Kabitin Nasaret antita' Uisif Yesus
(Naiꞌ Mateos 13:53-58; Naiꞌ Lukas 4:16-30)
6
Oke te, Nai' Yesus nok Hin katoup noon' ini ok-oke' nnao nfainin neu Hin ruan Nasaret. 2 Nateef nok atoin Yahudis sin neon oenen, Nai' Yesus antaam ek uim oenen nuu nfee noni'. Neno naan, too mfaun iin nemen nuu n'oen iin. Oros sin aar sin anneen Hin noon' ini te, sin nsanmakan ma na'uab iin im nak, “Atoni' ai mahiin ii ma'tane'! Hin nmui' kuasat amsa'! Nok ranan mee m'es Hin bisa en he' ai? 3 Kamneon ii, Hin suma tukun hau. Hit tahiin Hin ina' bi Maria, nok aar he' Hin oir iin ee, es he': nai' Yakobus, nai' Yoses, nai' Judas nok nai' Simon. Hit tahiin Hin feotr iin amsa'. Hit tok Ne aar kit tatua ruan mese'!” En nai ma sin nroimn aa mae' nuu Hin nneis sin, ma sin nneen ntein Ee mae' hen.4 Oke te, Nai' Yesus na'uab am nak, “Batuur! Atoni' anhormaat mafefa' kninu' Uisneno he' kamnemet, anneis na'ko mafefa kninu' rua tuaf.”a
5-6a Too mfaun iin, sin neer manu' bainesi', tar sin anroimn aa mae' nuu npirsain neu Nai' Yesus. Es naan te, Hin nsanmaak, tar antea Hin nmoe' nteni' mae' rais sanmakat ek naan. Hin suma anreo' nareko' naan ahaa kamenet fauk aa haa.
Uisif Yesus anreek-haef Hin katoup noon' iin ee tuaf bo'es em nua
(Naiꞌ Mateos 10:5-15; Naiꞌ Lukas 9:1-6)
6b Oke te, Nai' Yesus nnao nuu rua paumaak iin, ma nfeen sin noni' anmatoom nok Uisneno Hin roimn ee. 7 Hin noe'en naan katoup noni' tuaf bo'es em nua, ma nreun sin tuaf nu-nua, nuu nnao natoon Uisneno Hin Rais Reko. Hin nfee kuasat amsa' nuu sin nriu' niut reu'uf. 8-9 Hin nba'an sin im nak, “Kaisa' meir brua' amfaun ek ranan, fun Uisneno of es an'aotor hi perluut iin. Hi kaisa' meir beti', noni-roit, ma kaipir. Hi meiri haa teas, 'pein haef, ma mpaek maan ahaa baru mese'. 10 Karu seku naa ntoup ki nuu mtaam meu hin umi, mitua ek naan tar antea hi mnao mkoon meu bare bian. 11 Mes karu ek bare mee sin ntoup ki mae', ma sin natniin ki mae', mpoi moko' bare naan. Ma mitonon sin im mak, ‘Natuin hi mroim nuu mitnina mae', es naan te nbain nuu hi msutai kiim hi kamreu'ut!”’b
12 Oke te, sin nnao ma natoon Rais Reko naan. Sin nak, “Aar he' mansian aar ki ro nuu misaina' hi sanat ma penu sin, ma mtebi mfain nuu mmoin mituin Uisneno Hin roimn ee.” 13 En nai ma sin anriu' napoina' niut reu'uf namfau. En naan amsa', sin naroinip mina' nuu atoin kamenet sin naakr iin ee, ma n'oen iin nuu nareko' sin. En nai ma sin nareokon.c
Sin nkoet na'maet nai' Yohanis kasrainit
(Naiꞌ Mateos 14:1-12; Naiꞌ Lukas 9:7-9)
14 Oros naan, too ek bare-bare anneen narair anmatoom nok Nai' Yesus. Uaba' anmatoom nok Hin kuasan manena' narair antean uisif Herodes amsa'. Tuaf bian na'uab iin im nak, “Nai' Yohanis kasrainit anmoini nfain et Nai' Yesus Hin tuan! Eutun Hin na'bei' nuu nmoe' aar he' kanan rais sanmakat.”
15 Mes tuaf bian nak, “Mae'! Hin he' ai, mafefa kninu' nai' Elia es anmoini nfain et Hin tuan.” Bian amsa' nak, “Hin he' naan, Uisneno Hin mafefa kninu' tuaf es na'ko kahuunt iin.”d
16 Mes oros uisif Herodes anneen rasi naan te, hin nak, “Ai nai' Yohanis kasrainit, he' neon gwes ii au 'reek tuaf nuu nkoet nafeer hin naakn ee. Oros ai hin nmoin nfain hen.”
17-18 Uisif Herodes anreun en he' naan, natuin hin nmaka'rasi' nok nai' Yohanis. Rasi naan na'uub on, en nai: uisif nai' Herodes nasiik naan hin oirn ee nai' Felipus fee je, kaann ee bi Herodias. Kamneon ii, nai' Felipus nok bi Herodias nmanpoor' iin mae' fe'. Natuin rasi naan am es, nai' Yohanis nakain ee fani-fani mnak, “Aam usi'! Na'bei' mae' nuu ho mait ho ori' hin fee je. Fun rasi naan antanhai hit harat atoin Yahudis.” Mes nai' Herodes hin nsao ru'-ruu'. Ma hin nreun tuaf nuu nheek nai' Yohanis ma nataam ee nuu bui.e
19 Natuin nai' Yohanis nakain ee fani-fani en he' naan, es naan te bifee naan na'kunus neer menes nuu nroor niis ne. Mes hin napein mainuan aa mae' fe', natuin nai' Herodes nataam narair nai' Yohanis ek bui, 20 ma nruur soraurs iin nuu npao gwe rek-reko.
Nai' Herodes anmanu'hain nai' Yohanis. Hin nahiin nak Uisneno es anreek-haef nai' Yohanis. Ma nai' Yohanis naan atoin neer reko. Nai' Herodes anroim nuu nneen nai' Yohanis hin uaban. Mes neot es-neot es te, hin npenen nai' Yohanis hin uabn ee.
21 Neot es te, fenai Herodias napein mainuan nuu natiis hin neer menes naan. Oros naan, sin nfeest iin neu nai' Herodes hin neon mahoinn aa. Sin naskau kaes kou' gwin nuu nokon nbukaen ek feset naan. Kamnookt iin sin es he': kanaa' prenet, ka'naak soraurus, ma mnasi'-mnasi' pah Galilea. 22 Oros feest ii ntainua hen, fenai Herodias hin aan feet gwe antaam neem ma nabsoo'. Hin bsoo'n ii reokn ii kah, tar antea nmoe' uisif Herodes nok aar he' taumun feset naan anmairini nmaeten. Es naan te, Nai' Herodes noe'en aan feot kabso'ot naan ma nak ee mnak, “Ho mroim nuu mtoit saa' te, mutoon! Au ro nuu 'fee ko. 23 Maski ho mtoit tar antea bait nua au preent ii msa', au 'fee ko he. Au 'suup keir Uisneno Hin kaann ii!”
24 Ri'aan feto naan nnao nataan hin iin ee mnak, “Ina'! Ho mroim nuu au 'toit saa' he' reko nneis na'ko ama'?”
Ma hin iin ee nataah ee nak, “Hau, oo! Reko! Mnao neu ma mtoit maan nai' Yohanis hin naakn ee.”
25 Oke te, ri'aan feto naan neem rabah aah nuu nai' Herodes hin maatn ee am nak, “Ama'! Au 'toit nuu mfee kau nai' Yohanis hin naakn ee. Mtao maan ee ek dulang es. Rabah aah!”
26 Oros nai' Herodes anneen haan toitis naan te, hin neern ii namneuk. Hin na'bei' mae' nuu nheer nafani' hin haann suput, natuin aar he' too mfaun iin anneen narair haan suput naan. 27 Oke te, hin naprenet ka'naak soraurs es ma nnao nkoet neer nai' Yohanis hin naakn ee na'ko uim bui. 28 Oke te, sin nkoet naan nai' Yohanis hin naakn ee, ma ntaa gwe ek dulang es. Oke te, sin nnao nnaat ee nuu ri'aan feto naan. Ri'aan feto naan antoup gwe, ma nnao nfee je nuu hin iin ee. 29 Oros nai' Yohanis hin katoup noon' iin ee annenen nak, ankoet narair nai' Yohanis hin naakn ee, te sin nemen ma nait neer nai' Yohanis hin aon ee, ma nnao nsuub ee.
Reta' anmatoom nok nai' Yohanis hin 'maetn ii antua' ma nheu' en he' naan, tua.
Uisif Yesus antuthae too nifu niim anneis
(Naiꞌ Mateos 14:13-21; Naiꞌ Lukas 9:10-17; Naiꞌ Yohanis 6:1-14)
30 Neot es te, Nai' Yesus Hin katoup noon' iin he' Hin nreek-haef sin neen gwes ii, sin nfain nemen ma nabua nok Ne. Sin natoon aar he' kanan rasi he' sin nmoe' narair sin, nok aar he' saa' he' sin nanoni' narair sin nuu too mfaun iin. 31 Oros naan, too mfaun iin nnao na'oinin nuu-mneem nuu naim Nai' Yesus. Tar antea Hin nok Hin katoup noon' iin ee napeinn aa mae' mainuan nuu nbukaen. Nai' Yesus na'uab nok Hin katoup noon' iin ee mnak, “Iim nuu tnao taim baer ma'koro', nuu tapein mainuan nuu tasnaas taan aa kreo'.”
32 En nai ma sin aar sin nsaen ek kofa', ma sin nnao naimin baer ma'koro', na'roo na'ko ruan.
33 Mes too mfaun iin niit kofa' naan nnao nabnonon npeo' neef gwe niinn ee. Oke te, sin npoin na'ko ruan iin ee, ma sin nnao anpeo'on raan meto', en nai ma sin ntea nahunun Nai' Yesus nok katoup noon' iin ee. 34 Oros Nai' Yesus ansaun na'ko kofa', Hin niit too mfaun iin npao nain Je. Oke te, Hin nkasian sin, natuin sin nahiin aa mae' nuu nmoe'en saa', nahuum en he' 'biib-kase he' nmui' katuurs aa mae'. Oke te, Hin nanoni' sin Uisneno Hin roimn eef 35-36 na'ko oros maans ii na'puup tar antea maans ii nmaeb. En nai ma Hin katoup noon' iin ee na'uab nuu Ne mnak, “Ama'! Reko nneis Ho mreun too mfaun ee ok-oke', nuu nnao nsoson mnahat ek aar he' rua paumaka'. Fun maans ii noi nmouf hen, ma tiit aa mae' mnahat ek bare ai.”
37 Mes Nai' Yesus nataah sin im nak, “Kaisa'! Hi ro es nuu mfeen sin nuu nbukaen.”
Mes sin nataan Ee mnak, “Airoo! Karu hit ttuthae too mfaun iin ai, hit ro nuu tapoina' roit ii ko'u! Namnees nok kameupt es hin kai toon es!g Hit nuu tapein roit amfaun naan ta'ko mee?”
38 Mes Nai' Yesus nataah sin im nak, “Hi mnao mitaan miit fe', seku naa es neer beti'.”
Sin nnao natanan, oke te sin nfain neem natonon nak, “Anmui' utunu' fua' niim, nok ika' fua' nua haa.”
39 Oke te, Nai' Yesus anreun too mfaun iin naan nuu ntokon pukun-pukun ek huun. 40 En nai ma sin ntokon puukn ok. Pukun bian nabuan nat-nautun, ma pukun bian anteni' boa' nim-niim.
41 Oke te, Nai' Yesus nait naan utunu' fua' niim ma ika' fua' nua. En nai ma Hin nbaiseun en neen gwe tuunn ee ma ntoit makasi nuu Uisneno. Oke te, Hin nteib utunu' naan pisa'-pisa', ma anfee sin nuu Hin katoup noon' iin ee, nuu nnao nbaitin too mfaun iin naan ok-oke'. Ika' fua' nua' iin naan amsa', Hin bait sin nuu sin aar sin. 42 En nai ma sin aar sin anbukaen tar namsenen. 43 Oros sin anbukaen narairin en naan te, katoup noon' iin ee nabuab nafani' mnaah kaneest ii naan, naheun kruna' bo'es em nua.
44 Sin aar sin of oni' too niufun niim. Naan sin ansoi' naan ahaa atoon iin ii. Bifee ma ri'ana' masoi'k aa mae'.
Uisif Yesus nnao npe'o oe je faofn ee
(Naiꞌ Mateos 14:22-33; Naiꞌ Yohanis 6:16-21)
45 Oke te, Nai' Yesus anreun Hin katoup noon' iin ee nuu nnao nsaen kofa' nuu nnao nahunun neu ruan Betsaida et neof gwe painn ee. Mes Hin namaika' ek naan fe', nuu nreun too mfaun iin nuu nnao nfainin. 46 Oros sin aar sin nfainin te, Hin nsae ek toe'f es ma n'oenen.
47-50 Oros maans ii nkimu' te, Nai' Yesus ansaunu nfain. Hin niit katoup noon' iin ee sin koof' ee ntea narair neof gwe tnaann ee. Mes sin anfoi ma'tane', natuin kofa' naan nnao nraban nok ain ko'u. Oros neis noi nmeu' te, Nai' Yesus nnao natuina' sin. Mes Hin nnao npe'o haa oe je faafn ee. Oros Hin nuu nnao nahunun kofa' naan te, sin nkius niit Ee. Sin namtaun nmaeten. En nai ma sin nmaktanen es nok es am nak, “Hoe! Saa' na es he' nae? Niit gwa, oo?”
Mes Nai' Yesus na'uab am nak, “Hee'e! Hi kaisa' mimtau! Au es he' ai.”
51 Oros Nai' Yesus antaam nuu kofa', ainn ii nasnaas nain. Hin katoup noon' iin ee ansanmakan batuur-batuur. 52 Sin fe' niit Nai' Yesus Hin npaek kuasat ma ntuthae too niufun niim anneis, mes sin nahiin namneo mae' fe' Hin kuasat naan, natuin sin neer manu'.
Aar he' kamenet na'kon Genesaret sin nnao neun Uisif Yesus
(Naiꞌ Mateos 14:34-36)
53 Oros sin antean neef gwe painn ee, sin nasnasan ek kota Genesaret hin niinn ee. 54 Oros sin ansaunun na'kon kofa' naan, too mfaun iin niit sin. Ma sin anmakoa'an am nak, “Hoe! Nai' Yesus neem hen, oo!” 55-56 Sin aar sin naenen ma nmaktoon iin npuun um nateef, oke te, nroi neer aar he' kanan kameent iin ee.
Teir uab para', asar sin nnenen nak Nai' Yesus et bare mee te, sin aar sin nroi neer aar he' kanan kameent iin ee, ma natupa' sin ek mnera' huu sona'. Sin nateenb iin im nak, “Asar kameent iin ee anreo' naan Nai' Yesus Hin baur mnaun oe hin tuukn ee te, sin of nareokon.” Sin nmoe'en en naan te, sin nareok nainin.