4 Basa fai kahitu hulun, boe ma Yusuf nafada pegawen nala nae, “Mamanene! Au oke fo ei mini au kokolang ia, neu manek mae leo iak: 5 ‘Neu faik fo au amang sangga mate so, ana noke fo au uu atoi ndia mbombolan nai dae Kana'an. De au oke manek nakambo'ik au uu atoi au amang. Basa bei fo au fali ia mai.”’

6 Manek namanene leo ndiak, boe ma nataa nae, “Mete ma o helu amam leo ndiak so, na, muu matoin nai ele leo.”

7 Boe ma Yusuf neu natoi aman. Hataholi no'uk leu tunggan boe. Fo ndia basa manek pegawen nala ma basa hataholi ina-huuk leme Masir mai. 8 Yusuf ka'a-fadin nala, ma basa hataholi mana tao uen nala, tungga leu latoi Yakob boe. Elak kala manai Gosen, kada sila saon nala ma ana kadi'ik kala, ma bandan nala. 9 Soldadu no'uk tungga boe. Hambu mana pake nggili, ma mana sa'e ndala. Huu mana tunggak kala sila, no'un seli, de bubuak mana la'o tungga mamates nalun seli.

10 Basa sala la'ok losa ala lena lee Yarden, nai mamanak esa nade Atad. Hataholi lateme mai femba hade lai ndia. Yusuf asa lamatani lakaleleu aman mamaten leme mamanak ndia. Boe ma ala be'e faik hitu bali.

11 Ledo-eik hataholi Kana'an malai ndia lita ala dale hedi leo ndiak, boe ma ala kokolak lae, “Wei! Ei mita dei. Hataholi Masir asa tatao bebe'en, dale hedin ana seli! Ala lamatani losa leo ndiak.” Huu ndia de ala foi mamanak ndia, nade Abel-Misraim. Ndandaan nae, ‘hataholi Masir asa dale hedin’.

12 Boe ma Yakob anan nala tao tungga sama leo sila hehelun. 13 Boe ma ala ko'o leni Yakob mbombolan, fo leu latoin nai luak dekak no nggolo Makpela ma Mamre. Abraham hasa nala mamanak ndia so, neme hataholi leo Het mai, nade Efron, fo ana taon dadik sila mamana laten.

14 Yusuf no ka'a-fadin nala latoi late'e aman, boe ma ala fali Masir leu. Leo ndiak boe no basa hataholi fe'ek kala mana tungga leu latoi.

15 Ledo-eik ala losa Masir, Yusuf ka'an nala mulai bii. Huu sila aman taak kana so bali, de ala kokolak lae, “Wei! Ei dudu'a dei! Leo Yusuf bei nambeda dalek neu ita, fo ana bala ita tatao manggalaun neu ndia, na, leo bee?” 16 Boe ma ala lala halak fo haitua halak fee Yusuf lae leo ia: “Ama wakil. Ai bei masaneda faik fo ita aman bei kasodak, ana nadenu ai 17 fo mafada ama mae, ‘Yusuf musi lilii heni ka'an nala salan. Huu makahulun ala tao manggalauk neu ndia so.’ Ai boe oo, masaneda ita aman nakaluku-nakatele neu Manetualain neme makahulun mai. Ai dadik Manetualain atan nala boe. Huu ndia de hatematak ia, ai mai moke ambon, huu ai basa nggai tao masala ama so.”

Yusuf namanene leo ndiak, boe ma namatani.

18 Basa boe ma ka'an nala mai aon, de sendek leu matan, ma kokolak lae, “Ela ama tao ai dadik ama atam leo.”

19 Tehuu Yusuf nafada sala nae, “Ka'a nggala ei! Ei ta paluu bii bali! Kada Manetualain mesak kana naena haak fo huku hataholi. Tehuu au, taa. 20 Makahulun, memak ei mala halak, fo sangga tao manggalauk neu au so. Tehuu Manetualain tao nasafali ei maksut manggalaum, fo Ana taon dadik neulauk. Huu ndia de Ana so'u nala au dadik hataholi ina-huuk, fo hataholi no'uk bisa lasoda. 21 De hatematak ia, au afada ei fo boso bii bali. Huu au helu, dei fo au mbali ei, ma basa ei anam mala.”

Yusuf kokolak nalolole leo ndiak, boe ma ana tao natesa ka'an nala dalen.

22 Basa boe ma Yusuf leo nakandoo nai Masir, no basa ka'a-fadin nala. Ana nasoda losa teuk 110. 23 Ana bei nita Efraim umbu-anan nala. Ma mesak kana nakaboi Manase umbun nala boe, fo ndia Makir anan nala,

24 Yusuf nafada ka'an nala nae, “Ka'a nggala ei! Au amemedak, au fai mamateng deka-deka so. Tehuu au amahele, neu ko Manetualain nakaboi ei. Ndia ndia, dei fo noo ei kalua mima nusak ia mai. Ndia boe oo, nalangga ei fali mini nusak fo Ana soo sangga fee ba'i Abraham, ba'i Isak, ma ama Yakob.” 25 Boe ma Yusuf noke bobonggin nala soo lae, “Ei musi helu au. Mete ma losa faik fo Manetualain noo falik ei, mini nusak ndia miu, na, ei musi mini au dui-loung boe.”

26 Basa boe ma Yusuf maten neme Masir, neu faik fo teuk 110. Boe ma ala tao akidook neu mbombolan, de ala taon neni kopan dale neu.