Uisif Yesus Hin Rais Reko
natuin
Nai' Markus hin tuis
1
Ai rais reko anmatoom nok Uisneno Hin Aann aa.a Hin kaann aa Yesus Kristus, he' Uisneno nruur ma nreek nain Je na'ko un-unu'. Hin reta' ai, na'uub on en nai:Nai' Yohanis Kasrainit anfei ranan nuu Uisif Yesus
(Naiꞌ Mateos 3:1-12; Naiꞌ Lukas 3:1-18; Naiꞌ Yohanis 1:19-28)
2 Nahuun na'ko Nai' Yesus nait Hin mepu, Uisneno anreek-haef atoon' es neem nahuun. Atoni' he' naan, kaann aa nai' Yohanis. Nai' Yohanis he' ai, ro nuu neem nahuun nuu nfei ranan nuu Nai' Yesus. Mes nahuun na'ko nai' Yohanis nuu neem, Uisneno ansonu' nahunun Hin mafefa kninu' tuaf es, kaann aa nai' Yesaya. Na'ko afin kahunut, nai' Yesaya antui narair, nak en nai':
“Amneen, oo! Au of a'reek-haef Au tuaf es, nuu nnao nfei ranan neu Ko.b
3 Haef naan of nnao nuu baer rumun, nuu nhunun ma ankoa' ma na'uaba' mnak:
‘Usi nuu nkoen On neem! Bifee-atoni', iim nuu tabarab ranan ma taroitin bare!
Iim nuu taneo ma tanoon ranan, nuu tseen Gwe.”’c
4-6 Sin bijasa nteek nai' Yohanis, nak ‘kasrain atoni'’. Hin natua ek baer rumun. Hin paekn ee anmoo' je na'ko bjakaes unta hin funun. Hin paus fuut' oe nmoo' je na'ko pasu. Hin neuk sisi knamat ma niun oin hau. [Nai' Yohanis hin 'moinn ii, nahuum en he' mafefa kninu' ka'o Elia afin unu'.]d
Oros naan, too mfaun na'kon kota Yerusalem, ma propinsi Yudea afan naann ii, sin nemen ma nateef nok nai' Yohanis ek hin baarn ee. Sin nemen nuu niit nok sin maatr iin ee ma annenen nok sin ruikr iin ee noni'-taru' na'ko nai' Yohanis. Hin nsaksii ma natonon sin nak, “Hi ro nuu mmanaku' ma misaina' hi sanat ma penu sin ok-oke', nuu nati' Uisneno nnoes nain hi saant ii naan. Oke te, hi ro nuu misrain fe', nuu anjair tanar am nak, hi mmarame' mrair hen mok Uisneno.”
Oros sin nneen narairin en naan te, sin nmanaku' sin saant iin ee, oke te sin nana'at sin tuar iin ee neu nai' Yohanis, ma hin nasrain sin ek noe Yarden.
7 Hin na'uab nuu sin im nak, “Noka'-feun ate, Atoon es of nuu neem. Hin ma'tane' nneis na'ko kau. Au masoi'ik kau mae', maski bait au 'jari haa Hin aan renu ma aan reka', au kumnees kok Ne mae'.e 8 Au 'manoek ii suma nuu kusrain ki 'paek oe, mes Atoni' naan of anmoe' nneis na'ko kau. Fun Hin of natuab ma namoinib ki nok Uisneno Hin Smanan Akninu'.”
Nai' Yohanis nasrain Nai' Yesus
(Naiꞌ Mateos 3:13-17; Naiꞌ Lukas 3:21-22)
9 Neot es te, Nai' Yesus neem na'ko ruan Nasaret et pah Galilea, nuu nateef nok nai' Yohanis. Ma nai' Yohanis nasraan Je ek noe Yarden. 10 Ma oros Nai' Yesus anpoi na'ko oo je, nok oskeke te, neen gwe natfe'i. Oke te, Uisneno Hin Smanan Akninu' ansaun neem neu Ne, nahuum en he' koor kefi. 11 Ma hanaf Uisneno npoi neem na'ko neen gwe mnak,
“Ho he ai, Au Aan nera'.
Ho es amhairiin Au neerk ii.”f
Niut reu'f iin sin ka'naak kou' gwe ansoba' Uisif Yesus anbia' ek baer rumun
(Naiꞌ Mateos 4:1-11; Naiꞌ Lukas 4:1-13)
12 Oke te, Uisneno Hin Smaann ee nheer neer Nai' Yesus nuu baer rumun. 13 Anmui' mui' fui ek bare naan. Nai' Yesus nbia' ek bare naan fai boa' haa ma neno boa' haa. Anbia' ek bare naan amsa', niut reu'f iin sin ka'naak kou' gwe neem ma nsoba' Nai' Yesus nuu natuin hin uabn ee, mes na'bei' Je mae'. Oke te, Uisneno Hin kameupt iin na'ko sonof neno tunan nemen nuu natuta' ma nabhae' Nai' Yesus ek rais aof ma smanaf.
Uisif Yesus nnao nuu propinsi Galilea nuu nsaksii ma natoon Uisneno Hin roimn ee
(Naiꞌ Mateos 4:12-17; Naiꞌ Lukas 4:14-15)
14 Anbia' ek oors es, he' sin nataam narair nai' Yohanis kasrainit ek bui, Nai' Yesus nnao nuu propinsi Galilea, nuu natoon Rais Reko na'ko Uisneno anbia' ek naan. 15 Hin na'uab am nak,
“Amneen, oo! Oros ai, Uisneno Hin oors ee antea hen.
Oros ai, aar he' bifee-atoni' bisa nahinin nak, Uisneno nnaa' prenet.
En nai ma hi ro nuu mi'piis ma mi'teu'n om mi'ko hi sanat ma penu sin,
nuu mtebi mfain ma mituina' Uisneno.
Oke te, ampirsai meu Hin Rais Reko ai, neu!”g
Uisif Yesus noe'en ka'tiif-kai ika' nuu natuin Ee
(Naiꞌ Mateos 4:18-22; Naiꞌ Lukas 5:1-11)
16 Neot es te, Nai' Yesus annao nreuk nefo Galilea hin niinn ee. Hin niit atoni' nua. Es hin kaann ee nai' Simon, nok hin oirn ee nai' Anderias. Sin nua sin ansaran ika'. Mepu naan, sin meep gwe neno-neno. 17 Nai' Yesus noe'en sin im nak, “Hoe, ba'e sin! Iim nuu mituina' Kau neu! Hi kamnaim ika' ki, mes na'ko oros ai, Au nuu kunoni' ki nuu mjair kamnaim tuaf neu pukun Uisneno.” 18 Anneen narairin en naan te, sin nua sin nasaina' sin saar-iik' ee, ma nnao natuina' nain Je.
19 Oke te, Nai' Yesus nnao nkoon kreo'. Hin niit nai' Sebedius hin aanr iin tuaf nua. Aan 'uun oe hin kaann ee nai' Yakobus, ma hin oirn ee, kaann ee nai' Yohanis. Sin nua sin nabarab sin pua'at anbia' ek koof' es naann ee. 20 Nai' Yesus noe'en sin im nak, “Hoe, ba'e sin! Iim nuu mituina' Kau neu!” En nai ma sin nua sin nnao nasaina' sin aamn ee nok hin kameupt iin ek koof' ee, ma sin natuina' nain Je.
Uisif Yesus anriu' napoina' niut reu'uf na'ko atoon' es anbia' ek kota Kapernaum
(Naiꞌ Lukas 4:31-37)
21 Oke te, Nai' Yesus nok tua haa' iin naan, sin nemen ntean kota Kapernaum. Neno naan nateef nok atoin Yahudis sin neon oenen.h En nai ma Nai' Yesus antaam anbia' ek uim oenen ma nanoni' tuaf anbia' ek naan. 22 Oros sin nneen Hin uabn ii, sin nsanmakan, fun Hin nahiin batuur-batuur noni' naan hin aafn ii. Naan teta' na'ko atoin Yahudis sin tunggur agama sin.i
23 Oros naan, anmui' atoon' es, anniut-sae. Hin ntaam nok ek uim oen ee msa'. Oke te, nitu ek atoni' naan anhunun 24 am nak, “Hoe! Yesus, atoin Nasaret! Ho uum nuu msero' saa' mok kai? Ho uum nuu mureu' kai, aika'? Hai mihiin Ko. Ho he' naan, Atoni' he' Uisneno anba'an naan Je nuu nreek Ee neem na'ko un-unu'. Ho he' ai, Uisneno Hin Atoni Kninu' he' nmui' saant aa mae'.”
25 Mes Nai' Yesus naskara' atoni' naan am nak, “Kaisa' mufeef! Ho mpoi neu mu'ko atoni' ai!”
26 Oke te, niut reu'uf naan anhasu' naheren atoni' naan. Oke te, hin nhunun ma npoi na'ko atoni' naan. 27 En nai ma kabitin uim oenen naan ansanmakan. Ma sin na'uab iin im nak, “Amoo! Saa' na es he' ai! Hin naprenet niut reu'uf iin nuu npoin, ma sin nneen Ee ma natuin Hin uabn ii. Ai noin' feu' gwa, oo? Atoni ai na'uab te ro ma'tane'!”
28 En nai ma sin nmurain nsaksii ma natoon moe'et na'ko Nai' Yesus, na'ko ruan nuu ruan annoon om nateef ek propinsi Galilea.
Uisif Yesus nareko' nai' Simon Petrus hin iin baba', ma bian antein
(Naiꞌ Mateos 8:14-17; Naiꞌ Lukas 4:38-41)
29 Oros sin npoin na'kon uim oenen naan, Nai' Yesus nnao en nai' Simon ma nai' Anderias sin umi. Nai' Yakobus nok nai' Yohanis nookn aa msa'. 30 Nai' Simon hin iin baabn ee anmainiin, ma antuup ek harak. Oros Nai' Yesus nok Hin katoup noon' iin ee antaman ek umi naan, atoon' es neem ma natonon nai' Simon am nak, “Ho iin baba' anmainiin.”
31 En nai ma Nai' Yesus nnao nkius bifee mnais kamaininit naan. Hin nnaa' hin niimn ee, ma anfiit nafeen' ee. Oros naan, hin nareok nain. Oke te, bifee mnasi' naan anpoi ma ntuthae sin.
32 Oros maans ii nuu nmouf, too mfaun iin neirin aar he' kamenet, ma aar he' kaniut-saes. Sin neer sin neu Nai' Yesus ma antoitin turun-babat nuu nareko' sin. 33 Aar he' too mfaun kota naan nemen ma naubn aan Ee ek uum je eonn ee. 34 Too mfaun iin naan, kamenet huma'-huma', ma Nai' Yesus nareko' sin ok-oke'. Ma Hin nriu' napoina' niut reu'f ii namfau. Mes Hin nfee mainuan aa mae' nuu niut reu'f iin na'uab iin, natuin sin nahiin Je.
Uisif Yesus nnao npuun nateef nuu ruan bian, ma natoon Rais Reko na'ko Uisneno
(Naiꞌ Lukas 4:42-44)
35 Neis noi nmeu' te, Nai' Yesus anfeen ma nnao nasaina' umi naan. Hin nnao en baer rumun ma ma'koro', nuu n'oenen ma na'uab nok Uisneno. 36 Oros nai' Simon nok hin aon-bian sin anfenen, sin niit Nai' Yesus aa mae'. En nai ma sin nnao naam Je. 37 Oros sin nateef nok Ne te, sin natoon Ee mnak, “Ama'! Too mfaun iin naim Ko. Atkoen ok tfain neu, tua.”
38 Mes Hin nataah am nak, “Reko msa'. Mes reko nneis, hit tnao teu rua paumaka' bian anteni' fe', nuu Au kutonon sin Rais Reko msa'. Natuin Au meup uuf ii, es he' naan.”
39 Oke te, Hin nnao npuun nateef anbia' ek propinsi Galilea, nuu nsaksii ma natoon Rais Reko na'ko Uisneno anbia' ek uim oen iin mese'-mese'. Anbia' ek naan amsa', Hin nriu' napoina' aar he' kanan niut reu'f iin na'ko kameent iin.j
Uisif Yesus nareko' atoin kameen kusta tuaf es
(Naiꞌ Mateos 8:1-4; Naiꞌ Lukas 5:12-16)
40 Oros naan, anmui' atoin kameen kustak tuaf es neem nuu Nai' Yesus. Hin nri'tuu ma antoit turun-babat na'ko Nai' Yesus am nak, “Ama'! Amturun maan kau, tua! Au kuhiin Ho bisa mureko' au meens ii, nuu nati atoni' kaisa' nmai'niis naan nteni' kau. Asar Ho mroim, tua.”
41 Ma Nai' Yesus ankasian atoni' naan, en nai ma Hin annona' Hin niimn ee ma nree' gwe. Hin na'uab am nak, “Au 'roim! En nai ma Au kureko' ko neu!” 42 Nok oskeke te, menes naan namneuk nain, ma hin nareok nain oros naan amsa'. 43 Oke te, Nai' Yesus anreun atoni' naan nuu nfain, ma namnaub ee, 44 mnak, “Amneen murek-reko'! Au kutoon kain ko! Ho mureok mfain hen, mes na'bei' mae' nuu mutonon es-es. Ho ro nuu mutuina' ka'o Musa hin prenet. En nai ma ho mnao muhuun meu ka'naak rais pirsait Yahudi nuu nati' hin npairikis ho aom, nuu hin nahiin batuur-batuur nak, ho mureok mfain hen, ai' mae' fe'? Oke te, ho meir fua-'turu' nuu anjair tanar nak, ho mtoit makasi, nuu nai too mfaun iin nahinin im nak ho mureok mfain batuur-batuur.”l
45 Mes atoni' naan anpoi nnao ma nsaksii na'ko baar jes nuu baar jes. Es naan te, too mfaun iin naimin ranan nuu nateef nok Nai' Yesus, tar antea Hin bisa nakriir' on aa mae' ek kota. En nai ma Hin nbia' ek bare-bare he' rumun ma ma'koro', he' na'roo na'ko kota. Mes too mfaun iin na'kon mee-mee, nemen ma naim Je nuu nateef nok Ne.