Uisif Yesus antuthae atoni' nifu haa
(Naiꞌ Mateos 15:32-39)
8
1-3 Neot es te, too mfaun iin neem nabuan nuu nneen Nai' Yesus Hin uaban. Sin natuin Ee neno teun hen. En nai ma sin narairin beti'. Oke te, Nai' Yesus noe'en Hin katoup noon' iin ee im nak, “Au 'kasian too mfaun iin nai. Bian nemen na'ko baer roo, ma nabua nok kit neno teun hen, tar antea sin narairin beti'. Reko nneis sin kaisa' nnao nfainin nok tei rumun. Kais-kaisa' sin ntumaufun ek raan tnana'.”4 Nai' Yesus Hin katoup noon' iin ee nataahn am nak, “Ama'! Bare ai na'roo na'ko ruan. En nai ma hit bisa nuu ntuthae taan too mfaun iin he' ai mae'!”
5 Nai' Yesus nataan sin im nak, “Hi mmui' utunu' fua' fauk?”
Sin nataahn am nak, “Hai mmu'i utunu' fua' hitu haa, tua.”
6 Oke te, Nai' Yesus anreun too mfaun iin naan nuu ntokon ek afu. En nai ma, Hin nait utunu' fua' hiit win he' naan, ma ntoit makasi nuu Uisneno. Oke te, Hin anteib sin pisa'-pisa', ma nfee sin nuu Hin katoup noon' iin ee. Sin nnao ma anbaitin neu too mfaun iin ok-oke'. 7 Ma sin napeinin ika' fak-fauk amsa'. Oke te, Nai' Yesus antoit makasi nteni' nuu Uisneno antoom nok iik' iin naan. En nai ma, Hin nreun Hin katoup noon' iin ee nuu nbaitin nteni' nuu too mfaun iin. 8-9 Sin aar sin ok-oke' of oni' atoni' nifu haa. Sin nbukaen tar namsenen. Nbukaen narairin te, katoup noon' iin ee nabuab mnaah neisf iin naheun kruna' hiut. Oke te, Nai' Yesus anreek sin nuu nfainin ok-oke'. 10 Ma oros sin nnao nfainin en naan te, Nai' Yesus nok Hin katoup noon' iin ee nsaen nuu kofa', ma nnao nabnonon npeo'on neef gwe niinn ee, neu baer jes, kaann aa Dalmanuta.
Atoin Farisi sin naimin ranan nuu namofu' Uisif Yesus
(Naiꞌ Mateos 16:1-4)
11 Oros Nai' Yesus sin antean Dalmanuta, tuaf na'ko partei pirsait Farisi neem nateef nok Ne nuu nmatoen. Sin nataan na'keekt Ee, ma sin ntoot Je mnak, “Ama'! Mukrira' rais sanmakat nuu anjair 'tope' mamnita nak, Ho mupein Ho ma'taenm ii na'ko Uisneno.”a
12 Nai' Yesus anheer Hin snaasn ii, en nai ma Hin nak, “Karu Au 'neen hi uab iin naan, Au 'mei' jok! Nansaa' am es hi mtoit rais sanmakat? Kaisa' en naan! Rais sanmakat ro nmui' msa', mes Au 'moe' 'fee ki mae'.”b
13 Oke te, Nai' Yesus nnao nasaina' sin, ma ansae nfain ek kofa' nabua nok Hin katoup noon' iin ee. Ma sin nrakan neu neef gwe painn ee.
Uisif Yesus nanoni' nak, ampanat mirek-reko' atoin Farisi sin rais ma'kopo'
(Naiꞌ Mateos 16:5-12)
14 Oros Nai' Yesus sin antean neef gwe tnaann ee, nai' katoup noon' iin ee namnaun nak, sin niik iin nak, sin neirn aa mae' beti'. Suma sin neer utunu' fua' mese' haa. 15 Anneen sin na'uab iin anteek utunu' en naan te, Nai' Yesus nak sin im nak, “Hi ro nuu mpanat mirek-reko'! Kaisa' hi mtoe mituin uisif Herodes ma atoin Farisi sin rais ma'kopo' kamreu'ut. Sin rais kopo' naan, nahuum en he' muur ii ankumu nseor gwe nok uut, nuu uut naan ansae.”c
16 Anneen Hin na'uab en naan te, Hin katoup noon' iin ee antaka'naan iin. Ma sin na'uab iin nak, “A'naef ee na'uab rais saa' naa? Of oni' Hin na'uab en naan, natuin hit teri mae' utunu'.”
17 Mes Nai' Yesus nahiin sin neer teneb. Es naan te, Hin na'uab am nak, “Nansaa' am es hi mi'uab ahaa utunu'? Hi mheek maan aa mae' Au sairt ii, oo? Hi roenm iin ro nbufun nmaeten! 18 Hi miit mirair nok hi maatm iin naan, mes hi mihiin hin moufn ee mae'! En he' hi miit miit aa mae' fe'! Hi mneen nok hi ruikm iin naan, mes hi mihiin saa'-saa' mae'. En he' hi mneen miit aa mae' msa'! Hi mnika' maind 19 utunu' fua' niim he' Au 'teib sin pisa'-pisa' ma 'tuthae too niufun niim, ai'? Neno naan hi mibuab maan utuun kaneest iin kruna' fauk?”
Sin nataahn am nak, “Kruna' bo'es em nua, tua.”
20 Nai' Yesus nataan anteni' sin im nak, “Hi mimnau, ai' mae', neon gwes ii, oros Au 'tebi 'bait utunu' ma 'tuthae too nifu haa? Hi mibuab maan utuun neisf iin naan kruna' fauk?”
Sin nataahn am nak, “kruna' hiut, tua!”
21 En nai ma Nai' Yesus nak, “Namneo! Hi miit nok hi maatm iin. Mes nansaa' am es hi mihini mae', Au ma'taenk ii neem na'ko mee?”
Uisif Yesus nareko' kaforot tuaf es ek Betsaida
22 Oke te, Nai' Yesus sin antean ruan Betsaida. Ek naan, anmui' tuaf neer atoin kafoort es nuu Nai' Yesus. Sin ntoot Je nuu nreo' nareko' atoin kaforot naan. 23 En nai ma, Nai' Yesus annaa' atoni' naan hin niimn ee ma neer je npoi nuu ruan ee koitn ee. Oke te, Hin npurun hape nuu atoni' naan hin maatn ee, ma Hin nree' gwe. Hin nataan am nak, “En mee? Ho bisa miit aa, oo, ai' mae'?”
24 Atoni' naan na'aiti hin maatn ee, ma nkius rii-reko, ma hin nataah am nak, “Tua! Au kiit mansian iin nbaknaon iin. Mes huumn ee en he' au kiit hau nggwin es he' kanaot ii naa!”
25 Ma Nai' Yesus na'tuta' nteni' Hin niimn ee nuu atoni' naan hin maatn ee. Ma atoni' naan ankius naher-heer anteni', ma hin nahiin nak hin niit reko hen. Oros ai hin bisa niit nok kninu'. 26 Oke te, Nai' Yesus anreun atoni' naan nuu nnao nfain, ma namnaub ee mnak, “Ho mfain neu, mes mnao mutuin raan teta'! Kaisa' mnao mfain en Betsaida.”
Nai' Petrus anmanauku mnak, Uisif Yesus naan Kristus, Tuaf he' Uisneno anruur nain Je na'ko unu'
(Naiꞌ Mateos 16:13-20; Naiꞌ Lukas 9:18-21)
27 Oke te, Nai' Yesus sin nnao npuun nateef ruan-ruan ek Kaisarea Filipi. Ek raan tnana' te, Nai' Yesus nataan Hin katoup noon' ini mnak, “Karu tatuin too mfaun iin sin uabr iin, sin nak Au he' ai, seku naa?”
28 Sin nataahn am nak, “Bian sin nak ‘nai' Yohanis kasrainit’. Bian sin nak, ‘ka'o Elia, mafefa kninu' Uisneno unu' naan’. Ma bian anteni nak, Ho he' ai tuaf es na'ko Uisneno Hin mafefa kninu' kahunut.”e
29 Ma Nai' Yesus nataan anteni' sin nak, “Mes natuin hi mahiinm ini, Au he' ai, seku naa?”
Nai' Petrus nataah am nak, “Ho he' ai Kristus, he' Uisneno nruur nain Je na'ko unu'.”f
30 Mes Nai' Yesus antaar sin nmaetes nak, “Na'bei' mae' nuu hi mitonon es-es, saa' he' nai' Petrus na'uab ee he' ai!”
Uisif Yesus natoon Hin ma'nea'at ma Hin 'maetn ee
(Naiꞌ Mateos 16:21-28; Naiꞌ Lukas 9:22-27)
31 Oke te, Nai' Yesus anmurai na'uab nuu Hin katoup noon' iin ee im nak, “Au he' ai, Mansian Batuur-Batuur Kau. Au of kupein rais ha'mui'it namfau, natuin kamnais haart iin, ka'naak rais pirsait Yahudis sin kanaakt iin, ma tunggur agama sin ok-oke' of antita' Kau. Sin of anroor niis Kau, mes feunn aa te,g Au 'moni 'fain.”
32 Nai' Yesus natoon maat-maat en naan, en nai ma nai' Petrus anheer naniinb Ee, ma nakain Ee mnak, “Ama'! Kaisa' mu'uab en naan! Au 'konon sin aa mae', nuu nreo' Ko, tua.”
33 Mes nai' Petrus hin uaban naan natuina' Uisneno Hin roimn ii mae'. Es naan te, Nai' Yesus anbani' ma nkius Hin katoup noni' bian ii. Ma Hin nakaina' nai' Petrus nok haan ma'tane' mnak, “Hoe! Naan niut reu'f iin sin ka'naak kou' gwe hin uabn aa! Mu'roo mu'ko ai! Ho suma muteneb meir teneb mansian, mes teneb naan natuina' Uisneno Hin roimn ii mae'!”
34 Oke te, Nai' Yesus noe'en too mfaun nuu neem nabuan nok Hin katoup noon' iin ee. Ma Hin nanoni' sin im nak, “Atoni' he' anroim nuu natuina' Kau, ro hin nuu ntahan ma natuina' Kau neno-neno! Hin ro nuu nnika nain hin roimn ee kuun, ma natuin ahaa Uisneno Hin roimn ee. Maski atoni' nuu nroor gwe msa', mes hin natuin piut, en he' atoni' nasaah hin hau nehe nuu nnao nuu hin baer 'maetn ee.h 35 Fun atoni' he' anmoin nuu haa hin tuan ee, of hin 'moinn ii namneuk en ahaa he' naan! Mes atoni' he' nabarab hin tuan ee nuu nmaet natuin hin anjair Au nggwin aa ma natoon Uisneno Hin raan hoinis, hin of anmoin nabar-baar nok Uisneno.i 36 Amneen, oo! Karu ho mpaar pah-piin ii hin aafn ii oke', mes Uisneno antita' ko, ho mupein saa' naa? 37 Maski nak ho mroi meir pah-piin ii hin aafn ii oke' msa', mui'if naan nuu ntuik naan ho smaanm ii mae'!
38 Mimnau! Mansian batan muni' ai, anmoe'en reu'uf huma'-huma'. Sin nfirori mae' nuu natuina' Uisneno. Es naan te, seku naa he' namaeb on nuu natuina' Kau, ai' namaeb on nuu natuina' Au noin' iin ee, Au of kumaeb ok amsa' nuu 'manauku' hin tuan ee ek Uisneno Hin humun ma Hin matan. Fun Au, Mansian Batuur-Batuur he' ai, of Au 'fain kuum ku'ko neno tunan. Ma Uisneno Hin kameupt iin ee na'kon neno tunan of naub naan Kau. Oros hai msaun iim mi'ko sonof neno tunan meir Ama' Hin pinan ma krahan, of mansian ii nai' nahinin nak, kamneon ii Au he' ai seku naa.