Yakob nafada anan nala esa-esak hadan ma baba'e-babatin
49
Basa boe ma Yakob nadenu noke basa anan nala. Ala mai, boe ma nafada sala nae, “Ana nggala ei! Mai fo makabubua deka-deka mia au nai ia dei. Au sangga afada ei, esa-esak dala sodan nai fai makabuin.” 2 Boe ma Yakob mulai nafada memak anan nala nae,“Leo iak! Yakob anan nala! Mai fo mambadeik e'o mala au.
Mamanene ei amam Israel sangga kokolak.
3 Ruben! O ia, au ana ulung! O ia, au tete'e-aing, ma au lima konang. Hataholi fee hadak nalan seli neu o. 4 Tehuu o dalem lofo anak nanggongga, ta bubuluk o hihiim ndia bee, sama leo lii fo nggengge neuk neu-mai. Kada nggengge neuk, o muu sunggu mua au saong Bilha, fo tao manggenggeo amam koin. Huu ndia de o pangga ka'am tuda memak!
5 Simeon ma Lewi! Ei dua nggei leo esak! Ei dua nggei lofo anak mambue fe'a tafa, fo tao hataholi la doidoso. 6 Ei namahokom, ndia tati ketu sapi ei mbimbiin, losa ala lendo nai kada mamanan. Ma ei manggalaun bali, ndia ei mamenggu nisim mala, bei fo ei tao misa hataholi. Huu ndia de au ta nau mbali ei kokolam mala. Au boe oo, ta nau seseok ua ei dede'am mala. 7 De hatematak ia, au sumba-soo ei manggalaum fo sudi selik ndia so! Ma ei nasam fo ta nameda kasian faa boe. Dei fo ei musi lemba aom ei manggalaum ndia. Dei fo Manetualain mbia ei numbu-sadum mala kii-konak. Boe ma ala leo latanggelak lai sudi bee, nai dae Israel.
8 Yahuda!O nadem ndandaan nae, ‘koa’. O ka'a-fadim mala dei fo koa o, ma kauk fee hadak neu o. O boe oo, tuni-ndeni mala o musum mala, losa ala ta bisa so'uk langgan nala. 9 O ia sama leo meo-asu mulik fo ana seli, fo bisa sangga aon nana'ak. O boe oo, sama leo meo-asu mane, fo nakambimbii aon fo sangga neu sunggu; ta hambu esa nambalani dunggu o. O boe oo, sama leo meo-asu ina, fo nanea anan; ta hambu hataholi nambalani neu babalik. Leo ndiak boe, hataholi bii ma ta lambalani tao mata-matak neu o. 10 Dei fo o to'u palenda. O numbu-sadum mala to'u palenda latutunggak boe, losa dei fo hambu esa naena haak lena basan, fo nanggatuuk to'u palenda ndia. Boe ma basa hataholi nusak kala, lakatele ma lamanene neu Ndia. 11 Dei fo o masoda no namahokok. O hii hata, na hambun! O sangga tao sudi hata, na dadi! Huu o bandam, ma osim buna-boan nala, boe lamano'u losa nana ngganggalik. 12 O nana'a-nininum mala malada-malada, losa ta mana basak.
13 Sebulon! O dae pusakam maloa hiak, ma dekak no tasi, losa natoo no kota Sidon. Ofak kala leme sudi bee mai, fo nggali naka no sodak lai o namom.
14-15 Isaskar! O ia, sama leo banda keledei balakaik, tehuu o langga batum ana seli. Mete ma o sunggu nai dalak,a na, see bisa nakaseti o, fo la'ok makandoo. Tehuu mete ma o mita nggolo neulauk nai ele so, na, ta madenu boe oo, o lemba mala o buan fo la'ok muu leo. Huu ndia de, o leo ndiak leo!
16 Dan! O nadem ndandaan nae, ‘mana maketu’. Boe ma o ia, ma o numbu-sadum mala sila dei fo laketu o leom dede'an nala, ta mana benu selik. Te o leom ndia, esa neme nusa Israel asa mai. 17 O ia boe oo, malelak sama leo mengge kalasok, fo sunggu nai dalak bifin. Mete ma hataholi sa'e ndala nesik ndia, na, nggengge neuk, o kiki mala ndala ei mbimbiin, losa hataholin tuda.
18 Ou MANETUALAIN! Au hule-haladoi fo O masala'e mala ai basa nggai.
19 Gad! O nadem liin hihii sama leo ‘sambu’. Dei fo na'o la sambu o, tehuu o sambu masafali sala.
20 Aser! Dei fo o osim buna-boan neulau hiak, losa o bisa tao kokis malada fo manek kala hasa nai o.
21 Naftali! O ia, sama leo nusa ina fuik, fo ta hambu hataholi bisa heti o. O boe oo, bonggi mala anak kala mana'a hiak.
22 Yusuf! O sama leo ai longgek fo nasoda dekak oe matak. O ba'en nala, nama leni tembo madema lain leu.b 23 Hambu hataholi mbia sila dale hedin neu o, sama leo musu kou o boe. 24 Tehuu Manetualain fo au akaluku-akatelek ndia, tulun o. Huu ndia de Ana tao natea o limam, losa o bisa kou masafali sala, mae neme dook mai. O bisa senggi sala, huu Manetualain tulun nala o, memak Ndia koasan ana seli tebe! Huu ndia de au asalai neu Ndia. Huu Ndia ndia nanea au. 25 Dei fo Ndia nanea o boe. Ma Ana fee baba'e-babatik neu o, baba'e-babatik neme lalai mai, baba'e-babatik neme dae-bafok mai, ma baba'e-babatik fo bonggi anak makadotok, ma ta kamahedik kala. 26 Letek kala ta mopo sala. Ma au baba'e-babating fee o ia, no'un lena heni basa letek kala! Ela basa baba'e-babatik ia, nggangga neu o, huu o lena heni neme basa ka'a-fadim mala mai.
27 Benyamin! O kambalanin sama leo busa fui mana ndoek. Bei fafai anak, ana neu sombu fo humu nala nana'an so. Tehuu mete ma le'odae, na, ana neu baba'e nana'a elak kala, neu anan nala. O numbu-sadum mala, ana seli leo ndiak boe!”
28 Leo ndia leo, Yakob nafada memak anan nala dala sodan nai fai makabuin, esa-esak no ndia numbu-sadun nala. Basa sila, lakonda leo Israel sanahulu dua.
Yakob maten
29-30 Basa boe ma Yakob noke anan nala helu lae, “Ta dook bali, te au mate so. Mete ma au mate, na, ei musi miu matoi au nai ba'i Abraham laten. Lates ndia nai luak, dekak no nggolo Makpela ma Mamre, nai dae Kana'an. Makahulun ba'i Abraham hasa nala luak ndia no osin, fo tao ndia mamana laten. Ana tifa ketun neme hataholi leo Het mai, nade Efron. 31 Nai ndia, ala latoi ita ba'in Abraham ma bei Sara, au amang Isak, ma au inang Ribka. De ei musi matoi au nai ndia boe, neu au saong Lea boboan. 32 Ei boso mafalende matoi au neu luak ndia, fo ba'i Abraham hasa nalak so.”
33 Yakob kokolak nate'e leo ndiak, boe ma ana sunggu seluk neu koi lain, boe ma maten.