Uisif Yesus nareko' atoin hae bua' es
(Naiꞌ Mateos 9:1-8; Naiꞌ Lukas 5:17-26)
2
Ankoon neno fauk en naan te, Nai' Yesus nnao nfain nteni neu kota Kapernaum. Ma kabitin bare naan anmaktoon iin ek mee-mee mnak, Hin et umi. 2 Es naan te, too mfaun iin nemen na'ko mee-mee. Sin naubun naan Ee tar antea umi naan naheun nok too. Ma umi naan hin eonn ee naheun nok too msa'. Anbia' ek naan te, Nai' Yesus natonon sin Uisneno Hin Kaibin ma Prenet. 3 Oros Hin fe' na'uab te, atoni' haa neer atoin hae bua' es, nuu neer je nuu Nai' Yesus. 4 Mes, natuin too mfaun iin naan, sin bisa neer atoni' naan aa mae' ntea Nai' Yesus Hin maatn ee. En nai ma sin nsaen ek uum je tuunn ee, ma sin npukai teifk ee, nataib on ek Nai' Yesus Hin naakn Ee. Oros sin npukai narair teifk ee te, nai' sin nasanu' hae bua' naan nok nain hin naehk ee.a 5 Oros Nai' Yesus niit sin nmoe'en en naan te, Hin nahiin nak, sin npirsain batuur-batuur nuu Ne. En nai ma Hin nak hae bua' naan am nak, “Ba'e! Ho saant iin masako' nrair.”
6 Anbia' ek naan, tunggur agama rais pirsait Yahudi tuaf fauk ntook nokon. Oros sin nneen Nai' Yesus Hin uaban naan, sin nnaeben te reko mae'. 7 Oke te, sin na'uab iin es nok es am nak, “Airoo. Atoni' ai, ro Hin nabrain nuu na'uab en he' ai, joo! Suma Uisneno es bisa nsaok atoni' sin sanat. Mes atoni' ai hin uabn ii naiks on, en he' hin es Uisneno. Hin nakan Uisneno es he' ai!”
8 Mes Nai' Yesus nahiin narair sin neern iin ee. Oke te, Hin nak sin im nak, “Hi kaisa' miteneb en he' naan, tua! 9-10 Mee es ma'kafa' nneis ji? Karu Au kak atoin hae bua' he' ai kak, ‘Ho saant iin masako' narair,’ hi mihini mae' nuu njari oo, ai' mae'? Mes karu Au kak, ‘Amfeen neu! Mait ho 'naehk aan ma mfain neu!’ Karu hin nfeen oros naan te, of nai' hi miit ma mihiin mak, Au he' ai Mansian Batuur-Batuur. Ma Au 'mui' kuasat ma hak nuu 'saok sanat.”
Oke te, Nai' Yesus nak atoin hae bua' naan aa mnak, 11 “Amneen, oo! Oros ai, ho mureok hen! En nai ma amfeen neu, mait ho naehk aan ma mfain neu.”
12 Anneen en naan te, hae bua' naan anfeen nain. Hin nnuun ma nait hin naehk ee, oke te npoi nnao. Aar he' too mfaun iin he' niit nok sin maatr iin, ansanmakan. En nai ma na'uab iin im nak, “Amoo! Hit fe' tiit rasi he' ai, joo! Uisneno ro mapina'-makraha'!”
Uisif Yesus noe'en nai' Lewi nuu natuin Ee
(Naiꞌ Mateos 9:9-13; Naiꞌ Lukas 5:27-32)
13 Oke te, Nai' Yesus nnao nfain nteni nuu nefo Galilea hin niinn ee. Too mfaun iin nemen ma nateef nok Ne, ma Hin nanoni' sin Uisneno Hin Kaibin ma Prenet.
14 Anbia' ek bare naan, anmui' tuaf es, kaann ee nai' Lewi, nai' Alfius hin aan moon je aa. Hin meupn ii es he' nhoik roi-bea ma nfee je nuu kanaa' prenet pah Roma. Oros Nai' Yesus nnao npeo naan te, Hin niit nai' Lewi. En nai ma Hin nak ee mnak, “Ba'e! Uum nuu mutuina' Kau neu!”
Anneen en naan te, nai' Lewi anfeen ma natuina' nain Je.
15 Oke te, Nai' Yesus sin ntook ma nbukaen ek nai' Lewi hin umi, nabua nok nai' Lewi hin partei kahoik roi-bea sin. Anbia' ek naan amsa', anmui' tuaf bian he' atoin Yahudis nteek sin atoin kamoe' reu'uf, nokon nbukaen. Too mfaun iin he' ntook ma nbukaen ek naan, anroimin nuu nneen Nai' Yesus Hin uabn ii.
16 Oros naan, tunggur agama tuaf fauk na'kon partei pirsait Farisi, sin niit Nai' Yesus antook ma anbukae nok kahoik roi-bea sin, ma aar he' kamoe' reu'f iin. En nai ma sin nataan Hin katoup noon' iin ee mnak, “Nansaa' am es hi Tunggur gwe naah-niun nabua nok kahoik roi-bea sin ma kamoe' reu'f iin?”
17 Mes Nai' Yesus anneen sin haann tanas naan, oke te Hin nataah sin im nak, “Atoin kamenet naim kareko' menes, mes atoin ao-mina' nami mae' kareko' menes. Au kuum nuu 'pairoir atoin kamreu'ut. Mes Au kuum aa mae' nuu 'pairoir atoni' he' annaeben hin tuan ii te, namneo.”
Uisif Yesus Hin noni'-taru' fe'u, teta' na'ko atoin Farisi sin noin' iin ee
(Naiꞌ Mateos 9:14-17; Naiꞌ Lukas 5:33-39)
18 Neot es te, tuaf na'kon partei pirsait Farisi, sin nanaah ok. Sin niit nai' Yohanis kasrainit hin katoup noon' iin ee nanaah ok amsa'. Mes sin niit Nai' Yesus hin katoup noon' iin ee nanaah ok aa mae'. Es naan te, tuaf bian na'ko sin, nemen ma nateef nok Nai' Yesus, nuu nataan Ee mnak, “Ama'! Hai minaah om. Nai' Yohanis hin katoup noon' iin ee nanaah ok amsa'. Mes nansaa' am es Ho katoup noon' iin ee nanaah ok aa mae'?”
19 Nai' Yesus nataah sin im nak, “Hi mihiin mirair, karu anmui' feset kaibin, taumn iin sin nanaah ok aa mae', mes sin nbukaen tar namsenen. Karu nai moon je ek naan fe', sin of anbukaen bu'-bua'. 20 Mes karu oors es, tuaf nabaak neer nai mone naan te, hin aon-bian sin neern iin ansuus, nai' sin nanaah ok.”
21 Oke te, Nai' Yesus nareta' uab manpori' es, am nak, “Tita mae' tuaf es nuu npaap sii fe'u nuu baur mnaa'. Fun karu tsaef baru naan, sii fe'u naan of anhuuk gon ma napisu' ntamba bauru mnaa' aan. 22 En naan amsa', tiit es aa mae', nuu narai' tua miin fe'u ek 'saap karapu'. Natuin 'sapa' naan of natboor, ma tua mina' naan of nasturun npoi oke'. En nai ma tua miin fe'u, ro nuu tarai je nuu 'saap fe'u.”b [Nok uaba' naan, Nai' Yesus nanoni' sin im nak, Hin noni'-taru' fe'u, kaisa' sin nseor gwe nok atoin Farisi sin noni' amnaa'.]
Uisif Yesus Hin katoup noon' iin ee anheutun maak-gandum nateef nok neon snasat
(Naiꞌ Mateos 12:1-8; Naiꞌ Lukas 6:1-5)
23 Neot es te, nateef nok atoin Yahudis sin neon oenen, Nai' Yesus sin nnao npeo'on reenn ee sin niinn ee. Ma Hin katoup noon' iin ee anheutun maak-gandum nuu sin nahan.c 24 Atoin Farisi niit sin nmoe'en en naan te, sin nak Nai' Yesus am nak, “Nansaa' am es Ho katoup noon' iin ee antanhai hit atoron rais pirsait? Sin nheutun maak-gandum nateef nok neon snasat! Na'bei' mae' nuu hi mmoe' en he' naan!”
25-26 Hin nataah am nak, “En mee? Hi mimnau mae' reta' na'ko ka'o Daut? Oros naan, nai' Abiatar anjair rais pirsait Yahudi sin ka'naak ko'u. Nai' Daut nok hin tuaf iin namnahan nmaeten tar sin teir iin na'roton. En nai ma sin ntaman ek Uisneno Hin Tener Oenen, ma nait utunu' he' ka'naak pirsait iin nafuat ma nana'at narair sin neu Uisneno, ma sin nbukaen. Mes, kamneon ii, suma ka'naak pirsait iin es bisa nbukae sin, mes tua teta' te, bisa mae'. Oke te, nai' Daut sin nbukaen, mes tiit es aa mae', nuu nakaina' sin.”d
27 Oke te, Nai' Yesus na'uab nuu sin anteni am nak, “Nati' kaisa' mnika' mak, Uisneno na'paba' neon snasat nuu nfee kareokot nuu nturun ma nbaab mansian aar kit. Mes Hin nmo'e mae' mansian ii nuu natuin ahaa neon snasat hin atoorn iin. 28 Au he' ai, Mansian Batuur-Batuur. Au 'mui' hak nuu 'reek mansian nuu bisa nmeup saa'-saa' anbia' ek neon snasat. Ma Au 'mui' hak amsa' nuu taar mansian nuu kaisa' nmeup saa'-saa' anbia' ek neon snasat.”