Atoron mansian kaisa' naneuk Uisneno Hin atoorn ii
(Naiꞌ Mateos 15:1-9)
7
Atoin Farisi puukn es ma tunggur agama Yahudi fauk nemen na'kon Yerusalem nuu nateef nok Nai' Yesus. 2-5 Atoin Farisi sin annaa' naher-heren sin harat atoin Yahudis. Nahuum en he': karu atoni nuu nbukae, ro nuu nafaun hin niimn ee natuin haart ii hin roimn ee. En naan amsa', karu nfain neem na'ko masa', sin ro nuu naniun fe'. Tar antea sin bare' uim haan' ee msa', en he' 'pika', kraas, pois oe, ro nuu nsaef sin natuin haart ii hin roimn ee, nuu nai bisa npaek sin nuu nbukaen.Karu anmui' atoin Yahudis bian natuina haart iin naan aa mae', atoin Farisi sin natoa'an.
Es naan te, sin natoa'an oros sin niit Nai' Yesus Hin katoup noon' iin ee nbukaen, mes nafaun sin niimr ini mae' natuin haart ii hin roimn ee. Oke te, sin nemen ma nasaan Nai' Yesus am nak, “Nansaa' am es ho katoup noon' iin ee nbukaen mes sin nafaun sin niimr ini mae'? Naan, sin nraban hit atoron harat na'ko atoin mnais kahuunt iin!”
6-7 Mes Nai' Yesus nataah sin im nak, “Hi he' ai en he' atoni he' na'uab te, teta', mes hi mmoe' te, teta'! Nahuun te, ka'o Yesaya antui nain Uisneno Hin kaibin im nak,
‘Tuaf iin he' ai npuiris ma nboi'is Kau,
npaekn ahaa sin nurun koitn iin, mes mui' npoi na'ko sin neerr ini mae'.
Sin 'moe'r iin en he' naan ruum ma parsuum.
Sin nanesa' mansian ii hin atoorn ii en he' Au atoorn ii.
Hin kamneon ii, mui' Au es he' 'moe' atoron nana mae'.’
Hi msa' huma mese en he' sin.a 8-9 Hi misaina' mirair prenet Uisneno ma mituin ahaa harat mansian. Hi mahiinm ini ma manoem ini ma'taen reu'uf!
10 Nahuun te, ka'o Musa natoon narair Uisneno Hin prenet am nak, ‘Amhormaat hi mahoint iin.’ Antuut anteni mnak, ‘Karu tuaf es naseku' hin ina' ai' hin ama, ro nuu thukun tiis ne.’b 11-12 Uisneno nanoni' ki en he' naan, mes hi minoni' teta' na'ko naan. Hi mak, ‘Karu tuaf es anba'an narair nuu nfee saa' es nuu Uisneno, maski hin ina'-ama ansuus anmaeten, mes bare' naan bisa npaek je mae' nuu nturun sin, natuin anba'an narair nuu nfee je nuu Uisneno.’ 13 Es naan te, fe'e na Au kak ki kak, hi mpori misain main Uisneno Hin roimn ee, ma hi mseen oe nok atoron mansian. Anmui' atoron amfaun he' hi mseen oe nahuum en he' naan.”
Rais reu'uf he' anpoi na'ko atoni' hin neern ee
(Naiꞌ Mateos 15:10-20)
14 Oke te, Nai' Yesus noe'en tuaf bian ek naan, ma na'uab am nak, “Amneen mirek-reko', nuu hi mihiin. 15 Aar he' saa' he' antaman nuu atoni' hin tein ee nhai'niisb aa mae' hin tuan. Mes saa' he' anpoi nfain, es he' neir hai'nisit nuu hin tuan. 16 [Seku naa nuu mneen te, amneen nuu muhiin!”]c
17 Oke te, Nai' Yesus nok Hin katoup noon' iin ee nnao nasaina' too mfaun iin naan, ma antaman neu uim jes. Hin katoup noon' iin ee nataan reta' naan hin moufn ee. 18-19 Nai' Yesus nataah sin im nak, “Hi mihini mae' msa', aa oo? Hin moufn ii en nai: saa' he' atoni nbukae je, naan hin reko. Mes saa' he' anpoi nfain naan, hin es reko mae'. Saa' he' hit tbukae je, antaam nuu hit teik ii, oke te anpoi nkoon. (Nai' Yesus Hin sairt ii nak, atoni bisa nbukae saa'-saa' aa haa. Taars aa mae'.)
20 Mes saa' he' anpoi na'ko atoni' hin neern ee, naan es he' neir hai'nisit, tar antea Uisneno nmai'niis ne, ma nromi mae' nuu nabua nok ne. 21 Rais reu'uf namfau anpoi na'ko atoni' hin neern ee, en he': teneb kamreu'ut, rais makoinit, rais bakan, rais marorot, 22 rais paru', rais makaeket, 'moe' reu'uf, putur-baerek huma'-huma', sinmakat, mantiunus, na'uab na'reu'uf es, nabeo', nahini mae' atoron, ma na'naak-faut.
23 Aar he' 'moe reu'f iin en he' naan anpoin na'ko atoni' hin neern ee. Naan es he' nareu' nafani' hin tuan. Ma Uisneno nmai'niis ne msa'.”
Uisif Yesus anturun bifee jes he' mui' atoin Yahudis mae'
(Naiꞌ Mateos 15:21-28)
24 Oke te, Nai' Yesus sin nasaina' bare naan, ma nnao neu kota es, kaann ee Tirus. Antean bare naan, sin ntaman ek uim jes, natuin Nai' Yesus Hin nromi mae' nuu biar iin nahinin nak Hin et he' naan. Mes Hin bisa na'koor oa mae'.
25-26 Ek naan, te bifee jes, mui' atoin Yahudis mae', nahoon' ee ek pah Fenesia et propinsi Siria. Oros hin nneen nak Nai' Yesus neem te, hin nnao ma ntoot Je nuu nriu' napoina' niut reu'uf na'ko hin aan feto.
27 Nai' Yesus na'uab manpori' am nak, “Ri'aan iin sin ro nuu nbukaen nahunun, oke te nai' an'okor mnaah neisf iin neu asu.” [Nok sairit ma'koro' nak, Nai' Yesus ro nuu nturun Hin atoin Yahudis sin fe', nai' anturun atoin sona'.]
28 Mes bifee naan nataah am nak, “Namneo, tua! Mes ausun naan ek mei je nuupn ee. En nai ma sin nahan mnaah kamouft iin na'ko ri'aan iin sin 'piik iin ee.” [Nok sairit nak, oros ri'aan iin anbukaen, ausun naan napein mnahat amsa'. Maski Nai' Yesus anturun Hiin ne, Hin ro nuu nkius atoin sona' amsa'.]
29 Anneen en naan te, Nai' Yesus na'uab am nak, “Hoe, bifee ai fe'! Ho uabm aan ro namneo! Es naan te ho mfain neu, natuin niut reu'f ee anpoi nrair na'ko ho anam.”
30 Oke te, bifee naan antebi nfain. Antea hin umi te, hin aan ee antuup nfiin. Niut reu'uf naan anpoi narair.
Uisif Yesus nareko' kamuut es, ma nkoos nok amsa'
31 Oke te, Nai' Yesus sin nasaina' kota Tirus, ma nnao nabnonon npeo'on taas je niinn ee, nkoon kota Sidon. Na'ko naan, sin nnao nkonon tar antean nefo Galilea. Oke te, sin nnao nuu pah es nok kota bo'es, he' sin nteek ee nak, ‘Dekapolis’.d 32 Ek bare naan, anmui' atoin kamuut es, he' ankoos nok. Hin aon-bian sin neer je nnao nuu Nai' Yesus. Sin ntoitin nuu Nai' Yesus na'tuta' Hin niimn ee nuu kamenet naan, nuu nareek oe. 33 En nai ma Nai' Yesus nasaina' too mfaun iin, ma nnao nmees nok atoni' naan. Nai' Yesus nataam Hin kruurn ee ek atoni' naan hin ruikr iin ee nua sin. Oke te, Hin ntao hape ek Hin kruurn ee ma anreo' atoni' naan hin maan ee. 34 Nai' Yesus anbaiseun neen gwe ma nheer Hin snaasn ee, oke te naprenet anpaek sin uab am nak, “Efata!” (Hin moufn ii nak, “Mutfe'i neu!”)
35 Hin na'uab en ahaa he' naan, mes kamenet naan hin ruikr iin ee anneen nain oros naan. Ma hin maan ee, anma'nuur nain amsa', en nai ma hin nmurai na'uaba reko.
36 Oke te, sin nua sin nnao nfainin neu too mfaun iin. Nai' Yesus antaar sin im nak, “Amneen, oo! Kaisa' mitonon es-es mak, Au kureko' kurair atoni' he' ai.” Maski Nai' Yesus antaar sin nok ma'tane' amsa', mes sin na'uab iin piut ek bare-bare. 37 Too mfaun iin he' anneen uab mantonos naan, ansanmakan. Sin na'uab iin im nak, “Ma'taen reu'uf! Atoni' he' ai anmoe' aar he' saa' ii ro reko oke'. Kakoost ee, anneen. Kamuut ee, na'uaba'.”