Uisif Yesus nareta' anmatoom nok kameup poa'an anggur
(Naiꞌ Mateos 21:33-46; Naiꞌ Lukas 20:9-19)
12
Oke te, Nai' Yesus na'uab anteni' nok ka'naak rais pirsait Yahudi sin kanaakt iin ee, tunggur agama sin, ma mnais harat Yahudi sin. Hin nareta' am nak, “Anmui' atoon' es anraun nais fe'u nuu nroe anggur. Oke te, hin nbair poa'an naan npuun nateef. Ma hin nmoe' bak nuu ntoro' fua anggur hin oen ee. Hin nmoe' tobe msa'. Oke te, hin na'seba' poa'an naan nuu tuaf bian, nuu sin nmeup poa'an naan, nuu napein hin aafn ee te, anbaitin. Oke te, hin nnao ek pah teta'.a 2 Antea oros nuu nseu anggur hin fuan ee te, auf tuaf naan anreun hin kameuput tuaf es, nuu nnao nuu kameup poa' iin naan nuu nait hin sapaan ee. 3 Mes oros hin ntea te, kameup poa'n iin naan anheek je ma nbees gwe. Oke te, sin nreun gwe nuu nfain ruum-ruum.
4 Oke te, auf tuaf naan nreun nteni' hin kameupt es. Mes kameup poa'n iin antuut hin naakn ee tar papa'-papa'. Oke te, sin namaa je, ma nriu' na'aenb ee. 5 Oke te, auf tuaf naan nreun hin kameuput tuaf es enteni'. Mes sin anroor niis ne. Maski sin nmo'en en mee-mee msa', mes auf tuaf naan anreun hin kameupt iin piut. Mes kameup poa'n iin naan anbius bian, ma nroor niis bian. 6 Namuin te, auf tuaf ee hin kameupt ee aar tuaf mese'. Tua mese' naan, es he' hin aan moen mese' he' hin neer niis ne. Natuin tiit tteni ranan bian aa mae' hen, es nai' hin nreun hin aan mone naan. Hin nateenb am nak, ‘Karu au 'reek au aan moen ji neirn on, sin of antoup gwe rek-reko, ma sin of natniin ee msa'.’
7 En nai ma hin anreek hin aan moon je nuu nnao. Mes oros kameup poa'n iin niit ri'ana' naan neem te, sin na'uab iin im nak, ‘Hoe! Hi mkius miit fe'! Poa' tuaf ee nreek hin aan hoon' ee neirn on neem! Karu poa' tuaf ee nmaet te, hin he' ai of es nuu antoup aar he' baer pusaak iin. En nai ma iim nuu troor tiis ne, nuu hit tpaar tain aar he' kanan hin kmui'n ii!’ 8 Oke te, sin aar sin anheek je, ma anroor niis ne. Ma sin npori' hin aon kamaetes naan ek poa'n ee koitn ee. Reta' naan antua' ma namsoup en he' naan, tua.”
9 Oke te, Nai' Yesus nataan aar he' kaes kou' gwin naan am nak, “Natuin hi neerm iin ii te, of auf tuaf naan anmoe' saa' nuu kameup poa'n iin naan? Natuin Au neerk ii te, hin of neem ma nroor niis aar he' kameupt iin naan ok-oke'. Oke te, hin na'seba' poa' anggur naan nuu atoin sona'.
10 Hit aar kit atrees tiit ek Uisneno hin Suru Kninu' mnak,
‘Anmui' faat gwes he' nahuun te tuukn iin ii nait npoor' ee.
Mes oros ai, fatu naan anjair faut suikif nuu nii inif.
11 Uisneno es anpiir, ma natunu fatu naan.
En nai ma hit tiit tarair hin kareokn ii!”’b
12 Kaes ko'un naan nahinin nak, Nai' Yesus na'uab manpori' nuu sin neer reta' he' naan. Sin huma' mese' nok atoin kameup poa' anggur sin. Es naan te, sin nmurai naimin ranan nuu nheek Je. Mes sin namtausa' too mfaun iin he' anroimin nuu natniin Nai' Yesus Hin noon' iin ee. En nai ma sin nnao nasain Ee haa.
Atoni naimin ranan nuu nakreo Uisif Yesus neer rasi baen roi-bea
(Naiꞌ Mateos 22:15-22; Naiꞌ Lukas 20:20-26)
13 Oke te, atoin Yahudis sin kanaakt iin ee anreun tuaf fauk na'kon partei pirsait Farisi ma na'kon partei portiik Herodes nemen nuu nataan Nai' Yesus nuu namouf Oe. 14 Sin nemen ntean te, sin nataan Ee mnak, “Aam Tungguru! Hai aar kai mihiin mak, Ho neer maan ro kamneot, ma mputur-baerek miit aa mae'. Ho mkisu haa atoni hin neern ee. Ho mutoon munoon Uisneno Hin roimn ee, natuin Ho mpiir huumf aa mae'. En nai ma oros ai, hai nuu mitaan uab es. Tatuin hit atoron pirsait Yahudi te, of hit nuu tbaena' roi-bea teu uis ko'u pah Roma,c ai' mae'?”
15 Mes Nai' Yesus nahiin narair nak, sin naimin ranan nuu nkoop Oe, nuu nraban prenet pah Roma. En nai ma Nai' Yesus nataah neer haan ma'fena' am nak, “Nansaa' am es hi nuu mkopo' Kau meir rasi naan? Mikrira' miit Kau roit fua' es fe'!”
16 Oke te, sin nnona' roit fua' es nuu Nai' Yesus. Hin ntoup ma ntae roit naan. Oke te, Hin nataan sin im nak, “Seku naa hin huumn ii es he' ai? Seku naa kaann aa es he' matu'i he' ai?”
Sin nataahn am nak, “He' naan uis ko'u pah Roma.”
17 Oke te, Nai' Yesus na'uab am nak, “Karu en naan te, mfee nuu prenet saa' he' anjair preent ii hin hak. Ma mfee nuu Uisneno saa' he' anjair Uisneno Hin hak.”
Anneen Hin haann tahas en naan te, sin aar sin ansanmakan, natuin Hin uaban naan namneo. En nai ma sin bisa nakreo namouf Oe mae'.
Anmatoom nok kamaetes anmoini nfain, ma anmui' rais matsaos ek neno tunan, ai' mae'?
(Naiꞌ Mateos 22:23-33; Naiꞌ Lukas 20:27-40)
18 Anmui' partei es na'ko rais pirsait teta', he' sin nteek ee te nak, partei Saduki. Sin nanoon' iin im nak, atoin kamaetes bisa nmoin nfani mae'. Neot es te, anmui' tuaf Saduki fauk neem nuu nakreo' Nai' Yesus. Sin na'uab nok Nai' Yesus am nak,d 19 “Aam Tungguru! Ka'o Musa antui hit atoron harat es am nak: karu atoon es nmaet nasaina' hin fee je, ma nmu'i mae' anah, atoin kamaetes naan hin oirn ee ro nuu nsao bifee banu' naan, nuu reko te nahoni nfee sufuf-kau'uf nuu hin tata he' nmaet narair hen.e 20 Namneo, ka'o Musa nanoni' kit en he' naan. En nai ma hai nuu mitaan miit Ko, tua. Anmui' atoni hiut anma'oir-taatn iin. Moen 'uun oe, nsao nahuun, oke te hin nmaet, mes nahon'i aa mae'. 21 En nai ma hin oirn ee he' natuin ee ji nsao bifee banu' naan. Mes roo mae' te, hin nmaet ma nahon'i aa mae'. En naan amsa', hin oirn ee he' natuin ee ji, nsao bifee banu' naan, ma hin nmaete msa', mes nahon'i aa mae'. 22 Ma rasi naan anjair msa' nuu kamuint iin ii, tar antea kaheit suus gwe nmaete msa'. Oke te, banu' naan nmaet msa'.
23 En nai ma oros ai, hai nuu mitaan en nai: bifee naan nsao niit atoni hiut! Karu pah-piin ii namsoup ma Uisneno namoinib nafani' kamaets iin ii, of seku naa es anjair mone nuu bifee naan?”
24 Ma Nai' Yesus nataah sin im nak, “Karu hi mitaan en naan te, hi mihiin namneo mae' Uisneno Hin Suru Knin'u wi hin aafn ii. Ma hi mihini mae' Uisneno Hin kuasat amsa'. En nai ma hi msaan mirair!
25 Amneen! Ek sonof neno tunan tiit rais matsaos aa mae'. Aar he' kamaetes he' Uisneno namoinib nafani' sin, nmatsao ntein iin aa mae'. En naan amsa' Uisneno Hin kameupt iin na'kon sonof neno tunan nmatsaon uu mae'. 26 En nai ma anmatoom nok aar he' kamaetes nuu nmoni nfain, ai' mae', Au nuu kutoon ki en nai: of oni' hi fe' miteneb maan aa mae' reta' anmatoom nok ai he' nout hau uu' aan' es, mes nputu mae'. Reta' naan nak, Uisneno na'uab nuu ka'o Musa mnak, ‘Ho nai'-ka'o sin Uisneno es he' Au. Sin es he' ka'o Abraham, ka'o Isak, ma ka'o Yakob. Sin aar sin na'ruur iin ma na'besen piut nuu Kau, tar antea oros ai.’f 27 En nai te hit tahini mtak sin nai'-ka'o sin anmaet narairin oros kahunut. Mes, natuin Uisneno nak, Hin anjair sin Uisneon gwa fe', es naan te hit tahiin im tak, sin nmoinin nfainin. En nai ma maski sin anmaet narairin, mes sin nmoinin nfainin amsa'. Namneo, kamoint ii es he' na'ruri' ma na'bees nuu Uisneno. Mes atoin kamaets ii, mae' aika'? En nai ma karu hi mnaa' miheren noni' he' nak, kamaets iin nmoinin nfain na' mae', ro hi msaan batuur-batuur!”
Atneer Uisneno ma hit aok-bian amsa'
(Naiꞌ Mateos 22:34-40; Naiꞌ Lukas 10:25-28)
28 Oros naan, tunggur agama tuaf es neem ma nneen Nai' Yesus na'uab nok atoin Saduki sin. Tunggur agama naan nateneb nak, Nai' Yesus neem nataah sin taans ii ji reok reu'uf. Oke te, hin nataan Nai' Yesus am nak, “Ama'! Au nuu kutaan Ko en nai: hit atoron harat ma prenet rais pirsait ii namfau reu'uf. Na'ko aar he' kanan prenet ka'o Musa, prenet mee es he' pentiing nneis ji?”
29 Nai' Yesus nataah am nak, “Prenet he' pentiing nneis ek Uisneno Hin Suur Kniin uwi nak en nai:
‘Aar he' kanan atoin Israel ki, amneen mirek-reko'!
Uisneno ro hit Aam uuf ma Hau uuf,
ma hit ro nuu ta'naakb ok ek Hin, ta'iinb ok ek Hin, ma ta'aamb ok ek Hin!
Uisif bian, nakaf bian ruumn am sona'. Ro Hin nmees Kuun!
30 En nai ma hi ro nuu mneer Ee anneis na'ko' aar he' bian sin.
Es naan te, hi ro nuu mimnau Gwe piut-piut,
mihiin Je batuur-batuur,
ma mmeup ma'tane' nuu mituin Hin roimn ee.’g
31 Ma prenet noon nua' ii nak:
‘Ho ro nuu mneer ho aom-biam, namnees en he' ho mneer ho tuam aan kuum.’
Prenet noon nua' iin he' ai, es pentiing nneis. Nmu'i mae' prenet bian he' pentiing anneis na'ko preen noon nua' iin he' ai.”h
32 Oke te, tunggur agama naan na'uab anteni nuu Nai' Yesus am nak, “Tebe! He' Ho mu'uab ee naan, namneo. Uisneno anjair hit Naakf aa, ma tiit aa mae' uisneon teta'.i 33 Hit ro nuu tneerr Ee anneis na'ko aar he' kanan saa'-saa', ma tamnau Gwe piut, tahiin Je, ma tmeup ma'tane' nuu tatuin Hin roimn ee. Ma hit ro nuu tneer hit aok-bian ee huma mese' en he' hit tneer hit aok ii. Nok ranan naan, te nai Uisneno anmairiin inneis, na'ko hit arahaa nuu tatuin atoron rais pirsait inmees. Naan reko nneis na'ko hit arahaa nuu troor mui'it nuu nfee turu mnotu', ai' atfee bare' bian nuu Ne.”j
34 Anneen hin haann tahas naan te, Nai' Yesus nateneb nak tunggur agama ai nahiin Hin sairt ii rek-reko. En nai ma Nai' Yesus nak, “Aar kreo' te, ho noi mjair Uisneno Hiin jia.”
Oke te, nmu'i mae' tuaf es anteni' nroim nuu nataan Nai' Yesus, fun tiit aa mae' es na'bei' Je te.k
Kristus naan, uisif nai' Daut hin suufn aa, mes Hin anjair nai' Daut hin Naakf aa msa'
(Naiꞌ Mateos 22:41-46; Naiꞌ Lukas 20:41-44)
35 Oke te, Nai' Yesus nanoni' too mfaun iin ek Uisneno Hin Uim Oenen Uuf. Hin nataan sin im nak, “Natuin hi teenb ii te, en mee? Tunggur agama sin nanoon' iin im nak, Kristus he' naan es he' Tuaf he' Uisneno nreek nain Je na'ko afin uun' uwi. Ma sin nateenb iin im nak, Hin suma sufuf na'ko uisif nai' Daut. Mes teneb naan nanookb aa mae'. 36 Natuin afin unu' Uisneno Hin Smaann Kninu' anpaek nai' Daut nuu ntui mnak,
‘Uisneno natoon narair au ka'nakat amnak,
“Uum nuu mtook meu baer kamasat et Au 'nimik reko.
Au of a'moe' aar he' ho musus iin, tar sin na'ruur iin nuu ko.”’l
37a Na'ko naan te, hit tahiin tak uisif nai' Daut anteek Kristus nak ‘Kanakat’. Hin moufn ii nak, karu sin nteek ee nak Kristus naan suma uisif nai' Daut hin sufun-kau'un, naan nanookb aa mae' fe'. Fun Hin anjair uisif nai' Daut hin Ka'naakt aa msa'.”
Uisif Yesus nak, ampaant om na'ko tunggur agama sin putur-baerk ii
(Naiꞌ Mateos 23:1-36; Naiꞌ Lukas 20:45-47)
37b Oros Nai' Yesus na'uab en naan te, too mfaun ee anroimin nuu nneen Ee. 38 Oke te, Hin na'uab anteni nuu sin im nak, “Hi ro nuu mpaant om na'ko tunggur agama sin. Sin nroimin nuu paisiar neer sin bauru mnaan win, nuu nnao nateef nok too mfaun ee, nuu sin niit sin im nak, ‘Hoe! Sin ro kaes ko'u batuur!’ 39 Karu sin antaman ek uim oenen, ai' nokon ek feset, sin naimin kanreer kareokot nuu too mfaun iin niit sin. 40 Mes mpaant om! Fun sin he' naan nputur-baerek bifee baan win, nuu nasiik ma ntoup naan sin uimn ee. Mes ek too mfaun ee sin maatr iin ee, sin na'koro' sin 'moe reu'uf iin naan nok oenen mnan-mnanu'. Sin nroimin nuu biar iin nahinin nak sin neer iin kniin' win. Mes Uisneno of anfee kasat ma'fena' nuu sin.”
Bifee banu' kama'mui'it na'turu' roi kolekte nneis-neis
(Naiꞌ Lukas 21:1-4)
41 Oke te, Nai' Yesus antook nbani' nuu peti 'turu' ek Uisneno Hin Uim Oenen Uuf. Hin niit tuaf kamfaun nemen ma ntao sin roi kolekte ek peti 'turu' naan ee. Hin niit atoin kamui'it sin nemen ma nataam sin roit ko'u ek naan. 42 Oke te, bifee banu' kama'mu'it tuaf es neem ma n'oenen nok. Hin nataam roit sen nua ek peti naan. Roit naan hin oosn ii aan'-ana'.
43 En nai ma Nai' Yesus annaeper Hin katoup noon' iin ee ma na'uab nuu sin im nak, “Hi mkius mirek-reko' bifee banu' kama'mui'it ai. Hin nataam roit suma sen nua haa, mes hin nfee nneis na'ko aar he' kanan kafeet iin. 44 Sin aar sin anfeen kolekte na'ko roi nesif. Mes bifee banu' ai, anfee nain hin roitin ok-oke' nuu Uisneno.”