Atoin Farisi sin nuu namofu Uisif Yesus anpaek rais matsaos ma manpori'
(Naiꞌ Mateos 19:1-12; Naiꞌ Lukas 16:18)
10
Oke te, Nai' Yesus sin nnao npuun nateef ek propinsi Yudea, ma ek bare bian anteni et noe Yarden hin painn ee, antoom neon-saet. Ek mee-mee, too mfaun iin nemen ma naub naan Ee. Ma Nai' Yesus nanoni' sin en he' bijasa.2 Atoin Farisi tuaf fauk nemen nuu namouf Oe. Sin nataan am nak, “Natuin hit atoron rais pirsait, atoin kamatsaos bisa npori hin fee je, ai' mae'?”
3 Mes Nai' Yesus nataah sin im nak, “Mimnau miit fe'! Atoron anmatoom nok matsaos fee-mone he' ka'o Musa nba'an naan je nuu kit, nak en mee?”
4 Sin nataahn am nak, “Ka'o Musa hin atoorn ii nak, atoni' bisa npori hin fee je, mes ro nuu ntui suur manpori' nahuun ma nnona' surut naan nuu hin fee je.”a
5 Mes Nai' Yesus nataah sin im nak, “Amneen Kau fe'! Ka'o Musa antui en naan, natuin hi mnaak-faut bainesi'! 6 Hi kaisa' mnika' reta' un-unu' oros Uisneno anmoe' neno tunan ma pah-pinan! Fun matu'i et Suru Kninu' mnak,
‘Uisneno nmoe' mansian iin, atoni' ma bifee.b
7 Es naan te, atoon es ro nuu nnao nasaina' hin ina' ma hin ama',
nuu nmoin nabuan neref mese' ma kansaof mese' nok hin fee je,
8 nuu nati' sin nua sin anjair mese'.’c
9 Karu Uisneno neirn On nameseb sin, mansian ii bisa nbaitis sin ii mae'!”
10 Oke te, Nai' Yesus nok Hin katoup noon' iin ee antaman nmesen ek uim jes. Ek naan, sin nataan Nai' Yesus anmatoom nok Hin noni' he' fe'e na.
11 Nai' Yesus nataah sin im nak, “Seku naa npori hin fee je, ma nsao nteni' bifee teta', naan antaam rais makaekt amsa'! 12 En naan amsa' bifee ji! Karu hin npori' hin moon je, oke te hin nsao nteni' atoin teta', naan antaam rais makaekt amsa'!”d
Uisif Yesus na'uab ma nfee teutus nuu ri'aan' iin ee
(Naiꞌ Mateos 19:13-15; Naiꞌ Lukas 18:15-17)
13 Ek oors es, sin neer sin aanr iin ee nemen nuu Nai' Yesus, ma ntoitin nuu Hin na'uab anfeen sin teutus. Mes Nai' Yesus Hin katoup noon' iin ee na'eka' sin.
14 Oros Nai' Yesus niit rasi naan te, Hin natoa'an Hin katoup noon' iin ee. Hin na'uab am nak, “Mifeti' ri'aan' iin naan nuu nemen ntean Kau! Kaisa' mi'eka' sin! Natuin atoni' he' nahuumb on, en he' sin he' naan, es he' anjair Uisneno Hiin na. 15 Mimnau mirek-reko'! Seku naa es anroim nuu neem anhaumaak Uisneno, sin ro nuu namnau niis Ne, en he' ri'aan' iin ee namnau sin ina'-ama. Karu en naan aa mae' te, na'bei' mae' nuu tteek sin tak Uisneno Hiin na.”e 16 Oke te, Nai' Yesus anhoo naan ri'aan iin naan, ma ntao Hin niimn ee nuu sin mese'-mese' ma na'uab anfeen sin teutus.
Atoin kamui'it naim ranan nuu nmoin nabar-baar nok Uisneno
(Naiꞌ Mateos 19:16-30; Naiꞌ Lukas 18:18-30)
17 Oros Nai' Yesus sin nuu nnao nkonon, atoin kamui't es naen neem nuu nateef nok Ne. Hin na'ruri' ek Nai' Yesus Hin maatn ee, ma nataan Ee mnak, “Aam tungguru he' au 'hormaat kain Ko! Au nuu kutaan Ko kreo'. En nai, Ama'. Of au nuu 'moe en mee, nuu nati' au bisa 'taam keu sonof neno tunan, nuu 'moin kubar-baar kok Uisneno?”
18 Nai' Yesus nataah am nak, “Nansaa' am es ho mteek Kau mak, ‘he' au 'hormaat kain Ko’? Tiit es aa mae' he' nuu thormaat te, aar Uisneno nmees Kuun. 19 Ho muhiin murair prenet kahunut na'ko Uisneno nak,
‘Kaisa' amroor atoni';
kaisa' ammakaek;
kaisa' mubaak;
kaisa' amsaksii mupoi;
kaisa' amputur-baerek atoni' hin bare';
ma mhormaat meu ho ina' ma ho ama'.”’f
20 Atoni' naan nataah am nak, “Namneo, Aam Tungguru! Au kunaoba' aar he' kanan atoron he naan 'murai ku'ko oros au fe' muinif kau, tua.”
21 Nai' Yesus ankasian atoni' naan, oke te Hin nak, “Namneo! Mes anmui' raas jes nteni'. Ho mfain neu ma mu'sosa' main ho kmui'm iin ok-oke'. Oke te, meir roit iin he' ho mupein sin naan ma mnao nuu mbait main sin meu kama'mui't iin ee. Oke te, ho mtebi mfain uum neu nuu mutuina' Kau. Uisneno of anseun-bainin ko npaek kmui'if neno tunan.”
22 Oros hin nneen Nai' Yesus Hin uaban naan te, hin neern ii krati'-krati'. Ma hin nfain nok neer suust ii ma'tane', natuin atoni' he' naan, kamui'it batuur-batuur.
23 Ma Nai' Yesus ankius npuun nateef ma na'uab nuu Hin katoup noon' iin ee am nak, “Amneen, oo! Kamui't ii nuu haa te nai ntaam nuu sonof neno tunan!”
24 Anneen rasi naan te, Hin katoup noon' iin ee nmukeukun. Ma Nai' Yesus na'uab anteni am nak, “Amneen mirek-reko'! Nuu tjair Uisneno Hiin na, suust ii aan'-aan' aa mae'! Kaisa' miteneb am mak ma'kaf-kafa'. 25 Atoin kamui't es nuu ntaam nuu sonof neno tunan ma anjair Uisneno Hin aann aa te, hin suust ii huma' mese' en he' bjakaes unta nuu ntaam en hin ofok, nnao ntaam anpeo' aent es hin koonn aa.”
26 Nai' Yesus Hin uaban naan anmoe' sin ntaka'naan iin anteni. Ma sin nmaktaan iin im nak, “Karu namneo en naan te, seku naa es he' bisa napein 'hoinis nabar-baar?”
27 Nai' Yesus ankius sin mese'-mese', oke te na'uab am nak, “Natuin mahinif ma manoef mansian ii te, of anjair saa' es aa mae'. Mes mimnau, natuin mahinif ma manoef Uisneno, tiit saa' es aa mae', he' nuu njari mae'.”
28 Oke te, nai' Petrus anmurai na'uab am nak, “Ama'! Hai misaina' main aar he' kanan saa'-saa' nuu mituina' Ko. En nai ma hai of mipein saa' naa, tua?”
29-30 Nai' Yesus nataah am nak, “Au nuu kutoon ki en nai: seku naa es natuina' Kau, ma nnao nasaina' hin ina'-ama, hin ori'-tata, hin aanr iin ee, hin rene, hin mepu, nok aar he' hin uum je naann ee, nuu nnao natoon Uisneno Hin Rais Reko ek mee-mee, hin of antoup nafani' no nautn es. Aar he' saa'-saa' he' hin nasaina' narair sin, of napein nafani' sin anneis na'ko naan. Hin of napein ha'mui'it amsa', natuin hin natuina' Kau. Mes oros pah-piin ii namsoupu te, hin of anmoin nabar-baar nok Uisneno. Rasi he' naan, es he' anjair seun baran neu ne! 31 Mimnau, joo! Natuin Uisneno Hin teenb ee te, seku naa na'naeb hin tuan ii te, of na'paarn ee. Mes seku naa na'paran hin tuan ii te, of na'naeb ee.”g
Ai haan tonos nfain era' teun anmatoom nok Uisif Yesus Hin 'maetn ee
(Naiꞌ Mateos 20:17-19; Naiꞌ Lukas 18:31-34)
32 Oros naan, Nai' Yesus sin nnao neu Yerusalem. Ek pukun he' naan, Nai' Yesus es nahuun. Ma Hin katoup noon' iin ee nok tuaf bian nteni ek Hin koitn ee. Sin namnau Hin uaban neon gwes ii he' nak, biar iin of na'maat Je ek Yerusalem. En nai ma sin nmukeukun ma namtaun amsa'. Anneen en naan te, Nai' Yesus noe'en naan Hin katoup noon' iin ee anmesen, ma na'uab anteni saa' he' biar iin of anmoo' Je ek Yerusalem. 33 Hin na'uab am nak, “Hi mneen, oo! Oros ai, hit tnao en Yerusalem. Au he' ai, Mansian Batuur-Batuur. Mes ek Yerusalem sin of na'sosa' Kau nuu ka'naak rais pirsait Yahudi sin kanaakt iin ee ma tunggur agama sin. Oke te, sin of anhukun niis Kau. Ma sin nnona' Kau nuu tua sona' he' nahiin Uisneno mae'. 34 Oke te, sin nakan Kau reu'uf-reu'uf. Sin naniun Kau. Sin nbius napapa' Au aok ii oke'. Oke te, sin nroor niis Kau. Namneo, Au 'maet. Mes feunn aa te, Au 'moni 'fain.”h
Nai' Yakobus ma nai' Yohanis antoitin nuu anjair kaes ko'u
(Naiꞌ Mateos 20:20-28)
35 Oke te, Nai' Sebedius hin aanr iin ee, es he' nai' Yakobus ma nai' Yohanis, sin nemen nuu Nai' Yesus. Sin ntoitin am nak, “Aam Tungguru! Hai nuu mi'uab maan kreo', tua!”
36 Nai' Yesus nataan sin im nak, “Hi nuu mi'uab saa'?”
37 Sin natahan am nak, “En nai, Ama'! Nati' reka' Ho mtook ma mnaa' prenet ek Ho pinam ma kraham te, hai mtoit nuu Ho mutoko' kai, tuaf es ek Ho nimim rii, ma tuaf es anteni' ek Ho nimim reko, nuu hai mnaa' mok prenet amsa'.”
38 Nai' Yesus nataah sin im nak, “Saa' he' hi mtoot je ji, hi nua ki mihiin maan aa mae'. Au he' ai, of kupein suust am naanka'renet namfau. En nai ma, en mee? Ek hi teenb ii te, hi mak, hi mi'be'i nuu mnaeben suust am naanka'renet tar ammaet mok Kau, oo?”i
39 Sin natahan am nak, “Hai mibei', tua!”
Nai' Yesus na'uab anteni sin im nak, “Namneo. Hi of amnaeben suust am naanka'renet en he' Au msa'. 40 Mes seku naa es he' antook ek Au nimik rii ai' reko, Au 'seor Kok aa mae' nbia ek rasi naan. Natuin rasi naan, Uisneno es nuu nafeer. Ma Hin nafeer narair tuaf-tuaf he' nuu ntook ek bare naan.”
41 Oros katoup noni' bian sin annenen nai' Yakobus ma nai' Yohanis sin haann toitis en naan te, sin natoa'an re'-reu'uf. 42 Oke te, Nai' Yesus noe'en sin ok-oke' ma na'uab am nak, “En nai! Hi mihiin mirair hen aa, oo, ai' mae'? Kaes ko'u he' nna'a aprenet, sin es he' nati' nuu anha'mui' too gwi. Tar antea too gui nakbeer uin reko mae'. Ma nakaf-nakaf ek pah-pah he' nahini mae' Uisneno, sin nanaoba' atoron ma prenet huma'-huma', tar sin too gwi bisa nait naakr iin ee mae'. 43 Mes na'bei nuu hi nmoe' en he' naan aa mae'! Seku naa na'ko ki anroim nuu anjair kaes ko'u, hin ro nuu anjair en he' ka'baut nuu ntuthae hin aon-bian ee.j 44 Ma seku naa es he' anroim nuu anjair ka'nakat, hin ro nuu nmoe' hin tuan ii en he' ate ma nmeup neno-neno en he' naan.k 45 Fun Au, Mansian Batuur-Batuur, es he' ai. Au kuum ii nuu atoni ntuthae Kau mae', mes Au kuum nuu 'tuthae too mfaun iin. Au kuum nuu 'nona' Au 'moink ii 'teme-'teme, nuu 'soi kaann too mfaun iin na'ko sin sanat ma penu sin.”
Uisif Yesus nareko' atoin kaforot
(Naiꞌ Mateos 20:29-34; Naiꞌ Lukas 18:35-43)
46 Nai' Yesus nok Hin katoup noon' iin ee ma too mfaun iin neem antean kota Yeriko. Oros sin nuu nnao nkonon, anmui' atoin kaforot tuaf es antook ma ntoit piut-piut ek raann ee niinn ee. Hin kaann ee, nai' Bartimeus, nai' Timeus hin aann aa. 47 Oros hin nneen nak, kakonot naan Nai' Yesus na'ko Nasaret te, hin nhunun naher-heer am nak, “Yesus! Ho he' naan, sufuf-kau'uf na'ko nai' Daut! Hai mpao Ko roo-roo hen, tua! Amturun maan kau, tua!”
48 Anneen hin haann ee te, too mfaun iin nakain ee mnak, “Hoe! Mumninu'!”
Mes hin nhunun naheer anteni am nak, “Yesus! Nai' Daut hin sufa'-kau'uf! Mumnau maan kau, tua!”
49 Ma Nai' Yesus anhaek ma nak, “Hi mok ne neem!”
Oke te, sin nnao neu ne mnak, “Noka' neu! Ama Tungguru noe'en ko. Uum neu!”
50 Anneen en naan te, nai' Bartimeus npori nain hin tai nuust ii, oke te anfeen ma nnao rab-raab nuu nateef nok Nai' Yesus.
51 Oke te, Nai' Yesus nataan ee mnak, “Ho mroim saa' nuu Au 'moe je neu ko?”
Atoin kaforot naan nataah am nak, “Koi, Ama'! Au 'toits ii es he' karu reko te, au kiit, tua.”
52 Nai' Yesus na'uab anteni nak, “Natuin ho mpirsai murair mak, Au bisa kureko' ko, es naan te oros ai ho mureok neu! Amkoen om amfain neu!”
Oke te, nai' Bartimeus hin matan kafoort iin naan nareok nain iin. En nai ma hin nok nnao nnaat Nai' Yesus.