' Yusuf. Hin na'ko kota Arimatea. Hin he' naan tuaf es na'ko pukun kafeer rais pirsait Yahudi. Hin neern ee reko. Hin npao prenet Uisneno he' nuu neem.
Nai' Yesus anmaet nok neon nima'. Noka' te nateef nok atoin Yahudis sin neon oenen. Es naan te, ek neon nima' naan, nai' Yusuf nuu nasanu' nahunun Nai' Yesus Hin aon Ee. En nai ma nai' Yusuf anha'taen hin neern ee, ma nnao nbaiseun gubernor Pilatus nuu nasanu' Nai' Yesus Hin aon kamaetes naan. 44 Oros gubernor ee anneen nai' Yusuf hin haann toitis naan te, hin nsanmaak. En nai ma hin na'uab am nak, “Airoo! Atoni naan anmaet rabah haa, jo! Ek au neerk ii te, au kak oni' mae' fe'.”
Oke te, hin nreun tuaf nuu noe'en ka'naak soraurus. Oros hin nemen ntea te, gubernor ee nataan am nak, “En mee? Nai' Yesus nmaet narari oo, ai' mae' fe'?”
45 Ka'naak soraurus naan nataah am nak, “Namneo! Hin nmaet hen, tua.” Oros gubernor ee nneen en naan te, hin nfee mainuan nuu nai' Yusuf nuu nnao nasanu' Nai' Yesus Hin aon-tau'n Ee.
46 Oke te, nai' Yusuf nnao nsoos tai mnaun' fe'u ma'osa'. En nai ma hin nnao nuu Golgota. Ma hin nasanu' Nai' Yesus Hin aon Ee na'ko hau nehe. Hin n'aum uismina' naan neer tai fe'u ma'osa' naan. Neot naan, sin fe' anpahat narair noop faut gwes ek knete fatu. Oke te, sin nsoron nataam uismina' naan nuu noup fatu. En nai ma sin naritu' faut been kou' gwes, nuu nakeer na'maet noup fatu naan. Oke te, nai' Yusuf sin anfainin.
47 Oros naan, bi Maria na'ko Makdala, ma ina' Maria (nai' Yoses hin iinn aa), sin nokon ek naan amsa'. Sin nua sin ankius narek-reko' bare he' sin natunu' Nai' Yesus Hin aon-tau'n Ee.