Yusuf nalelelak aon, ma noke aman hu'a neni Masir mai
45
Yusuf namanene leo ndiak, boe ma dalen noe losa ta bisa nakatataka nala so bali, nai ndia pegawen nala matan. Huu ndia de nadenu sala deak leu, fo ela mesak kana no ka'a-fadin nala. No leo ndiak, ana bisa manaku aon nae, ndia see. 2 Boe ma pegawe la sila deak leu, de Yusuf namatani nakaleleu natingga, losa hataholi Masir asa lai kama ndia deak, lamanene. Ma hataholi malai manek uman lamanene boe.3 Boe ma Yusuf nafada ledo-ledo neu tolanoon nala nae, “Wei! Ka'a-fadi nggala ei! Au ia Yusuf, ei tolanoom! Ama memak bei kasodak, hetu?”
Ka'a-fadin nala lamanene leo ndiak, boe ma ala bii lalan seli, losa ala ta bisa kokolak hata-hata bali.
4 Basa boe ma Yusuf kapek kasa nae, “Wei! Ei hodok mai ia dei.”
Boe ma ala hodok leni Yusuf leu. De ana kokolak seluk nae, “Au ia Yusuf, fo fai maneuk ei se'o heni au uni Masir uu. 5 Memak ei se'o heni au so. Tehuu ei boso bii, ma boso matoka fee salak esa no esa bali. Naa te Manetualain mesak kana ndia noo au ia mai akahuluk neme ei mai. Fo no leo ndiak, Ana pake au fo asala'e hataholi no'uk, fo ala boso mate lo ndoes.
6 Hatematak ia, fai ndoes bei fo la'ok teuk dua. Bei ela teuk lima bali. Faik ndia, hataholi ta foi dae, ta sele-nggali, ma ta hambu buna-boak hata-hata. 7 No dalak fo ita ta bubuluk ia, Manetualain noo nakahuluk au neme ei mai. Fo suek hambu neme ei mai, ma ei umbu-anan nala lasoda.
8 De teteben, ta ei tataom fo au losa ia, tehuu ia Manetualain tataon. Ndia ndia tao au dadik manek lima konan nai Masir. Boe ma au dadik malangga mana makanenik nai manek uma manen. Ta hambu hataholi fe'ek ina-huun lena heni au.
9 Hatematak ia, ei fali lai-lai leo, fo mafada au kokolang ia neu ama, mae leo ia: ‘Ama anan Yusuf, bei kasodak! Ana dadik hataholi ina-huuk nai nusa Masir so. Ndia boe oo, noke ama neni Masir neu lai-lai. 10 Dei fo ama bole leo nai dae baba'ek Gosen, dekak no ndia. Mamanak ndia neulauk ma maloa. De ama bisa nakaboi basa ama bi'iae-bi'ilombon ma sapin nala. Ndia boe oo noke fo ama mai no umbu-anan nala, uma isin nala, ma basa pusakan nala, fo leo makandoo nai ele. 11 Mete ma ama nai Gosen, na, ana bisa nanea ama nai ele. Huu fai ndoes bei teuk lima bali. De dei fo ana heti, fo ama no bobonggin nala, ma basa ama bandan nala ta kulan hata esa boe.”’
12 Yusuf nafada basa, boe ma ana kokolak bali nae, “Hatematak ia, ei mita matam so, hetu? Boe ma o, Benyamin. Au ia, memak Yusuf. 13 De mafada ita aman mae, au koasang nai Masir ia, ina-huun ana seli. Ma tui ama boe, basa hata fo ei mitam so. Basa, na ei mia ama lai-lai ia mai leo!”
14 Boe ma ana holu nala fadin Benyamin, de dua sala lamatani. 15 Ndia boe oo, holu nala ka'an nala, de ana idu esa-esa. Bei fo ala mulai kokolak lo ndia.
Mane Masir simbok Yusuf ka'a-fadin nala
16 Ledo-eik manek no pegawen nala lamanene Yusuf ka'a-fadin nala mai, boe ma basa sala lamahoko. 17 Basa boe ma manek kokolak no Yusuf nae, “Yusuf! Mafada o ka'a-fadim mala, fo ala fua leni hade neu banda keledein nala, fo leni Kana'an leu. 18 Boe ma madenu sala loo o amam ma basa bobonggim mala, fo hu'a ia mai leo. Dei fo au fee sala dae neulauk nalan seli nai Masir, fo ala bisa lasoda lai ndia, ma la'a leme dae ndia buna-boan mai. 19 Boe ma mafada sala, fo ala leni memak nggili hida neme ia mai, fo dei fo ala fua lala kakana kadi'ik kala ma o amam. 20 Boso dudu'a pusaka fo ala ta bisa lu'a leni sala, huu dei fo ala hambu basa neulauk ana seli nai Masir ia.”
21 Yusuf namanene leo ndiak, boe ma ana fee sala nggili hida ma lepa-nggee tungga manek palendan. Ma ka'a-fadin nala boe ooa lafafa'u, fo fali tungga manek palendan. 22 Yusuf fee sala esa-esak balo'a beuk pasan esa boe. Tehuu ana fee Benyamin doi lilo fulak 300, ma balo'a beuk pasan lima. 23 Ndia boe oo, haitua fee aman bua neulauk nalan seli neme Masir mai, fo fua sala leu banda keledei mane sanahulu. Ana fee nakadaik hade, loti ma nana'ak mata-matak bali, nai banda keledei ina sanahulu, fo dadik lepa-nggee soa-neu sila fali leni Masir mai. 24 Basa boe ma ana fee sala fali, ma nasanenedak kasa nae, “Ei boso matoka nai dalak, baa!”
Yakob namanene Yusuf bei kasodak
25 Basa boe ma ala fali leni aman leu, nai Kana'an. 26 Losa ele, boe ma ala lafada aman lae, “Ama! Ama anan Yusuf bei kasodak. Ana dadik hataholi ina-huuk so, de palenda nai Masir!”
Yakob namanene leo ndiak, boe ma namanggonggoak, ma ta namahele sila kokolan. 27 Tehuu ledo-eik ala lafada basa Yusuf kokolan, ma ana nita nggili fo Yusuf haituak ndia so, fo sangga fua ndia neni Masir neu, bei fo ana mulai namahele. 28 Boe ma ana kokolak nae, “Awii! Au anang bei kasodak, maa! Leo ndiak, bei fo au amahoko! Au musi uu tilon dei, bei fo au bisa mate ua mole.”