Uisif Yesus nareko' atoin kamenet nateef nok neon snasat
(Naiꞌ Mateos 12:9-14; Naiꞌ Lukas 6:6-11)
3
Oke te, Nai' Yesus anfaini nteni' ek uim oenen. Anbia' ek naan, Hin niit atoin es, hin nimin bian ee nmaet. 2 Anbia' ek naan amsa', anmui' tuaf bian he' naimin ranan piut-piut nuu nasaan Nai' Yesus. Es naan te, sin nsintiir Gwe, nuu nahinin nak, Hin nareko' atoin kamenet nok neon snaast aa oo, ai' mae'.3 Oke te, Nai' Yesus noe'en atoin niim kamaetes naan, am nak, “Ba'e! Uum nuu mhaek meu matan ai.”
4 Ma Hin nataan sin ok-oke' mnak, “Karu tatuina' hit atoron rais pirsait, hit bisa tmoe' saa' nateef nok neon snasat? Nuu tareko', ai' tareu'? Nuu tareko' atoin kamenet, ai' nuu troor tiis ne?” Mes sin ntoon Je mae'.
5 En nai ma Nai' Yesus Hin neern ee nsuus unmaet, natuin sin natuina' nanesib ma npairoir sin harat anneis na'ko nuu npairoir atoin niim kamaetes naan. Oke te, Hin natoa' ma Hin na'me'en Hin maatr iin ee nuu sin. Oke te, Hin nak atoni' naan am nak, “Ba'e! Amnona' ho niimm aan neem!” En nai ma atoni' naan annona' hin niimn ee. Nok oskeke te, hin niimn ee nareok nain.
6 Oke te, atoni' na'kon partei pirsait Farisi anpoin nnao nasaina' uim oenen naan. Ma sin nnao nateef ma nareon iin nok atoin partei portiik Herodes sin, nuu na'maet Nai' Yesus.
Uisif Yesus nareko' too mfaun anbia' ek nefo Galilea hin niinn ee
7-8 Neot es te, Nai' Yesus nok Hin katoup noon' iin ee nnao nuu nasnaasn aa kreo' ek nefo Galilea hin niinn ee. Mes, natuin too mfaun iin annenen saa' he' Hin anmoe' narair sin, es naan te, too na'kon ruan-ruan nemen nuu natuin Ee. Sin nemen na'kon propinsi Galilea, Yudea, ma Idumea. Bian anteni' nemen na'kon kota Yerusalem, Sidon, ma Tirus. Bian anteni' nemen na'kon noe Yarden painn ee antoom neon-saet. Sin aar sin naimin ranan nuu nateef nok Ne. 9 Nai' Yesus anreek Hin katoup noon' iin ee nuu naimin nfeen Ee koof' es, natuin kamneemt iin, sin namfaun. Hin nroim nuu na'uaba' ek koof' ee tuunn ee, nuu nati' sin kaisa' napeis' Ee, nuu nai' sin ok-oke' niit Ee ma nneen Hin haann ee.
10 Nahuun te, Hin nareko' niit kamenet namfau. Eutun oros ai, aar he' kamenet bian sin anmabeu'un nuu nreo' naan Ee.a 11 Oros tuaf iin he' kaniut-sa'e sin niit Ee, sin ntoofn ok nuu naruur iin ma na'besen ek Nai' Yesus Hin maatn ee. Ma sin anhuun iin im nak, “Ho he' ai, batuur Uisneno Hin Aann aa!”
12 Mes Hin ntaar sin batuur-batuur am nak, “Kaisa' mitonon es-es saa'-saa' he' anmatoom nok Kau!”
Uisif Yesus anpiir Hin katoup noni' tuaf bo'es em nua
(Naiꞌ Mateos 10:1-4; Naiꞌ Lukas 6:12-16)
13 Oke te, Nai' Yesus ansae ek toe'f es. Hin noe'en naan atoni' fauk he' natai nok Hin neern Ee. En nai ma sin neem nuu Ne. 14 Oke te, Hin nruur naan ahaa atoni' bo'es em nua. Hin nak sin im nak, “Au 'ruur ki nuu hi mituina' Kau piut-piut. Au 'reun-haef ki nuu mnao mitoon Uisneno Hin Rais Reko nuu mansian aar sin. 15 Ma Au of a'fee ki kuasat nuu mriu' niut reu'f iin na'ko mansian iin.”
16-19 Katoup noni' tuaf bo'es em nua' iin naan, es he':
nai' Simon (he' Nai' Yesus anteek ee te nak, nai' Petrus),
nai' Yakobus, nok hin oirn ee,
nai' Yohanis, (sin nua sin, nai' Sebedius hin aanr iin aa. Nai' Yesus anteek nanesa' sin nua sin nak, ‘Boanerges’, teer hit uab ii te nak ‘'roots ee na'punu'’.)b
nai' Anderias,
nai' Felipus,
nai' Bertolomeos,
nai' Mateos,
nai' Tomas,
nai' Yakobus (nai' Alfius hin aan mone),
nai' Tadius,
nai' Simon (atoni' na'ko partei portiik Selot),c
ma nai' Judas Iskariot (he' of nuu na'sosa' Nai' Yesus).
Tunggur agama sin nasaan Uisif Yesus nak, niut reu'f iin sin ka'naak kou' gwe es anfee Ne kuasat
(Naiꞌ Mateos 12:22-32; Naiꞌ Lukas 11:14-23, 12:10)
20 Oke te, Nai' Yesus nok Hin katoup noon' iin ee ansaunun nfainin na'kon toe'ef naan. Ma sin ntaman ek umi. Too mfaun iin neem naubun ntein Ee, tar Nai' Yesus sin napeinn aa mae' mainuan nuu nbukaen. 21 Ankius en naan te, tuaf na'uab iin im nak, “Amkius miit Nai' Yesus. Hin nnika' nain Hin tuan ee, ma npairoor je mae'.” Hin ba'aasr iin sin anneen uaba' naan, en nai ma sin nemen nuu nok Ne nfain.
22 Oros naan, tunggur agama fauk na'kon kota Yerusalem, nemen ma natonon kabitin he' naan am nak, “Hi kaisa' mituina' Nai' Yesus. Natuin niut reu'f iin sin ka'naak kou' gwe, he' anteek ee te nak Balsebul, antaam narair ek Hin aon Ee ma nfee Ne kuasat nuu Hin nriu' niut reu'f iin.”d
23 Oros Nai' Yesus anneen en naan te, Hin nhaman nabuaba' sin im nak, “Rasi naan, nmatoup reko mae', tua! Nok ranan mee, niut reu'f iin sin ka'naak kou' gwe bisa nriu' nafani hin tuan ee? 24 Karu anbia' ek pah es, hin too gwe nmatoen ma nmabanan piut, nok ranan mee nuu nati' pah naan bisa nhaek nabaar? 25 Ma ek uum jes hin naann ee, karu sin es-es te anmanau nanan, nok ranan mee nuu nati' sin bisa nhaek nabaran? 26 En naan amsa', karu niut reu'f iin sin anmamusun es nok es, ro sin of anbaits ok. Karu anjair en naan te, sin namreu' nmaeten.
27 Karu atoon' es neem nuu nabaak ai' nasiik bare' ek atoin ma'tane' es hin umi, hin ro nuu nfuut naheren atoin ma'tane' naan nahuun fe'. Oke te, nai' hin napein mainuan nuu nait atoni' naan hin baar iin ee.e
28 En nai ma Au kutoon kain ki: Uisneno nabarab ma npao nuu nnoes nain aar he' mansian iin sin saant iin ee. Ma karu es na'uab na'reu'uf tuaf es, Uisneno anroim fe' nuu nsaok sanat naan. 29 Mes karu es-es na'uab na'reu'uf Uisneno Hin Smanan Akninu', Uisneno nsaok hin saant ee mae', tar antea nabar-baar!”f
30 Nai' Yesus na'uab en naan, natuin sin na'uab na'reu'f Ee mnak, “Tuaf he' ai, anniut-sae!”
Tuaf he' natuina' Uisneno Hin roimn ee, sin he' naan es anjairin Uisif Yesus Hin nonot-asar kamneot iin
(Naiꞌ Mateos 12:46-50; Naiꞌ Lukas 8:19-21)
31 Oke te, Nai' Yesus Hin iinn ee nok Hin oirn iin sin nemen neu umi naan, nuu nateef nok Ne. Sin nhaeken ek mone' ma anreek tuaf nuu noe'n Ee. 32 Oros naan, Nai' Yesus antook ma na'uaba' nok too mfaun anbia' ek uum je naann ee. Oke te, tua reek iin naan antaman ma natoon Ee mnak, “Ama'! Ho ina' nok Ho ori' sin eten mone'. Sin nuu nateef nok Ko, tua.”
33 Mes Nai' Yesus nataah neer haan tanas am nak, “Au ina' ma Au ori'-tata' kamneot, es seku naa?”