Uisif Yesus natoon nain nak Uisneno Hin Uim Oenen Uuf ee of nuu natseer
(Naiꞌ Mateos 24:1-2; Naiꞌ Lukas 21:5-6)
13
Oke te, Nai' Yesus nok Hin katoup noon' iin ee nuu npoin na'kon Uim Oenen Uuf. Oros sin npoin, Hin katoup noni' tuaf es naruru Ne Uim Oenen Uuf ii, ma na'uab am nak, “Bait Ho mkius miit ai fe'! Umi ai reokn ii kah! Sin nbair hin faut ko'u gwin reok reu'uf!”2 Mes Nai' Yesus nataah ee mnak “Uim Oenen ai, ro namaas! Mes roo mae' te, sin of anpukai natsereb aar he' fatu he' ai.”
Neon kamsoupt iin sin taanr iin
(Naiꞌ Mateos 24:3-14; Naiꞌ Lukas 21:7-19)
3 Oke te, Nai' Yesus sin nnaon nuu toe'ef Saitun, ma ntokon nbaan iin an'airin Uisneno Hin Uim Oenen Uuf. Oke te, Hin katoup noni' tuaf haa, nemen nmesen ma na'uab nok Ne. Sin es he' nai' Petrus, nai' Yakobus, nai' Yohanis, ma nai' Anderias. 4 Sin nataan Ee mnak, “Ama'! Bait Ho mutoon mteni miit kai Ho uabam fe'e na. Reka' te hin oors ii ntea? Ma hin taanr iin, en he' mee?”
5 En nai ma Nai' Yesus nataah am nak, “Asar hi mpanat mirek-reko', nuu kaisa' napoi naan ki. 6 Natuin of anmui' tuaf namfau nemen ma npaas sin 'baasr iin im nak, ‘Au he' ai, Kristus, Atoni he' Uisneno nba'an naan je na'ko unu'.’ En nai ma sin napoi naan tuaf namfau. 7 Karu hi miit atoni anmakenen, ai' hi mneen uab ainin nak anmui' makenet et mee-mee, hi kaisa' mimtau. Natuin aar he' raisin naan ro nuu nboron, mes neon kamsoupt iin ntea mae' fe'. 8 Uuf es of anfeen ma nraban uuf es. Ma pah es of anmakeen nok pah es. Tainuuns ii anhasu' naheer ek mee-mee. Kamnaahs ii of ma'tane' msa'. Aar he' raisin he' ai anjairin tanar huumn ii en he' bifee makapu nnaeben meen mahoni'.
9 En nai ma hi aar ki ro nuu mpanat mirek-reko'! Sin of nemen ma nheek ki, oke te anheer neer ki nuu umi tfera' rais pirsait. Ma sin of anbius ki ek uim oenn ee hin naan ne. Ma sin of anfuut neer ki nuu aar he' kanaa' preent iin, natuin hi mituina' Kau. Mes raisin naan amsa', anjairin sraak nuu hi mitonon sin aar he' rasi anmatoom nok Kau. 10 Fun Uisneno Hin aanr iin ro nuu nnao ma natoon nahunun Au Rais Reko neu aar he' uuf-uuf ek pah-piin ii, oke te nai' neon kamsoupt ee antea. 11 Mimnau! Karu sin nfuut neer ki nuu umi tfera' rasi, hi kaisa' mimtau ma miteneb am mak, ‘Au nuu ku'uab kak saa'? Ai' au nuu kutaah kak saa'?’ Karu hin oors ii ntea, hi mi'uab mituina' haa saa' he' Uisneno Hin Smaann Kniin' oe natoon ki.a
12 Ek uum jes naann aa, karu tuaf es anpirsai nuu Kau, of hin ori'-tata sin es he' naimin ranan nuu nroor niis ne. Karu aan es anpirsai, of hin aamn ee es neirn on anroor niis ne. Ma karu hin ina'-ama anpirsai Kau, of sin aanr iin ee es anroor niis sin. 13 En nai ma of biar iin natoa'an niis ki, natuin hi mpirsai Kau. Mes seku naa es he' ntahan tar antea namsoup, Uisneno ro nsoi nafeitn ee.”b
Ampanat mirek-reko' natuin neon kamsoupt iin anpaumakan hen
(Naiꞌ Mateos 24:15-28; Naiꞌ Lukas 21:20-24)
14 Nai' Yesus na'uab ankono mnak, “Atoin kamaufiunt es of nuu neem neir kamreu'ut. Hin ma'ota' mae' nuu ntaam ek Uisneno Hin Uim Oenen Uuf, mes hin ntaam ma nhaek ek baer nuni naan, ma nhai'nisib bare naan. Es naan te, Uisneno nnao nasaina' bare naan. Karu hi miit rasi naan, hi mpanat mirek-reko'! (Seku naa es anrees he' ai te, ro nuu npaant on!) Naan anjair tanar nak neon suust iin anpaumaak re'-reu'uf. Karu hi miit en naan te, kabitin propinsi Yudea amfeen maen neu meu toe'f iin.c 15 Ma hi ro nuu maen rab-raab, nuu kaisa' amsiraak om. Karu tuaf mee npoi narair na'ko hin umi, kaisa' antama nfain nuu nait bare' bian anteni. 16 Ma tuaf mee ek rene, kaisa' ntebi nfain nuu nait tai-nusut anteni. Ro hin naen ankoon!d 17 Kasuus kaneis-neist ii, es he' bifee kakapu', ma bifee kasusu' ri'ana'. Fun sin bisa naen naan aa mae'. 18 En nai ma reko nneis hi m'oenen ma mtoit nuu rais kamreu'ut naan kaisa' neem nateef nok oros urun-ainin. 19 Fun oros naan, ma'nuuk ii kou' reu'uf! Anmurai na'ko Uisneno nmoe' pah-piin ii tar antea neno ai, tiit taan suust es kou'n ii en he' naan aa mae'. Ma atoni of niit anteni' susut huumn ii en he' naan aa mae'.e 20 Karu Uisneno na'paarn aa mae' neon suust iin naan, tiit taan tuaf nuu nmoin nkoon oo mae'. Mes natuin Uisneno nneer niis Hin aan piir iin, es naan te Hin na'paran neon suust iin naan.
21 Karu neon on naan antean te, hi of amneen biar iin na'uab iin am nak, ‘Amkius neu! Kristus es ai!’ Mes tuaf bian nak, ‘Kristus et nae!’ Mes nati' hi kaisa' amneen, oo! 22 Ma of anmui' atoni he' anpoi ma npaas hin baasn ee am nak, ‘Au he' ai, Kristus!’ Bian anteni' nak, ‘Au he' ai, Uisneno Hin mafefa kninu'.’ Sin of anmoe'en rais sanmakat huma'-huma' neer kuasat na'ko niut reu'uf nuu nputur-baerk iin. Sin naimin ranan huma'-huma' nuu karu reko te, sin nasekeb Uisneno Hiin ee. 23 Mes hi ro nuu mpanat mirek-reko'! Neon suust iin naan ntean aa mae' fe', mes Au kumnauba kain ki sin!”
Mansian Batuur-Batuur Hin mneemn ii
(Naiꞌ Mateos 24:29-31; Naiꞌ Lukas 21:25-28)
24 Oke te, Nai' Yesus antaur nteni Hin uabn ii nuu Hin katoup noon' ini mnak, “Karu neon suust iin ankonon te,
‘Maans ii of nmesi'noor,
ma fuun ii of nasab-saab amsa'.f
25 Fruun iin of bamoufun no'kon neen gwe tnaann ee,
ma aar he' kuasat kabitin neen gwe tnaann ee anrikraakn ok.’g
26 Oke te, nai' aar he' mansian of niit Kau, Mansian Batuur-Batuur he' ai. Of Au kuum ku'ko neen gwe tuunn ee. Ma aar he' too mfaun iin of niit Au kuasak, ma Au pinak ma krahak ok-oke'.h 27 Oke te, Au of a'reun Uisneno Hin kameupt iin na'kon sonof neno tunan, nuu nnao nabuaba' aar he' tuaf iin he' Au 'piri 'rair sin, na'kon pah-piin ii tuuk am tuuk, na'kon neon-saet tar antea neon-tees, na'kon ponain tar antea haa'-nua.”
Neon suust iin anjairin tanar nuu Uisif Yesus Hin kamneemn ii
(Naiꞌ Mateos 24:32-35; Naiꞌ Lukas 21:29-33)
28 Nai' Yesus antaur nteni Hin uabn ii mnak, “Au kait reta' ku'ko hau. Karu haa gwe hin noon ne nmurai namnautun, naan anjair tanar nak oros faor-nais ii anpaumaak hen. 29 En naan amsa', karu hi miit neon suust iin naan nemen, en he' saa' he' Au kutoon kurair ki, naan anjairin tanar nak anpaumaak nuu Au kuum hen. 30 Oros ai, amneen mirek-reko'! Na'ko batan he' ai, of anmui' tuaf he' anmoin fe', oros neon suust iin naan antean. 31 Maski neno tunan ma pah-piin ii namneuk, mes Au uabk ii of antahan nabar-baar.”
Uisif Yesus Hin kamneemn ii ma'nifa'
(Naiꞌ Mateos 24:36-44)
32 Nai' Yesus antaur nteni am nak, “Tiit tuaf es aa mae' es nahiin neno mee, ai' anreuk fauk te, of Au 'fain kuum. Uisneno Hin kameupt iin sonof neno tunan amsa' nahiinn aa mae'. Au Tuak ii msa', kuhini mae'. Suma Au Ama' anmees nahiin.i 33 Natuin rasi naan te, hi ro nuu mpanat mirek-reko', natuin hi mihiin maan aa mae' reka' te hin oors ii ntea.
34 Roo mae' te, Au 'nao kusaina' ki. Mes of Au 'fain kuum. Namnees en he' uim tuaf he' nnao npori hin uum je roo-roo. Hin nreun hin kameupt iin ee nuu npao hin uum je rek-reko. Ma hin nbaiti nfee sin es am es te nok hin mepu. Hin naprenet kapao' eno' nuu npanat narek-reko' tar antea hin nfain neem.j 35 Hi ro nuu mpao fai-manas amsa', natuin hi mihiin maan aa mae' oros mee te, uim tuaf naan of anfain neem. Nuu maans ii nmabe, oo, fai katnaans aa, oo, maans ii na'pupu', oo, ai' maans ii fe' nsae. Hi mihiin maan aa mae' nuu reka'. 36 Kais-kaisa' hin neem nok oskeke te, hin napein ki amtuup umfiin ma mikoon.
37 En nai ma saa' he' Au kutoon ki ai, Au kutoon neu bian sin imsa' am kak, ‘Hi ro nuu mpanat mirek-reko' nuu mseun Kau.”’
[Nok rasi naan te, Uisif Yesus natua'ab Hin uabn ii nok Hin katoup noon' iin ee ek toe'ef Saitun.]