Uisif Yesus sin antaman neu Yerusalem, ma too mfaun iin anboi's Ee en he' kaes ko'u
(Naiꞌ Mateos 21:1-11; Naiꞌ Lukas 19:28-40; Naiꞌ Yohanis 12:12-19)
11
Oros sin nhaumaak kota Yerusalem, sin ntean ruan Betfage ma Betania ek toe'ef Saitun bnapan bian ee.a Ek bare naan, Nai' Yesus sin nasnaasn aa kreo'. Oke te, Hin nreun Hin katoup noon' iin ee tuaf nua nuu nnao nahunun. 2 Hin nba'an sin im nak, “Hi nua ki mnao mihuun meu ruan he' nae. Oros hi mtaam, of hi miit bjakaes keledai tiip' owes, he' nsaen ee mae' fe', mafutu' ek bare naan. Hi mnao mseif hin tain je ma mheer meir je neem. 3 Karu atoni' nataan ki mnak, ‘Nansaa' am es hi mheer meir bjakaes keledai naan?’ En naan te, hi mitaah am mak, ‘Hai Usi' nuu npaek je. Hin npaek narair je te, nai' hai meir mifaan ee neem, tua.”’ 4 Oke te, tuaf nua' iin naan sin nnaon, ma sin niit bjakaes keledai tipu' naan mafutu' ek uum jes hin eonn aa, ek raann ee niinn ee. Sin nseif je, nuu nheer neer je nnao. 5 Mes atoni fauk he' anhaeken ek naan nataan sin im nak, “Hoe! Ba'e! Nansaa' am es hi mseif atoni hin bjakase'?”
6 Sin natahan am nak, “Hai Usi' nuu npaak je. Hin npaek narair je te, hai meir mifaan ee neem, tua.” En nai ma tuaf iin he' naan, anfeen sin mainuan nuu nheer neer bjakase' naan. 7 Sin nheer neer je nnao ntean Nai' Yesus. Oke te, sin na'peni' bjakase' naan npaek tai-muti', ma Nai' Yesus ansae.
8 Oros sin noi ntaman nuu kota, too mfaun iin nait sin baur koitif ma sin pou'k iin, oke te na'been sin ek raann ee. Tuaf bian ankoeten pet-no'ob ek raann ee niinn ee, ma na'been sin ek raann ee tnaann ee. Nok moe'et naan, sin nuu natoon ma nakriir' iin nak sin nseun Uisif Yesus nok hormaat, nahuum en he' sin nseun kaes ko'u. 9 Anmui' tuaf bian nnao nahunun ek Nai' Yesus Hin maatn ee, ma bian namuinin. Sin nmairiin ma nsakaann am nak,
“Hosana! Hai mpuiris ma mboi'is Uisneno!c
Uisneno nfee teutus-kathoen nuu kamnemet he' neem neer Uisneno Hin kaann ii,
natuin Uisneno es nreun naraar Je!d
10 Hosana! Hai mpuiris ma mboi'is Uisneno!
Natuin Uisneno nuu nahake' nafani' uisif nai' Daut hin prenet!
Hosana! Hai mpuiris ma mboi'is Uisneno!
Natuin Uisneno naprenet nain et neno ka'raat reu'uf!”
11 Oros sin ntean kota naann ee, Nai' Yesus sin nnao ntaman ek Uisneno Hin Uim Oenen Uuf ee hin kintal. Ma Nai' Yesus ankius npuun nateef bare naan. Mes, natuin oors ii nanookb aa mae', es naan te sin ntebi nfainin neu ruan Betania.
Uisif Yesus naprenet hau roet uu' gwes nuu kaisa' nafua nteni'
(Naiꞌ Mateos 21:18-19)
12 Kiuk ana' te, sin npoin na'kon Betania nuu ntama nfainin neu kota Yerusalem. Ek raann ee tnaann ee, Nai' Yesus annaebn aat namnaah. 13 Hin niit hau roet uu' gwes et raann ee niinn ee. Bijasa sin naah hin fuan ee.e En nai ma Nai' Yesus anhaumaak hau roet naan nuu nkius niit, kar-karu hin nafua, ai' mae'. Mes oros Hin ntea hau roet naan hin uun ee te, Hin niit aa mae' saa'-saa', natuin hau naan hin oors ee ntea nuu nafua mae' fe'. Hin fe' nuu nanoo'. 14 Oke te, Nai' Yesus na'uab nuu hau roet naan am nak, “Natuin ho mufua mae' meu Kau, es naan te anmurai na'ko oros ai, ho mufua mtein'i aa mae'. Of tiit tuaf es nuu naah nteni ho fuam aan aa mae'.”
Hin katoup noon' iin ee anneen Hin uaban naan ma'fena' msa'.
Uisif Yesus antaam ek Uisneno hin Uim Oenen Uuf, ma naiti npori' baer' soos' iin ek naan
(Naiꞌ Mateos 21:12-17; Naiꞌ Lukas 19:45-48; Naiꞌ Yohanis 2:13-22)
15 Oke te, sin nnao nkonon tar antean Yerusalem, ma Nai' Yesus antaam anteni ek Uisneno hin Uim Oenen Uuf. Ek Uim Oenen naan hin kintal, too mfaun iin anmoe'en masa' ma na'soos iin koor kefi, he' bijaas sin npaek sin nuu nfeen fua-'turu'. Oros Nai' Yesus niit sin en naan te, Hin nnao ma nriu' napoina' sin. Hin nbius nsisae'en mei nggwin he' sin npaek sin nuu ntuukr iin roit, ma nbius nsiksakan hau been-piis' iin he' sin npaek sin nuu na'soos' iin koro. 16 Hin ntaar too mfaun ee nuu sin kaisa' neer iin bare' ma nnao nrefin nteni npeo'on Uim Oenen naan hin kintal. 17 Oke te, Hin nanoni' sin im nak, “Hi mihiin mirair saa'-saa' he' Uisneno Hin mafefa kninu' ntui naan je mnak, ‘Au kufena' Au Uum ji, nuu tuaf-tuaf na'ko aar he' pah ma uuf nemen nuu n'oen iin ek naa.’ Mes hi mmoe' Umi naan anjair baer buat nuu kabaakt iin!”f
18 Oros ka'naak rais pirsait Yahudi sin kanaakt iin ma tunggur agama sin annenen nak Nai' Yesus anmoe' rasi naan te, sin natoa'an ma neuk niisr iin ee. Oke te, sin naimin ranan nuu nroor niis Ne. Mes sin namtaus Ee msa', natuin too mfaun iin nroim niis Hin noon' iin ee.
19 Ma oros maans ii nmaeb te, Nai' Yesus sin anpoin na'ko kota Yerusalem, ma nnao nfain iin nuu ntupun ek ruan Betania.
Karu hit tpirsai batuur-batuur teu Uisneno, Hin of anfee saa'-saa' he' hit ttoot je
(Naiꞌ Mateos 21:20-22)
20-21 Kik-kiku te, sin nnao nfain iin neu Yerusalem. Ek raan tnana', sin nnao npeo'on hau roet he' afin naa Nai' Yesus na'uab nuu ne. Hin katoup noon' iin ee ansanmakan, natuina' hau roet naan nmaet narair tar hin baa'r iin ee msa' anmeot nmaeten. Oke te, nai' Petrus namnau niit Nai' Yesus Hin uaban afin naa. En nai ma, hin na'uab am nak, “Ama'! Amkius miit! Hau roet he' afin naa Ama' msuupn ee ji, nmaet narair hen!”
22 En nai ma Nai' Yesus nataah am nak, “Namneo! Ro hi nuu mpirsai Uisneno en he' naan. 23 Karu hi mpirsai batuur-batuur, hi of omreun toe'f es nuu nanani' en tasi. Oke te, Uisneno of nanani' toe'ef naan, asar hi kaisa' mpirsai mi'ba'-bae'! Hi ro nuu mpirsai batuur-batuur meu Uisneno.g 24 Kaisa' amnika'! Asar hi mpirsai batuur-batuur mak Uisneno bisa nfee saa'-saa' he' hi mtoit je, Hin of anfee ki en naan. 25 Mes karu m'oenen, ma mmui' neer ma'fena' mok es fe' te, hi ro nuu mnao nuu mmarame' mok ne. Nok ranan naan te, nai' hi Ama' kabiit sonof neno tunan nsaok nain hi saant iin ee. 26 [Mes karu na'ko ki, anmui' neer menes, ma mromi mae' nuu msaok hi aom-bian hin sanat, ro batuur hi Ama' kabit sonof neno tunan nsaok hi saant iin ee mae' amsa'.]”h i
Sin nmaktaan iin anmatoom nok Uisif Yesus hin hak
(Naiꞌ Mateos 21:23-27; Naiꞌ Lukas 20:1-8)
27 Oke te, sin nnao nkonon. Oros sin ntean Yerusalem, sin ntaman nteni ek Uisneno Hin Uim Oenen Uuf. Oros sin ntaman ntean hin kintal, ka'naak rais pirsait Yahudi sin kanaakt iin, tunggur agama sin, ma mnais harat Yahudi sin nemen, 28 ma nataan Nai' Yesus am nak, “Afin naa seku naa es anreun ko nuu uum meir taisibu ek bare ai? Seku naa es he' anfee ko hak!?”
29 Nai' Yesus nahiin nak sin naimin ranan nuu namouf Oe. Oke te, Hin nataah sin im nak, “Au nuu kutaan ki msa'. Hi mitaah Kau fe', nuu nai Au kutaah ki. 30 Au nuu kutaan ki en nai: hi aar ki mihiin nai' Yohanis kasrainit nana, oo? Seku naa es anreek ee nuu nasrain? Uisneno oo, ai' mansian?”
31 En nai ma sin nateenb iin nuu-mneem, ma na'uab iin im nak, “Amoo! Hit tarair beti'! Karu hit tataah am tak, ‘Uisneno es anreun gwe te,’ Hin of nataah kiit im nak, ‘Karu en naan te, nuu saa' am es hi mpirsai nai' Yohanis aa mae'!’ 32 Mes karu hit tataah am tak, ‘Mansian ii es anreun gwe,’ of aar he' too mfaun iin taisiubun, natuin sin npirsain am nak, nai' Yohanis he' naan Uisneno Hin mafefa kninu'.”
33 En nai ma sin nataahn am nak, “Ma neu'! Hai mihini mae', tua.”
Oke te, Nai' Yesus nataah sin im nak, “Naa! Karu en naan te, Au kutoon ki mae' msa', seku naa es anreun Kau.”