Uisif Yesus nareta' anmatoom nok fini ek afu huma'-huma'
(Naiꞌ Mateos 13:1-9; Naiꞌ Lukas 8:4-8)
4
Neot es te, Nai' Yesus nnao nfain nteni ek nefo Galilea. Ma too mfaun iin nemen ma naub naan Ee. Anmui' koof' es anhaek ek naan. Oke te, Hin ansae ma antook ek kofa' naan hin tuunn ee, ma nanoni' sin. Too mfaun iin ek neef gwe niinn ee, anneen Hin uabn ii.a 2 En nai ma Hin nanoni' sin anmatoom nok rasi namfau, neer reta' mnak,3 “Hi mneen mirek-reko'! Anmui' kakani' fini tuaf es nnao ma nkani' fini ek hin rene. 4 Oros hin nkani' fini te, bian anmoufun ek ranan. Es naan te, koorn iin nemen ma nteo nain fini naan. 5 Ma fini bian anmoufun ek auf fatu' he' hin auf gwe mainiahas. Fini naan natoron rabah aah. Mes natuin afu naan mainihas, 6 es naan te, oros maans ee nsae, fiin katoors iin naan namnene' ma nmaeten, natuin sin 'baa'r iin ee ntaman ntea auf gwe nuupn ii mae'.
7 Fini bian anteni' nmoufun ek huu ma'aika'. Oke te, huu ma'aika' naan naneo ma nhaip fiin katoors iin naan, tar antea bisa napuni mae'. 8 Ma fini bian anmoufun ek auf afa'. Fini naan natoron, ma na'naen tar napuin. Fini bian nasuuf no boa' teun, bian no boa' nee, ma bian no nautn es.
9 En nai ma seku naa nneen ma nheek naan reta' ai hin moufn ee, reko te hin nateneb nnao nkoon.”
Nansaa' am es Uisif Yesus nfee noni' te, anpaek reta'?
(Naiꞌ Mateos 13:10-17; Naiꞌ Lukas 8:9-10)
10 Oke te, oros Nai' Yesus anmees, Hin katoup noon' iin ee tuaf bo'es em nua, nok atoni' bian anteni he' nneen niit Hin reta' naan, neem nateef nok Ne. Sin nataan Ee nuu Hin natonon sin reta' naan hin moufn ee. 11 Nai' Yesus nataah sin im nak, “Natuin hi mroim nuu mihiin Uisneno Hin Prenet batuur-batuur, es naan te, Au kutoon ki reta' naan hin moufn ii. Mes nuu tuaf bian, Au kunoni' sin keir reta'. 12 Atoni' bian sin nahuum en he' saa' he' Uisneno Hin mafefa kninu' antui niit im nak,
‘Sin niit narairin, mes anroimn aa mae' nuu nahinin.
Sin nneen narairin, mes sin anroimn aa mae' nuu ntoupun.
Nbain nuu sin kaisa' npirsain neu Uisneno,
henati' Uisneno kaisa' nfeen sin saok sanat anteni.”’b
Uisif Yesus anfei reta' anmatoom nok fini naan
(Naiꞌ Mateos 13:18-23; Naiꞌ Lukas 8:11-15)
13 Oke te, Nai' Yesus anfei reta' naan hin koetn ee em nak, “Karu hi mheke mae' reta' ai hin moufn ii, nok ranan mee, nuu hi bisa mheek reta' bian sin moufr iin ee? 14 En nai ma reta' ai hin moufn ii en nai: kakani' fini naan, es he' tuaf he' nsaksii ma natoon Uisneno Hin Kaibin ma Prenet. 15 Fini he' anmoufun ek ranan, tar antea koorn iin nteo ma nsiun nain sin naan, es he' tuaf-tuaf he' anneen Uisneno Hin Kaibin ma Prenet. Mes roo mae' te, niut reu'f iin sin ka'naak kou' gwe neem ma nasiik naan Kaibin ma Prenet naan na'ko sin neerr iin. 16 Fini he' anmoufun ek auf fatu', es he' tuaf-tuaf he' anneen ma antoup Kaibin ma Prenet naan nok neer mairinit. 17 Mes Kaibin ma Prenet naan na'ba'a mae'. Es naan te, hin ntahan roo mae' ek sin neerr iin. Ma oros atoni' bian nasusub sin, natuin sin antoup Kaibin ma Prenet naan, sin npori nain Kaibin ma Prenet he' naan. 18 Fini he' anmoufun ek huu ma'aika' hin tnanan, es he' tuaf iin he' anneen narair Kaibin ma Prenet naan. 19 Mes sin ntaisiub nok rasi huma'-huma', nuu nhairinib sin tuar iin ee. Es naan te, taisibu huma'-huma' naan, es he' antita' napoina' Kaibin ma Prenet naan na'ko sin neerr iin, en nai ma Kaibin ma Prenet naan nafua saa'-saa' mae'. 20 Ma fini he' anmoufun nuu auf afa', es he' sin he' anneen ma antoup Kaibin ma Prenet naan, oke te natuin Uisneno Hin roimn ee. Oke te, sin nmoe' moe' kareokot sin, en he' fini he' nafua. Moe'et bian nasuuf no boa' teun, bian no boa' nee, ma bian no nautn es.”
Kaisa' amtoeb paru nok poin-ro'i
(Naiꞌ Lukas 8:16-18)
21 Nai' Yesus na'uab piut na'ko koof' ee tuunn ee. Hin nareta' es anteni' mnak, “En mee! Hi miit aa, oo, ai' mae', karu atoni' nout paur ana', oke te antoob je npaek poin-ro'i? Ai' natuun oe ek haark ee hin nuupn ee! Tita mae', aiko'? Karu natuun oe ek naan, hin npina mae' hen. Atoni' ro nuu natunu' paru ek baer ka'ratas nuu npiin ma ntana'.c 22 Nok ranan naan, rasi he' nahuun te ma'koro', of mamnita. Ma saa' he' oros ai mahini' mae', of mahini'.d 23 Seku naa es anneen ma anheek naan reta' ai hin moufn ii, reko te nateenb ee nnao nkoon.
24 Miteneb mirek-reko'! Karu hi mnilai atoni' hin moe'n ee, atoni' bian of annilei ki en naan msa'. Uisneno of annilei ki nneis na'ko naan amsa'.e
25 Karu es nuu naim Uisneno Hin roimn ee batuur-batuur te, hin mahiin ee of nafaaf gon piut. Mes tuaf he' nrae natuina' mae' Uisneno Hin roimn ee, hin moon gwe of nafaaf gon piut amsa'.”f
Reta' anmatoom nok fini he' nmoin kuun
26 Oke te, Nai' Yesus na'uab anteni am nak, “Uisneno Hin Preent ee na'nae ma nhainua nteni', en he' fini he' makani' ek atoni' hin rene. 27 Maski atoni' naan anfain nuu hin umi, ma fai-manas hin ntuup ma nfeen, hin nnika nain fini naan. Mes fini naan natoor ma na'nae piut. 28 Fini naan anmoin kuuk ek afu, anmurai natoor, na'nae, nasuuf, ma napuin. 29 Karu maak' ee namnaut te, hin tuan ee suma neem nuu noun gwe. Uisneno Hin Preent ii en naan amsa'. Aar he' saa'-saa' ii, Uisneno es anmeup sin.”g
Reta' anmatoom nok fini aan'-ana'
(Naiꞌ Mateos 13:31-32, 34; Naiꞌ Lukas 13:18-19)
30 Oke te, Nai' Yesus na'uab anteni am nak, “Au 'fee 'teni ki reet' es en nai. Uisneno Hiin ee, un-unu' te sin fauk ahaa, mes na'ko neen gwes nuu neen gwes, sin namsai'in piut ma namfau reu'uf. 31 Naan namnees en he' fini he' aan'-ana' ek poa'an. 32 Karu hit tseen fiin aan'-ana' naan, hin na'nae anjair hau kou' reu'uf ek poa'an naan. Tar antea koorn ii nemen ma naimin mafoo' ek naan, ma nakuun' iin.”
33 Nai' Yesus nanoni' sin anpaek ranan en he' naan, natai nok sin mahiinr iin. 34 Hin bijaas npaek reta' oros Hin nanoni' tuaf bian sin. Mes oros Hin nok Hin katoup noon' iin ee, Hin natoon aar he' reta' naan sin moufr iin ii.
Uisif Yesus nasnasab ain ko'u
(Naiꞌ Mateos 8:23-27; Naiꞌ Lukas 8:22-25)
35 Maans ii nmaeb hen, mes Nai' Yesus ek koof' ee tuunn ee fe'. Ma Hin nreun Hin katoup noon' iin ee mnak, “Iim aar kit atraak en neof gwe painn ee.”
36 Oke te, sin nsaen kofa' bu'-bua' nok Nai' Yesus. Ma sin nnao nasaina' too mfaun iin ek naan. Mes bian nsaen ek kofa' biar iin ee. 37-38 Oros naan Nai' Yesus na'tuta' Hin naakn ee ek aak'nuna' ma ntupu nfiin ek koof' ee hin iukn ee. Sin nnaon roo mae' te, ain kou' gwe neem. Ma puat iin anpese' sin, ma oe je ntaam ek Nai' Yesus sin koof' ee, tar antea aar kreo' te naheun. En nai ma katoup noon' iin ee namtau nmaeten. Ma sin neem npoa' nafeen Ee mnak, “Ama'! Amfeen fe'! Hit nuu treem tmaet hen! Mes Ho mfiroir mok kai mae'!”
39 Anneen en naan te, Nai' Yesus anfeen ma ntaar ainn ii mnak, “Musnaas neu!” Oke te, Hin naprenet puat iin naan am nak, “Mimninu' neu!” Oros naan, ainin naan nasnaas nain, ma puat iin naan namninu' nain iin. 40 Oke te, Nai' Yesus nakaina' Hin katoup noon' iin ee mnak, “Nansaa' am es hi mimtau bainesi' en he' naan? Hi mmu'i mae' neer pirsait meu Kau, oo?”
41 Sin aar sin namtaun ma nsanmakan. Ma sin na'uab iin im nak, “Hin he' ai, seku naa? Tar antea ainn ii ma puat iin sin natuin Hin preent ee!”