Uisif Yesus anmoini nfain!
(Naiꞌ Mateos 28:1-8; Naiꞌ Lukas 24:1-12; Naiꞌ Yohanis 20:1-10)
16
Noka' neon ne'e, atoin Yahudis sin neon oenen. Maans ii nmouf narair te, bi Maria na'ko ruan Makdala, ma ina' Maria (nai' Yakobus hin iinn aa), nok ina' Salome, sin nnao nsoson miin fubona', nuu noka' te, sin nuu nnao nkaak iin nuu Nai' Yesus Hin aon-tau'un natuin sin harat atoin Yahudis. 2 Ma noka' neon okrei oros snaat ii nsae te, sin teun sin nnao neu noup fatu naan. 3-4 Ek raann tnana' te sin na'uab iin im nak, “Amoo! Of seku naa es ntita' na'roba kit faut kou' gwe na'ko noup gwe hin eonn ee? Hit teun kit ta'bei' je mae'. Faut gwe kou' reu'uf!”Mes oros sin ntean bare naan, sin niit fatu naan natnain nrair. 5 Oke te, sin ntaman nkonon ek noup fatu naan. Mes nok oskeke te, sin niit atoin muinf es anpaek muti' nariim, antook ek sin bnapak reko. 6 En nai ma atoin muinif naan na'uab nuu sin im nak, “Hi kaisa' mimtau! Au kuhiin hi iim nuu maim Nai' Yesus, atoin Nasaret naan, he' sin na'maet naraar Je ek hau nehe. Hin et ai mae'. Hin nmoni nfain hen! Iim nuu hi mkius kiim bare he' sin natunu' Nai' Yesus Hin aon-tau'un. Tiit Ee mae' hen! 7 En nai ma hi mfain neu rab-raab! Mnao mitonon nai' Petrus sin im mak, Nai' Yesus anmoini nfain hen. Hin nnao nahunun ki nuu pah Galilea. Reko te nuu sin nateef nok Nai' Yesus ek naa, en he' nahuun te Hin natoon narair iin sin. En nai ma hi mfain neu!”a
8 Oros bifeen naan niit noup rumun naan te, sin naskeken. En nai ma sin naen anpoin. Sin nfainin rab-raab. Sin npeo'on raann ee te, sin natonon es-es aa mae', natuin sin namtau nmaeten.
Uisif Yesus nakriir' On nuu bi Maria he' na'ko Makdala b
(Naiꞌ Mateos 28:9-10; Naiꞌ Yohanis 20:11-18)
9 Ek neon krei kik-kiku te, Nai' Yesus nakriir' On nahuun nuu bi Maria he' na'ko ruan Makdala. Bi Maria he' naan, nahuun te Nai' Yesus anriu' napoina' niut reu'uf hiut na'ko hin tuan ee. 10 Oros bi Maria nateef narair nok Nai' Yesus, hin nfain ma natonon kamfaut iin he' nahuun te sin natuina' Nai' Yesus. Sin nabu-buan nok susut ma kaet fe', natuin sin namnau Nai' Yesus Hin 'maetn ee. 11 Oke te, bi Maria na'uab nok sin im nak, “Nansaa' am es hi msuus ma mkae fe'? Kaisa' amnanka'renet mteni, natuin Nai' Yesus anmoin nfain hen! Fe'e na, au kuteef kok Ne!”
Mes sin aar sin antoon je mnak, “Ho mupoi!”
Uisif Yesus nakriir' On nuu tuaf nua
(Naiꞌ Lukas 24:13-35)
12 Oke te, Nai' Yesus Hin katoup noni' tuaf nua nnao neu ruan es. Ek raann tnana' te, Nai' Yesus nakriir' On nuu sin, mes Hin na'bani'. Mes roo mae' en naan te, sin nahiin Je. 13 Oke te, sin nua sin anfainin ma natonon sin aon-biar iin im nak, “Hoe! Hi mneen fe'! Fe'e na hai miteef mok Nai' Yesus ek raann ee!”
Mes sin aon-biar iin ee antoinin am nak, “Heero! Hi kaisa' mipoi en naan!”
Uisif Yesus nakriir' On nuu Hin katoup noon' iin ee ok-oke'
(Naiꞌ Mateos 28:16-20; Naiꞌ Lukas 24:36-49; Naiꞌ Yohanis 20:19-23; Haefn ee sin Retaꞌ 1:6-8)
14 Oke te, Nai' Yesus nateef nok Hin katoup noni' tuaf bo'es em mese'. Oros naan, sin ntokon ma nbukaen. Hin na'binin sin im nak, “Hi naak-fautm ini! Atoni natoon narair ki mnak sin niit narair Kau neer sin matan fuar iin ee, mes hi mpirsai mae' ji! Hi mak, sin aar sin napoin! Oros ai, Au keirn Ok kuum. Namneo Au 'maet, mes oros ai, Au 'moni 'fain hen! Hi miit kiim meir hi maatm ii naan.
15 En nai ma oros ai hi ro nuu mnao puun miteef pah-piin ii, nuu mitonon aar he' mansian ee ok-oke' Au Rais Reko ai.c 16 Seku naa anpirsai nuu Kau, ma nasraan je, of Uisneno nsoi nafeitn ee, nuu hin natua nabar-baar nok Uisneno ek sonof neno tunan. Mes seku naa npirsai mae' te, of hin napein hukun, ma Uisneno nriu' napoi ne, oke te natua nabaar ek mone'. 17 Ma he' kapirsait nuu Kau, of sin nmoe'en rais sanmakat huma'-huma', nuu too mfaun ni nahinin nak sin kuasat naan na'uu ma na'baa' na'ko Uisneno. En he': sin bisa nriu' niut reu'uf iin neer Au kaank ii. Of Uisneno nmoe' sin nuu sin na'uab iin neer uab bian he' sin nahiin je mae'. 18 Oke te, karu sin nnaa' naan kaun reu'uf, ai' sin niun naan raso, sin nuu nsiraak kok aa mae'. Karu sin npooh ma n'oen iin neu kamenet, kamenet naan nareok.”
Uisif Yesus na'ait On nuu sonof neno tunan
(Naiꞌ Lukas 24:50-53; Haefn ee sin Retaꞌ 1:9-11)
19 Oros Hin na'uab narair nok Hin katoup noon' iin ee en naan te, Uisneno nait nasaeba' Nai' Yesus nuu sonof neno tunun. Ek naan, Hin anjair Uisneno Hin tua pirsa'i, nuu sin nua sin ntokon ma napreent iin bu'-bua'.d
20 Oke te, Hin katoup noon' iin ee nmoe' natuin Hin preent iin. Sin nnao neu bare-bare ma natonon aar he' too mfaun iin anmatoom nok Nai' Yesus Hin Rais Reko. Uisneno nfeen sin kuasat, nuu sin nmoe'en aar he' rais sanmakat he' Nai' Yesus natoon narair iin sin. En nai ma too mfaun iin npirsain nuu Nai' Yesus, natuin sin nahinin nak Rais Reko naan ro namneo.
[Nai' Markus natua'ab hin reta', natuin tuis kahunut bian e
9 Oros bifee teen win naan antean nai' Petrus sin, oke te sin natonon sin, nok atoin muinif he na'uab nok sin ek noup gwe. 10 Oke te, nai' Yesus naprenet hin katoup noon' iin ee, nuu nnao natoon hin Rais Reko ek bare-bare nbia' ek pah-piin ii ok-oke'. Rais Reko ai naruru ranan he' Uisneno anfee nuu nsoi nafetin mansian ok-oke na'ko sin sanat, nuu sin nmoinin nabar-baar nok Uisneno.
Rais Reko ai, namneo batuur-batuur. Es hin nabaar piut ma oke' niit aa mae', tua.]