Yakob noke baba'e-babatik fee Yusuf anan Efraim ma Manase
48
Ta dook bali, boe ma hataholi mai nafada Yusuf nae, aman namahedi belak so. De noo anan dua sala, fo Manase ma Efraim, fo leu tilo ba'in Yakob. 2 Neu faik fo Yakob namanene Yusuf asa mai so, boe ma nakatataka aon fo nanggatuuk neu koi lain.3 Boe ma ana nafada Yusuf nae, “Ana Yusuf! Fai maneuk, Manetualain fo Mana Koasa Nai Lain Seli, natudu aon neu au neme nggolo Lus nai dae Kana'an. Ana helu au neme ndia 4 nae, ‘Dei fo Au tao o umbu-anam mala boe lamano'u, fo o numbu-sadum mala, dadik hataholi nusa ina-huuk. Dei fo Au fee nusak ia neu o numbu-sadum mala, fo dadik sila pusakan losa dae-bafok fai babasan.’
5 Hatematak ia, o anam Efraim ma Manase haak leo iak: Au uni Masir uu, huu hambu dua sala so. Mae leo ndiak boe oo, hatematak ia au taok dua sala leo au ana heheling, sama leo Ruben ma Simeon. 6 Tehuu mete ma o hambu anak bali, na, ndia o anam leo. Au ta taok sila, au anang. De ela ala simbo sila pusakan, neme sila ka'an Efraim ma Manase mai leo. 7 Au tao leo ndiak, fo asaneda o inam Rahel. Neu faik fo ita fali teme Mesopotamia mai, teni Kana'an teu, o inam bonggi lenggu neme dalak dekak no nggolo Efrata, nai dae Kana'an. Faik ndia, au dale hedi alan seli! Boe ma au atoin neu dalak bifin, fo sangga neni nggolo Efrata neu.” (Nggolok ndia, hatematak ia ala foin, nade Betlehem.)
8-10 Yakoba kokolak basa, boe ma ana botik matan, de nita Yusuf anan nala lai ndia. Boe ma natane Yusuf nae, “Wei! See anan nala ia?”
Boe ma Yusuf nataa nae, “Sila ia, kakanak kala fo Manetualain fee au neme Masir.”
Basa boe ma Yakob kokolak nae, “Mete ma leo ndiak, na, o mua sala deka-deka lo au, fo au hule-haladoi oke Manetualain fee sala baba'e-babatik.” Yakob lasik so ma matan nala kalambua so. Huu ndia de ana ta bisa nita no malole bali. Yusuf noo anan dua sala, leu deka-deka lo Yakob, de ana holu ma idu sala. 11 Boe ma ana kokolak no Yusuf nae, “Doo basa ia, kada au dudu'a ae, au ta bisa atonggo ua o bali. Tehuu hatematak ia, Manetualain tao lena bali, losa au bei bisa ita o anam mala boe.”
12 Basa boe ma Yusuf ko'o heok anan nala leme Yakob mai,b boe ma ana sendek matan losa dae, neu aman matan. 13 Basa boe ma Yusuf fo'a, de ana fee anan nala lambadeik deka-deka lo aman. Ana tao ana kaesan, Manase, neu Yakob boboa konan; ma ana kaduan, Efraim, neu Yakob boboa kiin. 14 Tehuu ledo-eik Yakob sangga lalaa liman, fo noke baba'e-babatik fee dua sala, ana lali lima konan fo taon neu Efraim langgan, ma ana tao lima kiin neu ka'ak langgan. 15 Boe ma ana hule-haladoi noke Manetualain fee baba'e-babatik neu Yusuf nae,
“O ba'im Isak aman Abraham,
ma ba'im Isak mesak kana,
dua sala tungga lakandoo Manetualain hihiin.
Manetualain boe oo, nakaboi au neme au muli-solung mai losa hatematak ia.
16 Ana nakambo'ik au neme basa soe mata-matak mai so.c
De au boe oo, oke fo Ana fee baba'e-babatik neu kakanak kala ia, ma numbu-sadun nala.
Ma mete ma ala hule-haladoi neu Manetualain,
na, ala ta lilii seseik ba'i Abraham, ba'i Isak ma au nadeng.
Fo suek numbu-sadun nala boe lamano'u,
fo dadik hataholi nusa ina-huuk nai dae-bafok ia.”
17 Tehuu neu faik fo Yusuf nita aman tao lima konan neu Efraim langgan, boe ma ana to'u nala aman liman, fo lalin neu Manase langgan. 18 Ana nafada aman nae, “Ama! Boso tao leo ndiak, huu ndia ndia fadik. Ndia ta ka'ak. Ama musi tao lima konam neu ka'ak Manase langgan, huu ka'ak haak ndia.”
19 Tehuu aman Yakob ta nau. Boe ma ana nae, “Ana, ei! Memak au bubuluk. Huu dei fo Manase dadik ana seli, ma ndia numbu-sadun nala boe lamano'u, losa dadik hataholi nusa ina-huuk. Tehuu fadin Efraim, dei fo ana seli lena heni ka'an. Ma ndia numbu-sadun nala, dei fo makadotok nalan seli losa ala dadik hataholi nusak no'uk fo ana seli.”
20 Basa boe ma ana nafada kakanak kaduak kala sila nae, “Mete ma hataholi Israel asa loke Manetualain fee baba'e-babatik neu hataholi, na, dei fo ala seseik ei dua nggei nadem boe lae, ‘Ela leo bee na, Manetualain fee o baba'e-babatik, sama leo Ana fee baba'e-babatik neu Efraim ma Manase.”’
No leo ndiak, Yakob boe oo seseik Efraim naden nakahuluk neme Manase naden mai.
21 Basa boe ma Yakob nafada Yusuf nae, “Ana, ei! Ta dook bali, te au mate so. Tehuu dei fo Manetualain tulun ei, boe ma noo falik ei mini ei bei-ba'im mala nusan miu. 22 Tehuu hatematak ia, au fee o lena heni au fee o ka'a-fadim mala. Huu au fee akadaik o letek manai dae Kana'an, fo makahulun au amoa alan neme hataholi Amori la mai, neu faik fo au atati ua sala.”