2 Neno nee nkoon te, Nai' Yesus antoit nai' Petrus, nai' Yakobus, ma nai' Yohanis, nuu nnao nsaen bu'-bua' en toe' mnanu' es, he' nmu'i mae' tuaf. Oros sin antean hin tuunn ee te, sin nkius Nai' Yesus na'bani'. 3 Ma Hin baer-paak je anjair muti' ma nariim. Nmu'i mae' bare' ek pah-pinin he' ai, muitn ii en he' naan. 4 Nok oskeke, sin niit Nai' Yesus na'uab nok ka'o Elia ma ka'o Musa.

5-6 Nai' Petrus sin namtaun nmaeten. En nai ma Nai' Petrus antaka'nana', tar hin na'uab tafi'-tafi'. Oke te, hin nak Nai' Yesus am nak, “Ama'! Hit ek ai te, nai' reko nneis. Reko te, hai mmoe' ropo teun. Es nuu Ko, tua. Es nuu ka'o Musa, ma es atfee je nuu ka'o Elia.”

7 Oke te, noop je ansaun neem ma n'aum naan sin. En nai ma sin anneen haanf es anpoi neem na'ko nope naan am nak, “Amneen neu, joo! Nai' Yesus he' ai, Au Aan nera'. Hi mneen ma mituin Ee rek-reko!”^a

8 Oros nai' Petrus sin nneen niit hanaf naan, sin nkiusun npuun nateef, mes nok oskeke sin niit anteni' mae' tua nua' iin naan. Suma Nai' Yesus anmees.

9 Oke te, Nai' Yesus nok Hin katoup noni' teun iin naan ansaunun nfainin na'kon toe'f ee tuunn ee. Ma Nai' Yesus antaar sin im nak, “Saa' he' fe'e na hi miit miraar je, hi kaisa' mitonon es-es. Au he' ai, Mansian Batuur-Batuur, Au ro nuu 'maet fe'. Reka' Au 'moni 'fain te, nai' hi mitoon rasi naan meu too mfaun iin.”

10 Sin nnaa' naheren Nai' Yesus Hin rais manba'an naan, ma sin natonon tuaf es aa mae' amsa'. Mes sin teun sin anmaktaan iin es nok es am nak, “Hin sairt ii, en mee m'es nai' Hin nak, ‘Hin nuu nmoini nfain na'ko Hin i'maetn ee’ he' naan? En mee?”

11 Ma sin nataan Ee mnak, “Tunggur agama sin nak, ‘ka'o Elia ro nuu neem nahuun fe', oke te nai' Kristus neem.’ Mes ek Ho neerm ii te, en mee?”^b

12 Nai' Yesus nataah am nak, “Namneo en naan. Ka'o Elia ro nuu neem nahuun fe', nuu nfei ranan nuu Kristus, Tuaf he' Uisneno anruur naan Je na'ko un-unu'. Mes en mee? Hi mihiin saa' he' sin ntui nain je et Uisneno Hin Suru Kninu' anmatoom nok Mansian Batuur-Batuur, oo, ai' mae'? Fun sin ntui narair je mnak, karu Hin nemen ntea te, atoni' of anha'muu' Je ma sin of anroor niis Ne. 13 Ma hi ro nuu mpasan hi ruikm iin ee rek-reko, joo! Ka'o Elia neem narair hen. Ma atoni' anha'muu' je, natuin sin roimr iin ee. Rasi naan namnees nok saa' he' unu' te, sin nai'k iin antui nain je.”

14 Oros Nai' Yesus nok Hin katoup noni' tua teun iin nateef nfainin nok katoup noni' bian, sin niit too mfaun ee nabuan. Too mfaun iin naan nemen nuu nkius katoup noni' bian sin anmatoen nok tunggur agama sin. 15 Oros too mfaun ee niit Nai' Yesus en nai te, sin naskeken, fun sin nateenb iin nak of oni' Hin nabaar fe' et toe'f ee tuunn ee. Ma sin naen anseun Gwe.

16 Oke te, Nai' Yesus nataan sin im nak, “Hi mmatoen rais saa' naa mok sin?”

17 Anmui' atoin es neem na'uab am nak, “Ama', karu reko te, amneen maan kau, tua! Au keir au aan mone nuu Ho mureko' maan ee. Hin nmuu ma bisa na'uaba' mae', fun niut reu'f es nsaen ee. 18 Karu niut reu'uf naan nsae ne, hin nbius ne nuu afu. Oke te, ri'ana' naan hin haepn ee na'furi', ma hin neuk hin niisr iin ne. Oke te, hin aon aan anruru haa en he' hau noon oes. Au 'toit kiit Ho katoup noon' iin ee, nuu sin nriu' niut reu'uf naan. Mes sin na'bei' je mae', tua.”

19 Anneen en naan te, Nai' Yesus naskara' sin im nak, “Hoe! Ro hi bainesi' ki! Au kunoni' ki fani-fani, mes hi mheek maan aa mae'. Ma hi mpirsai Kau mae' batuur-batuur! Au nuu 'sabaar neu ki ntea reka'! Mok Kau ri'ana' naan neem nuu ai!” 20 Oke te, sin natnaat neer ri'ana' naan neem nuu Nai' Yesus. Oros niut reu'uf naan nkius niit Nai' Yesus en naan te, hin nbonon ri'ana' naan ma nriit oe ek afu, ma hin haep bua-neorn ee nsae.

21 Oke te, Nai' Yesus nataan ri'ana' naan hin aamn ee mnak, “Ho anam hin meens ii na'ko reek ii?”

Hin aamn ee nataah am nak, “Na'ko hin aan'-ana' fe', tua. 22 Niut reu'uf naan nuu na'maet au aank ii roo-roo hen. Hin nbeoson au anak fani-fani ek ai, ma nareem ee ek oe. En nai ma amturun maan kai, tua! Karu reko te, amneer kai, nuu mureko' maan au anak he' ai.”

23 Nai' Yesus nataah am nak, “Nansaa' am es ho mak ‘karu reko te’? Namneo Au bisa 'moe aar he' saa'-saa', asar atoni' ro nuu npirsai fe'!”

24 Oke te, atoin mnasi' naan noi nkae ma nataah am nak, “Ama'! Namneo, au 'pirsai 'rair. Mes amturun kau nuu au 'neer pirsait ii, ma'tane' nteni!”

25 Oros naan, Nai' Yesus nkius too mfaun iin nmurai neem naubun sin. En nai ma Hin naprenet niut reu'uf naan am nak, “Hoi! Niut kaburaurut! Ho mpoi neu mu'ko ri'ana' he' ai, nuu hin bisa nneen, ma hin bisa na'uaba'. Ho kaisa' amtaam amfain uum!”

26 Anneen Nai' Yesus na'uab en naan te, niut reu'uf naan anhunun naher-heer. Hin nmoe' ri'ana' naan antikoib ma npaiteetk on, oke te nai' anpoi nasain ee. Ma ri'ana' naan antumauf en he' nmaet narair. Tar too mfaun iin na'uab iin im nak, “Ooo! Hin nmaet narair!”

27 Mes Nai' Yesus annaa' ri'ana' naan hin niimn ee, ma nfiit nafeen' ee. En nai ma ri'ana' naan anfeen nain oros naan.

28 Oke te, Nai' Yesus nok Hin katoup noon' iin ee nnao nasaina' bare naan, ma nmesen ntaman neu uim jes. Ek naan sin nataan Nai' Yesus am nak, “Ama'! Nansaa' am es fe'e na hai bisa mriu' maan aa mae' niut reu'uf naan?”

29 Ma Nai' Yesus na'uab nuu sin im nak, “Amneen mirek-reko'! Niut reu'f iin ro kamaufiunt iin. Es naan te, karu hi m'oenen nuu mtoti mae' Uisneno, hi mi'be'i mae' nuu mriu' niut reu'uf en he' naan.”

30 Oke te, Nai' Yesus nok Hin katoup noon' iin ee nnao nasaina' bare naan, ma antaman nuu propinsi Galilea. Oros naan, Nai' Yesus nromi mae' nuu atoni' nahiin nak Hin et bare naan, 31 fun Hin nuu nanoni' Hin katoup noon' iin ee nmesen. Hin natonon sin im nak, “Roo mae' heen, sin of na'sosa' Kau nuu atoin sona'. Oke te, sin nroor niis Kau, Mansian Batuur-Batuur he' ai. Namneo Au ro nuu 'maet, mes feunn aa te,^c Au ro 'moni 'fain.”

32 Nai' Yesus na'uab en naan, ma Hin katoup noon' iin ee naskeken ntaka'naan iin. Sin nabrain aa mae' nuu nataan anteni' Nai' Yesus Hin neern ii en mee.

33 Oke te, Nai' Yesus sin nnao ntean Kapernaum. Oros sin antaman ek umi, Hin nataan Hin katoup noon' iin ee mnak, “Fe'e na hi mmatoena' rais saa' naa ek raann ee?”

34 Mes tiit es aa mae' nuu nataah, nok ek raan tnana', sin nmatoen am nak, seku naa es ko'u nneis na'ko sin.^d

35 Oke te, Nai' Yesus antook ma nanoni' sin im nak, “Seku naa anroim nuu anjair atoin ko'u, hin 'moinn ee ro nuu batuur-batuur en he' atoin neer ka'baut, nuu ntuthae aar he' too mfaun iin.”^e

36 Oke te, Nai' Yesus naskau naan ri'aan' es ek naan, ma nfain nuu sin tnaanr iin ee. En nai ma Hin na'uab am nak, 37 “Seku naa natuina' Kau ma ntuthae tua ka'baut iin en he' ri'ana' he' ai, tuaf he' naan antuthae Kau msa'. Ma hin ntuthae Au Ama' he' anreek-haef Kau nuu 'taam kuum ek pah-piin ii msa'.”^f

38 Oke te, Nai' Yesus Hin katoup noni' nai' Yohanis, natraak am nak, “Ama'! Ek oors es, hai miit atoin es anpaek Ho kaanm ii ma nriu' niut reu'f iin. Mes hai mtaar ee, natuin hin hit jia mae'.”

39 Mes Nai' Yesus nataah am nak, “Hoe! Hi kaisa' mikain ee. Fun seku naa es anpaek Au kaank ii nuu nmoe' rais sanmakat, hin of nuu na'uab na'reu'uf Au kaank ii mae'. 40 Karu hin nraban kit aa mae', en naan te hin he' naan hit jia amsa'.^g 41 Es naan te, mimnau mirek-reko'! Karu anmui' tuaf nahiin nak hi mituina' Kristus, oke te hin nturun ki, Uisneno nnika' hin haet ee mae'. Maski hin suma na'inu' ki neer oe rumun kraas es amsa', Uisneno nniik' ee mae'.”^h

42 Oke te, Nai' Yesus na'uab nteni' nuu sin im nak, “Karu atoon' es anmoe' ri'aan es nasanab ma npirsai nteni' Kau mae', ampaant om, oo! Reko nneis, nait faut kou' gwes,ⁱ ma nfuut nakfiir' ee nuu atoni naan in neon ee, ma npori nataam ee en taas je naann ee.

43 Karu ho musanab meir ho niim aan, mkeut mpori' ho nimim naan! Nok reko nneis ho mtaam meu sonof neno tunan meir ho nimim mese', na'ko sin npori nataam ko nuu ai maputu' ma ai marara' kabar-barat meir ho niimm iin nua sin.^j 44 [Ai marara' naan, namneo-namneo baer naanka'renet. Hin aa je nmaet niit aa mae'. Ma aar he' kaun soo ji nsoe nareu' nasnaas aa mae'.]^k 45 Karu ho musanab meir ho haem aan, mkeut mpori' ho haem aan. Nok reko nneis ho mtaam meu sonof neno tunan meir ho haem mese', na'ko sin npori nataam ko nuu ai maputu' ma ai marara' kabar-barat meir ho haem iin nua sin. 46 [Ai marara' naan, namneo-namneo baer naanka'renet. Hin aa je nmaet niit aa mae'. Ma aar he' kaun soo ji nsoe nareu' nasnaas aa mae'.]^l 47 Ma karu ho musanab meir ho maatm aan, mroi' mpori' ho maatm aan. Nok reko nneis ho mtaam meu sonof neno tunan meir ho matam fua' mese', na'ko sin npori nataam ko nuu ai maputu' ma ai marara' kabar-barat meir ho maatm iin fua' nua.^m

49 Au 'fee noni' he' ai, ro ma'fena'. Es naan te, seku naa es he' nuu natuina' Kau te, ro hin nuu ntahan nuu nok Kau piut, en he' siis sei'k ii ro nuu npaek maisik, nuu nai sisi naan antahan roo.

50 Maisik naan, ro reko. Hit tpaak je nuu taminib mnahat. Mes karu maisk ii miin mari mae' heen, te nuu tpaak je nuu sa'a nteni'? Ro hit tait tpoor ee haa. Hi ro nuu mjair en he' maisk aa msa', nuu mmoin ek maneret mok aar he' too mfaun ii.^o

[En nai ma hi kaisa' ammatoe mteni neu, mak seku naa es he' kou' gwi, ma seku naa es aan ii.]”