Mane Masir fee Yusuf bobonggin nala dae
47
1-2 Basa boe ma Yusuf no tolanoon lima, leu lasale manek. Yusuf nalelelak kasa nae, “Ama manek! Au amang ma au ka'a-fadi nggala, leme Kana'an mai so. Ala mai lo sila bi'iae-bi'ilombon, sapi, ma basa buan nala. Hatematak ia basa sala lai dae baba'ek Gosen so.” 3 Boe ma manek natane nae, “Ei uem hata?”
Ala lataa lae, “Ai ia mana hoo sama leo ai bei-ba'in nala. 4 Hatematak ia, nai dae Kana'an, fai hanas ana seli losa ta hambu nana'ak ma na'u bali. Huu ndia de ai mini nusak ia mai, fo leo tataak. Ai boe oo, mini ai bandan nala. Hatematak ia, ai moke ama manek fo makambo'ik ai leo nai dae baba'ek Gosen, fo makaboi ai bandan nala lai ndia.”
5 Boe ma manek nafada hihiin neu Yusuf nae, “Hatematak ia, o amam ma ka'a-fadim mala lai ia so. 6 De ala bole tao nusak ia sama leo sila nusa hehelin. Au bubuluk, dae Gosen ndia, dae baba'ek fo neulaun seli nai nusak ia. De malolenak, ala leo lai ele leo. Ma mete ma neme sila mai, hambu mana lakaneni lalelak banda no malole, na, ela fo ala lakaneni au enang lai ndia boe.”
7 Basa boe ma Yusuf nalelelak aman neu manek. Boe ma Yakob hule-haladoi noke fo Manetualain fee baba'e-babatik neu manek.
8 Manek natane Yakob nae, “Ama teuk hida so?”
9 Yakob nataa nae, “Au asoda teuk 130 so, ma au ta leo ahele nai mamanak esa. Au bei-ba'i nggala leo ndiak boe. Mete ma nakasaman no sila, na, au teung memak keke'uk lena heni sila, tehuu henuk no doidosok.” 10 Boe ma Yakob nate'a manek. Tehuu ana bei ta la'o, noke Manetualain fee baba'e-babatik neu manek bali.
11 Boe ma Yusuf tungga manek kokolan, de ana natudu fee sala mamanak nai dae baba'ek Gosen. Mamanak ndia neulaun seli. (Dei fo ala foi mamanak ndia, nade ‘Rameses’.) Basa boe ma Yusuf aman no ka'a-fadin nala, leo lakandoo lai ndia. 12 Basa boe ma Yusuf sadia nana'ak fo fee aman, ka'a-fadin nala lo basa sao-anan nala, mulai neme ina-huuk mai losa kakana kadi'i anak kala.
Fai ndoes nai dae Masir
13 Faik ndia, fai ndoes napadaka nalan seli, losa sudi nai bee ta hambu nana'ak so bali. Neme Masir mai losa Kana'an, basa hataholi bekundole so. Ala ta bisa tao hata-hata bali, huu ala ndoe lalan seli so. 14 Basa de hataholi leme basa mamanak malai Masir, ma basa mamanak malai Kana'an, leu hasa nana'ak nai Yusuf. Boe ma ana nakaduduluk nala basa doik kala sila, de neu mbeda sala nai manek uman. 15 Faik ndia, hataholi Masir ma hataholi Kana'an asa doin nala basa sala so. Huu ndia de ala ta bisa hasa nana'ak bali. Basa boe ma ala mai lasale Yusuf, de loke lae, “Ama wakil! Fee ai nana'ak dei, fo ai boso mate mia ndoes. Huu ai doin basan so.”
16 Boe ma Yusuf nataa nae, “Mete ma memak ei doim ta bali, na, tao leo iak: fee ei bandam mala, fo tukan no nana'ak.” 17 Basa boe ma ala fee bandan nala neu Yusuf, fo tukan no nana'ak. Fo ndia sila ndalan, bi'i-lombo, bi'i-aek, sapi, ma banda keledein nala. Huu teuk ndia, Yusuf helu leo ndiak so.
18 Manafali boe ma, ala leni Yusuf mai bali lae, “Ama wakil! Ai kokolak ndoos leo. Ai doin ma ai bandan, ama tuka nala basa sala so. Hatematak ia, ta hambu hata-hata bali. Ela kada ai aon ma ai daen nala. 19 Boso fee ai mate. Mete ma ai mate, na, see ndia nakaneni dae la? Malolenak, ama wakil ha'i mala ai dadik ama atan. Ma ama boe oo, ha'i mala ai daen fo dadik neu ama enan. Boe ma ama fee ai bini fo ai sele fee ama. Boe ma ai sosotan ma ai daen ndia, ama nggatin no kada nana'ak. Sadi ai boso mate!”
20 Huu fai ndoes boe napadaka, de basa hataholi Masir asa, se'o heni basa daen nala. Boe ma Yusuf hasa nala basa dae manai Masir, fo dadik manek pusakan. 21 No leo ndiak, de basa lau-inggu Masir, dadik manek atan nala.a 22 Tehuu Yusuf ta hasa malangga anggama la daen, huu manek fee sala nana'ak nakandoo. Huu ndia de ala ta paluu se'o daen nala.
23 Faik ndia, boe ma Yusuf kokolak no lau-inggu la nae, “Hatematak ia, ei dadik manek atan nala so. Basa ei daem mala, au hasa ala sala fee manek so. De ei ha'i mala bini la ia, fo miu sele sala leu dae la sila leo. 24 Boe ma neu fai ketu-koluk, na, ei ba'e limak kana. Baba'ek esa feen neu manek. Ela baba'ek haa, ei taon neu bini, ma luma ei mi'a mia ei uma isim mala.”
25 Ala lataa lae, “Ama masala'e mala ai so, huu ndia de ai moke makasi. Ai nau dadik ama manek atan nala leo.”
26 Boe ma Yusuf tao heti-heuk ndia, dadik hadak nai nusa Masir. Huu ndia de neme basa hade fo lau-inggu la koluk, ala ba'e limak kana. Baba'ek esa fee manek. Baba'ek haa ala pake hehelin. Kada malangga anggama la daen nala, manek ta hasa sala. Ala bei pake lakandoo hadak ndia.
Yusuf helu fo natoi Yakob nai sila bei-ba'in nala mamana laten
27 Mulai neme faik ndia mai, hataholi Israel asa leo lakandoo nai Masir, nai dae baba'ek Gosen. Ala dadik hataholi kamasu'ik, ma numbu-sadun nala boe lamano'u.
28 Nai Masir Yakob bei nasoda teuk 17 bali, losa teun dadik teuk 147. 29 Ledo-eik fai mamaten deka-deka so, boe ma noke Yusuf de nafadan nae, “Ana Yusuf! Au ameda ta dook bali, te Manetualain noke falik au so. De au oke, mete ma o sue au, na, o soo fo o boso matoi au nai dae Masir. 30 O musi mua falik au mbombolang neni ita bei-ba'in nala mamana laten neu, fo matoi au nai ndia. Ndia ama hihiin.”
Boe ma Yusuf nataa nae, “Malole, ama! Mete ma ama nau leo ndiak so, na, kada au tungga.”
31 Boe ma Yakob kokolak nae, “Mete ma leo ndiak, na, hatematak ia o soo dei, fo mae o tungga ama hihiin.”
Basa boe ma Yusuf soo tungga Yakob kokolan. Boe ma Yakob sendek neu koi lain, de hule-haladoi noke makasi neu Manetualain.