Yusuf moo lilo fulan mopon
44
Ala la'a basa, boe ma Yusuf nakukutuk malangga mana makanenik nae, “O muu madai hade neu hataholi la esa-esak karon losa henuk. Basa boe ma o tao seluk doin nala neni esa-esak karon dale neu. 2 Boe ma o ha'i mala au moo lilo fulang, fo taon neu kakana mulianak karon.” Boe ma ana neu tao tungga Yusuf palendan.3 Neu fo'a fafai anan, boe ma Yusuf mbo'i sala, fo fali leni nana'ak ma banda keledein nala. 4 Ala la'o bei ta losa dook neme kota mai, boe ma Yusuf nafada malangga mana makanenik nae, “O husi tungga hataholi la sila lai-lai. Mete ma matonggo mua sala so, na, o mae leo ia: ‘Hatina de ei dalem mala manggalauk neu tou lasik? De ei bala ndia malolen no manggalauk leo iak! 5 Talo bee, de ei dalem mala bisa mamana'o mini malanggan moo lilo fulan? Ei ta bubuluk, do? Ndia ta kada malanggan moo nininun! Ana pake mook ndia, fo sangga bubuluk hataholi ua-nalen. Mook ndia, ndolu! Ei tataom ia, memak manggalaun ana seli so!”’
6 Basa boe ma malangga mana makanenik ndia neu husi tungga sala, losa hambu sala. Boe ma nafada sala tungga Yusuf kokolan isinaak.
7 Boe ma ala sapa lae, “Ama maksut leo beek ia? Ai soo. Ai ta bisa tao manggalauk leo ndiak! 8 Ama mesak kana bubuluk so, hetu? Fai maneuk, doik kala malai ai karon dale, ai fee falik kasa neu ama so, hetu? De talo bee fo ai bisa mamana'o malanggan lilo mbilan do lilo fulan neme ndia uman mai! Taa bisa! 9 Ama palisak leo! Hambu buas ndia nai see karon, na, huku nisan leo! Ma ela ai fe'ek kala, dadik ama atan leo.”
10 Boe ma malangga mana makanenik ndia nae, “Taa! Kada leo iak. Mete ma mook ndia hambun nai see, na, ndia dadik au atang. Fe'ek kala bole fali.”
11 Boe ma ala lakonda lai-lai karon nala. De ala sefi memak kasa. 12 Basa de malangga mana makanenik palisak lutu-lutuk karon nala sila esa-esak, mulai neme ka'ak karon mai losa fadik enan. Boe ma ana hambu moo lilo fulak ndia neme Benyamin karon.
13 Benyamin ka'an nala lita leo ndiak, boe ma dalen nala hedis. Ala fua falik karon sila leu banda keledei la lain, de ala pode fali leni kota leu.
14 Ledo-eik ala losa Yusuf uman, ndia bei nai ndia. Boe ma ala sendek leu matan. 15 Yusuf nasapalak kasa nae, “Heh! Hatina de ei tao leo iak neu au! Ei ta bubuluk mae, hataholi ina-huuk leo au ia, bisa pake ndolu fo sangga bubuluk hataholi buin?”
16 Yahuda nataa nae, “Awii! Manetualain lufa nakaholak ai salan nala so. De ai sangga mae hata bali, ama? Ai sangga masala'e aok talo bee bali. Mete ma ama nau kena ai fadi mulianan, na, malolenak ama kena ai basa nggai. Ha'i mala ai basa nggai dadik ama atan leo.”
17 Tehuu Yusuf nataa nae, “Taa! Hambu mook ndia nai see, na, ndia ndia dadik au atang! Ei fe'ek kala, nana nakambo'ik. Fali mini ei amam miu leo!”
Yahuda noke fo ana nggati Benyamin
18 Basa boe ma Yahuda neu deka-deka no Yusuf, de kokolak nae, “Ama wakil! Au bubuluk ama koasan sama leo manek. Huu ndia de boso mamanasa au dei. Huu au oke palamisi fo kokolak faa ua ama. 19 Afik ama natane ai so mae, ‘Ei amam ma fadim esa bei nai ndia, do?’
20 Boe ma ai mataa mae, ai aman namalasi so. Ma ai fadi mulianan esa. Neu faik fo bonggi ndia, ama lasik so. Fadi mulianak ndia, ka'a bonggin esa, tehuu maten so. Dua sala inan boe oo, maten so. De hatematak ia, ela kada fadi mulianak mesak kana. Huu ndia de ai aman suen nalan seli.’
21 Boe ma ama nadenu ai mia ai fadin ndia, fo ama bisa nitan. 22 Boe ma ai mataa mae, kakanak ndia ta bisa la'o ela aman. Mete ma ana la'o elan, na, ai aman maten so.
23 Tehuu ama nataa nae, ‘Mete ma ei ta mia ei fadim, na, ei ta bisa mita au matang bali.’
24 Basa boe ma ai fali. Losa ai aman, boe ma ai mafadan basa ama kokolan. 25 Doo-doo boe ma, basa ai nana'an. De ai aman nadenu ai mini Masir mai seluk fo hasa nana'ak bali. 26 Tehuu ai bala mae, ‘Ama! Ai ta bisa mini ele miu bali. Huu manek lima konan nafada so nae, mete ma ai ta mia ai fadi mulianan, na, ai ta bisa mita ndia matan. De ai fadi mulianan musi tungga dei, bei fo ai la'o.’
27 Basa boe ma ai aman kokolak bali nae, ‘Ei bubuluk so, hetu? Au saong, Rahel, anan kada dua. 28 Ana uluk taak kana so bali. Neu ko banda fui kodo henin so. Huu ndia de losa hatematak ia, au ta ita ndia bali. 29 Mete ma ei ha'i mala ana mulianak ia neme au mai bali, boe ma ana hambu soe, na, ei boe tao makatoto'ak au nai fai lasing ia, de au mate tutik.
30-31 Leo iak, ama wakil. Mete ma au fali uni au amang uu, ma au ta ua fadi mulianak ia, neu ko ai aman maten so. Huu ndia samanen nana mba'ak no kakanak ia. Ndia namalasi nalan seli so, losa mete ma ai boe tao makatoto'ak kana, na, neu ko maten. 32 Nakalenak bali, au aheluk ua au amang so ae, au tanggon kakanak ia. Au aheluk ua au amang ae, mete ma au ta ua falik kakanak ia neu ndia, na, ela au tanggon salak ndia losa mate.