Uisif Yesus nareko' atoni' he' niut reu'f iin nsaen ee
(Naiꞌ Mateos 8:28-34; Naiꞌ Lukas 8:26-39)
5
Oke te, Nai' Yesus nok Hin katoup noon' iin ee antean nefo Galilea hin painn ee, ek baar jes he' anteek ee nak, Gerasa. 2-6 Ek bare naan, atoin es anniut-sae tar namaun. Hin natua ek niut naat iin ee. Fai-manas hin na'oin nuu-mneem nok ao afa' nkoon ek aar he' knete' ma noonf iin, ma nhunun nasnasa mae'. Hin ntuut napapa hin aon ee nok fatu. Hin ma'taen reu'uf. Tiit taan es aa mae', bisa nfuut gwe, maski npaek koreent amsa'. Sin nfuut hin haen-nimin fani-fani npaek korenit, mes hin nafeer koreent iin naan, ma niit besi naan hin natiup nain sin na'ko hin haer iin ee. Hin ma'taen reu'uf, tar antea tiit tuaf es aa mae', bisa ntahan naan ee. Oros Nai' Yesus sin ansaunun na'kon kofa', kaniut-saes naan niit sin na'ko 'roo. Hin npoi na'ko niut naat iin, ma hin naen n'air Nai' Yesus ma nri'tuu ek Hin maatn ee. 7-8 Oros Nai' Yesus niit atoni' naan te, Hin na'uab am nak, “Hoi! Niut reu'uf! Mpoi neu mu'ko atoni' ai!”
Oke te, atoni' naan anhunun naher-heer am nak, “Hoi! Ho nuu munsaa' kau? Au kuhiin Ho he' ai Nai' Yesus, Uisneno Akuasat Hin Aann aa. Au 'toit Ko nuu Ho kaisa' mha'mui' kau, joo!”
9 Oke te, Nai' Yesus nataan ee mnak, “Ho kaanm aa seku naa?”
Hin nataah am nak, “Au kaank ii nai' Legion, fun hai mfau reu'uf, en he' soraurus nifu-nifu!”
10 Niut reu'f iin anpaek atoni' naan nuu ntoit Nai' Yesus nuu kaisa' nreun sin nuu npoin na'kon bare naan.
11 Anhaumaak bare naan, atoni' fauk antiutun fafi puuk kou' gwes. Faif iin he' naan sin of oni' niufun nua. Sin naimin mnahat ek toe'ef naan hin bnaapn ee. 12 Oke te, niut reu'f iin antoitin im nak, “Amreun kai nuu hai mnao mtaam meu faif iin naan, tua.”
13 Nai' Yesus antoup sin haann toits ee. Es naan te, aar he' niut reu'f iin naan anpoin ma antaman neu faif iin naan. Fafi pukun naan naen ansiksaakn ok, ma nasronon nsaunun ma nmoufun ntean neof gwe naann ee. Ma sin nreem enmaeten ok-oke'.
14 Ankius niit en naan te, katiut faifn iin namtaun nmaeten. Sin naen npuun nateef rua paumaak iin, ma natonon too mfaun iin. Es naan te, too mfaun iin anpoi nemen nuu nkius niit saa' he' anjair narair ek naan. 15 Sin neem nateef nok Nai' Yesus, ma sin niit atoin kaniut-saes naan antook ek naan. Mes hin neer ee nareok narair, ma hin anpaek tais. Ma oros sin niit rasi naan sin aar sin namtaun, fun sin nahinin nak seku naa es he' na'bei' nuu nriu' napoina' niut reu'f iin na'kon atoni' naan, ro hin atoin ma'taen reu'uf. 16 Oke te, sin aar sin anmaktoon iin nak sin niit nok sin maatr iin ee nak, atoin kaniut-saes naan nareok narair, ma faifn ii anremen nmaeten. 17 Oke te, sin ntoit Nai' Yesus batuur-batuur nuu nnao nasaina' sin pah.
18 Oros Nai' Yesus nuu nsae nfain nuu koof' ee, atoin kaniut-saes he' nareok narair he' naan neem ma ntoit nuu hin bisa nnao nabua nok Nai' Yesus.
19 Mes Nai' Yesus anpeen. Hin nak atoni' naan am nak, “Reko nneis ho mfain neu meu ho nonot sin. Mutonon sin aar he' kanan rasi he' Uisneno nmoe' narair sin neu ko. Mutonon sin im mak, Uisneno nneer ma nkasian ko!”
20 Oke te, atoni' naan nnao npuun nateef pah es nok nain hin kota bo'es, he' anteek ee te, nak ‘Dekapolis’. Hin nsaksii ma natoon aar he' kanan rasi he' Nai' Yesus anmoe' narair sin neu ne. Ma aar he' tuaf-tuaf he' anneen hin uaban naan ansanmakan ma na'uab iin im nak, “Ro ma'tane', oo!”
Uisif Yesus namoinib nafani' nai' Yairus hin aan feto. Ma bifee kameen naa' anreo' Uisif Yesus Hin bauru mnanu'
(Naiꞌ Mateos 9:18-26; Naiꞌ Lukas 8:40-56)
21 Oke te, Nai' Yesus sin nsaen kofa' ma nraak anfainin neu neef gwe painn ee. Oros sin ansaunun na'ko koof' ee, too mfaun iin nemen ma naubun naan Ee. 22 Atoon' es, ek kota naan, kaann ee nai' Yairus. Hin es he' ka'nakat ek uim oenen kota naan. Oros hin niit Nai' Yesus, hin nri'tuu ek Nai' Yesus Hin maatn ee, 23 ma ntoot Je mnak, “Koi, Ama'! Au aan feot gwe fe' toon bo'es em nua. Hin nameen ma noi nmaet hen. Ho mkoen Om uum nuu mturun mureko' maan au aank ii, tua!”a
24 En nai ma Nai' Yesus nnao natuin nai' Yairus en hin umi.
Oros sin nnao en naan te, too mfaun iin nokon ma anbee' Gwe.
25 Bifee jes ek too mfaun iin naan, hin napein funun nasnaas niit aa mae', mes naa' ee nroin kreo'-kreo' oni' toon bo'es em nua hen. 26 Hin narair roit nok hin kmui'n ee nuu nbaen kareko' meens iin. Mes tiit aa mae' tuaf es bisa nareko' hin meens ii. Hin naa' ii namheut niit aa mae', tar hin menes naan ma'fena'. 27-29 Bifee naan anneen fani-fani anmatoom nok Nai' Yesus. Es naan te, hin nbeu' too mfaun iin naan, nuu npaumak-maak ek Nai' Yesus Hin koitn ee. Hin nateneb am nak, “Asar au 'reo' kaann ahaa Hin bauru mnanu', au of kureok.”
Oros hin nreo' Nai' Yesus Hin baar gwe te, nok oskeke, naa' naan namheut. Hin nnaeben te hin nareok hen.
30 Nateef oros naan amsa', Nai' Yesus annaeben te anmui' ma'taenef anpoi na'ko Hin aon Ee. Es naan te, Hin nbani' ma nkius too mfaun iin, ma Hin nataan sin im nak, “Seku naa es anreo' Au baar gwi?”
31 Hin katoup noon' iin ee natahan am nak, “Ho mkius Kuum. Too mfaun sin anmabeu'un es nok es te, Ho mutaan am mak, ‘Seku naa es he' anreo' Au baar gwi?”’
32 Nai' Yesus ankius sin mese'-mese' nuu naim tuaf he' anreo' Hin baar gwe. 33 Anneen Nai' Yesus nataan en naan te, bifee he' naan namtau ma na'tai'. Oke te, hin nri'tuu ek Nai' Yesus Hin huumn ee ma Hin maatn ee, ma nmanauku' mnak, “Koi, Ama'! Au es he' 'reo' Ho baur gwan, tua.”
34 Ma Nai' Yesus antoin bifee naan am nak, “Ina'! Natuin ho neerm aan npirsai batuur-batuur neu Kau, es naan te ho mureok. Ho mfain neu nok neer mairinit, fun ho suust aan namsoup hen.”
35 Oros Nai' Yesus na'uab fe' en naan te, tuaf nemen na'kon nai' Yairus hin umi, ma natoon om nak, “Eee, kasian! Ho aan feot gwe, ain ee npoi nrair, tua. Kaisa' muhaeba' Uis Tungguru ruum-ruum!”
36 Mes Nai' Yesus nfairoiri mae' nok tuaf naan hin uabn ii. En nai ma Hin nak nai' Yairus am nak, “Kaisa' mumtau! Ampirsai meu Uisneno!” 37 Oke te, Nai' Yesus anreun too mfaun iin ok-oke' nuu namaik antaahn iin ek naan. Mes Hin nok ahaa nai' Petrus, nai' Yakobus ma hin oirn ee nai' Yohanis, nuu sin nnao nkonon. 38 Oros sin antean nai' Yairus hin umi, sin niit too mfaun an'urus toebiru' ma tainaunus huma'-huma', bian ankaen ma bian an'eutun. 39 Nai' Yesus antaam ek naan. Hin nataan sin im nak, “Nansaa' am es hi mtaisiub ma mkae en he' ai? Ri'ana' he' ai nmate mae'. Hin suma ntuup ahaa.”
40 Oros sin nneen Nai' Yesus na'uab en naan te, sin anmainis Nai' Yesus.
Oke te, Hin nreun sin nuu npoin ok-oke'. Hin noe'en ri'ana' naan hin ina'-ama, ma nok Hin katoup noni' tuaf teun, oke te sin aar sin antaman ek ri'ana' naan hin kea'n ee. 41 En nai ma Nai' Yesus annaa' ri'ana' naan hin niimn ee, oke te Hin npaek sin uab Aram am nak, “Talita kum!” (Teer hit uab ii te nak, “Aan feto! Amfeen neu!”)
42-43 Nok oskeke te, ri'aan feto naan anfeen anhaek ma nmurai nnao. Nai' Yesus anreek aan feto naan hin iinn ee nak, “Amfee ne nuu naah!”
Aar he' too mfaun ee he' niit rasi naan ansanmakan. Mes Nai' Yesus antaar sin nok haan ma'tane' mnak, “Kaisa' mitonon es-es mak Au kumoinib kufani' ri'aan feot kamaetes he' ai!”