Yakob no bobonggin nala lafafa'u fo sangga leni Masir leu
46
Basa boe ma Yakoba nafafa'u buan nala, boe ma ala la'o ela Kana'an. Losa nggolo Barseba, boe ma ana hala banda, fo tao tunu-hotuk fee Manetualain, fo neme makahulun mai aman Isak nakaluku-nakatele neun. 2 Boe ma le'odaek esa, ana nalame'i. Nai me'is ndia, ana namanene Manetualain noken nae, “Wei! Yakob! O fo'a, fo mamanene dei!”
Yakob nataa nae, “Hatina?”
3 Manetualain nae, “Au ia, Manetualain fo o amam nakaluku-nakatele neun neme makahulun mai so. O boso bii muni Masir muu. Huu dei fo Au tao o numbu-sadum mala, dadik hataholi nusa ina-huuk nai ele. 4 Dei fo Au sama-sama ua o teni Masir teu. Ma dei fo Au boe oo ua falik o numbu-sadum mala leni Kana'an leu. Neu faik fo o mate, dei fo o anam Yusuf hambu o ani hahaem.”
5 Basa boe ma Yakob no anan nalab la'o ela nggolo Barseba. Boe ma ala lakasasa'ek kana no sao-anan nala, leu nggili fo mane Masir haituak so. 6-7 Boe ma ala ha'i leni basa sila pusakan ma bandan nala, fo dadik leu sila enan so neme dae Kana'an. Boe ma Yakob no ana tou anan nala, ana ina anan, ma basa umbu-solon nala, la'o leni Masir leu.
Yakob bobonggin nala mana tungga leni Masir leu
8 Yakob bobonggin nala mana tungga Masir leu, sila:c
10 Simeon no anan nala, sila: Yemuel, Yamin, Ohad, Yakin, ma Sohar. Ma Saul, fo anan neme saon ina Kana'an, mai.
11 Lewi no anan nala, sila: Gerson, Kehat ma Merari.
12 Yahuda no anan nala, sila: Sela, Peres ma Sera. Yahuda ana fe'en, Er ma Onan, mate sala so leme Kana'an. Ndia boe oo, noo Peres anan nala, sila: Hesron ma Hamul.
13 Isaskar no anan nala, sila: Tola, Pua, Ayub ma Simron.
14 Sebulon no anan nala, sila: Sered, Elon ma Yahleel.
15 Basa sala, Yakob no saon Lea ana bonggin nala, neu faik fo ala leo leme Mesopotamia. Hambu ana ina anak boe, nade Dina. De Yakob no Lea numbu-sadun nala, basa sala hataholi 33.
16 Boe ma hambu anan nala leme sao fe'en nala mai. Sila: Gad no anan nala: Sifion, Hagi, Suni, Esbon, Eri, Arodi, ma Areli.
17 Aser no anan nala, sila: Yimna, Yiswa, Yiswi, Beria ma sila feton, nade Sera.
Hambu Beria anan nala boe: Heber ma Malkiel.
18 Basa sala, hataholi 16. Ndia Yakob no saon Silpa umbu-anan nala. Silpa ndia, na ata fo Laban fee ana ina anan Lea, fo Yakob sao ulun.
19 Boe ma hambu Yakob sao fe'en bali, nade Rahel. Ana bonggi anak dua. Sila: Yusuf no Benyamin. 20 Faik ndia, Yusuf sao nala Asnat neme Masir so. Ndia ali-aman, malangga anggama nai kota On, nade Potifera. Boe ma Yusuf no Asnat anan nala, sila Efraim ma Manase.
21 Benyamin no anan nala tungga leni Masir leu boe. Sila: Bela, Beker, Asibel, Gera, Naaman, Ehi, Ros, Mupim, Hupim ma Ared.
22 Boe ma Yakob no saon Rahel numbu-sadun nala, hambu hataholi 14.
23 Basa boe ma, bei hambu saon esa bali, nade Bilha. Sila anan nala, sila Dan no Naftali.
Dan anan, nade Husim.
24 Naftali no anan nala, sila: Yasel, Guni, Yeser ma Silem.
25 Yakob no saon Bilha numbu-sadun nala, hataholi hitu. Bilha ndia, na Rahel atan fo ana hambun neme aman Laban mai.
26 De Yakob numbu-sadun nala, basa sala mana leni Masir leu, hambu hataholi 66. Bei ta hingga feto-feun nala. 27 Tamba no Yusuf anan nala fo nana bonggik leme Masir, hataholi dua. De Yakob no bobonggin nala mana leo lai Masir, basa sala hataholi 70.d
Yakob natonggo no anan Yusuf bali
28 Ledo-eik ala sangga dekak lo Masir so, Yakob nadenu anan Yahuda la'ok nakahuluk, fo neu noke Yusuf mai natonggo no aman nai Gosen. Ledo-eik ala losa Gosen, 29 boe ma Yusuf sa'e nala nggilin, fo neu natonggo no aman nai ndia. Ledo-eik ala latonggo, boe ma Yusuf holu nala aman, de namatani nala doon seli.
30 Boe ma Yakob kokolak no Yusuf nae, “Ana Yusuf! Hatematak ia, au ita matan o so. Ma au bubuluk o bei kasodak so. Huu ndia de, mae au mate hatematak ia boe oo, malole.”
31 Boe ma Yusuf nafada basa ka'a-fadin nala nae, “Au musi uu afada manek ae, au bobonggi nggala leme Kana'an mai so. 32 De dei fo au afada ae, ei ia, hataholi mana makaboi bi'i-lombo ma sapi. Huu ndia de ei mini ei bandam mala, ma pusakam mala leme Kana'an mai. 33 Mete ma manek noke ei, ma natane nae, ei mateme tao hata, 34 na, ei mataa leo mae, ei basa nggei ia mana makaboi banda neme ei kadi'i anam mai, sama leo ei bei-ba'im mala. No leo ndiak, dei fo nadenu ei leo nai dae baba'ek Gosen.” Yusuf nafada leo ndiak, huu hataholi Masir asa nunute, mete ma ala leo lakabubua lo mana hoo la.