3 Tehuu Yahuda nataa nae, “Ama! Fai maneuk, mane Masir lima konan fee nasanenedak neu ai no hala belak so nae, ai ta bole matudu ai matan neu ndia, mete ma ai ta mia ama ana mulianan Benyamin! 4 De ama musi mbo'i fadi Benyamin, fo tungga ai dei. Bei fo ai nau miu hasa nana'ak fee ama. 5 Tehuu mete ma ama ta nau ai mia Benyamin, na, ai ta nau miu boe. Huu hataholi Masir ndia kokolak leo ndiak so!”

6 Boe ma Yakob sapa sala nae, “Hatina de ei mafada hataholi ndia so mae, ei fadim bei esa bali! Ei sangga kada tao makatoto'ak au!”

7 Boe ma ala kokoe lae, “Ama! Hataholi ndia nambue natane nakandondoo henin, fo sangga bubuluk ai, ma ai bobonggin nala. Ana natane nae, ‘Leo bee? Ei amam bei kasodak, do? Ei bei kafadi touk fe'ek bali, do?’ Boe ma ai mae hata bali! No nakasetik ai kokolak ndoos leo. Te see bubuluk nae, ndia sangga nadenu ai mia ai fadin ele neu?”

8-9 Boe ma Yahuda kokolak tamba bali nae, “Ama! Mbo'i kakanak ia no ai leo. Au helu, mete ma dadik hata-hata neun, na, ela au ndia tanggon nggati ndia. Mete ma au ta ua falik ndia no sodak neu ama, na, ela ama fua salak ndia neu au losa mate. De ama mbo'i kakanak ia leo, huu ai sangga la'o ia so. Malolenak ai la'o lai-lai, fo boso hambu esa boe mate no ndoes. 10 Soba leo ai ta mahani mala dook leo iak, na, neu ko ai miu-mai la'i dua so.”

11 Basa boe ma sila aman nae, “Mete ma leo ndiak, na, kada ei tao leo iak. Miu ha'i mala ita daen buna-boan fo neulaun seli. Ndia: fani oe, bumbu-fani, ai daa kaboo menik, akidoo salap, kanari,^a ma fufue nula fe'ek kala. De minin fee mane Masir lima konan, fo mae, ia ai nenenin. 12 Ei boe oo mini doik dedesin bekela'i duak, huu ei musi fee falik doik, fo fai maneuk ei hambu sala leme ei karom dale. Fama hataholi la sila, mbeda lasala doik sila. 13 Ei boe oo mia ei fadim, fo lai-lai mini ele miu leo! 14 Au hule-haladoi, fo Manetualain fo Mana Koasa Nai Lain Seli, tao mane Masir lima konan nameda kasian neu ei. Losa ana nau fee falik Benyamin ma Simeon neu ei, fo ei basa nggei fali sama-sama. Tehuu mete ma au anang musi mopon, na, elan fo au lemba toto'ak ndia akandondoo henin leo.”

15 Basa boe ma ala lakaduduluk lala bua nenenik kala ma doik kala sila, fo ala lenin neni Masir neu. Ala loo Benyamin boe. Losa ele, boe ma leu lasale Yusuf. 16 Ledo-eik Yusuf nita Benyamin ma ka'an nala, boe ma nadenu malangga mana makanenin nae, “Heh! Mua hataholi la ia leni au umang leu! Boe ma muu hala mala sapi esa, fo tunu-nasu malan malada-malada. Huu dei fo ala la'a leledok lo au.”

17 Boe ma malangga mana makanenik ndia, tao tungga Yusuf palendan. De ana noo sala leni Yusuf uman leu.

18 Ledo-eik ala la'o leni Yusuf uman leu, ka'an nala bii lalan seli. Nai dala laladak, ala lakokola lae, “Wei! Hatina de ana nadenu loo ita teni ia mai? Boso losak ana sangga tao nakatato'ak ita, huu fai maneuk doik fo ala fee falik kasa leme ita karon nala dale sila. Ala taok loo ita ia mai, fo kada nggengge neuk ala humu lala ita, fo tao ita dadik ndia atan. Basa boe ma ala lamoa lala basa ita banda keledein nala.”

19 Huu ndia de, ledo-eik ala dekak lo Yusuf uman so, boe ma ala kokolak lo malangga makanenik ndia lae, 20 “Ama! Ai moke ambon, huu fai maneuk ai mai hasa mitak nana'ak neme ia so. 21-22 Boe ma ledo-eik ai fali nggolok miu, ai hahae mima dalak fo sangga sunggu. Basa de ai sefi karon nala, fo sangga fee banda la la'a. Ta bubuluk te ai hambu falik esa-esak doi hasa haden, neme karon dale. Ai ta bubuluk see ndia taon neu ndia! Tehuu hatematak ia, ai mini falik basa doik kala sila. De ama boso mamanasa, bou! Ela ama bubuluk, hatematak ia ai boe oo, mini doi fe'ek bali, fo sangga hasa nana'a beuk.”

23 Boe ma malangga mana makanenik ndia nataa nae, “Ei kada nee-nee! Boso bii! Fama ei Manetualain ndia fee baba'e-babatik neu ei nai karon nala sila. Fai maneuk, au simbo ala basa ei doim mala so, maa. Ei hutam ta so!” De ana mbo'i Simeon neu sala.

24 Boe ma basa sala maso leni Yusuf uman dale leu. De malangga mana makanenik ndia, fee sala oe fo safe lalalao ein nala. Ndia boe oo, fee banda keledein nala la'a. 25 Boe ma nafada nae, “Dei fo ei mi'a leledok sama-sama mia malanggan.” Ledo-eik ala bei lahani Yusuf mai, ala heti memak sila nenenin nala.

26 Ledo-eik Yusuf losa, boe ma basa sala sendek leu matan. De ala loo sila nenenin nala neun. 27 Boe ma Yusuf natane sala nae, “Leo bee? Ei malole, do? Leo bee no ei amam fo lasik ndia? Ndia malole boe, do?”

28 Ala lataa lae, “Ama ata lasin, fo ai ama bonggin, malole.” Boe ma ala lakatele fo fee hadak neu ndia bali.

29 Basa boe ma Yusuf suli ndule sala, losa nita fadin Benyamin. Dua sala ama esa, ma ina esa. Boe ma nae, “Wei! Ia ndia ei fadi mulianan, fo fai maneuk ei tuik ndia so, hetu?”

Basa de ana kokolak no Benyamin nae, “Ana, ei! Au hule-haladoi fo Manetualain fee baba'e-babatik makadotok neu o.”

30 Yusuf nita Benyamin, boe ma dale dokodoen hihii tuda deak mai so. Huu ana sue nala fadin seli. Ana ta bisa nakatataka nala dalen so bali. Boe ma ana lai-lai la'o ela sala, de maso neni kaman dale neu. Boe ma namatani nasakekedu nai ndia. 31 Ana namatani nate'e, boe ma neu nalou oe. Ana tao natesa dalen, de kalua neu natonggo no sala. Basa de nadenu hataholi mana ono-laun nala leu sadia mei nana'ak.

32 Ala fee Yusuf mesak kana na'a nai mei esa. Ka'a-fadin nala la'a lai mei fe'ek. Ndia pegawe hataholi Masir asa, la'a lai mei fe'ek boe, huu hataholi Masir asa, nunute langgatuuk la'a sama-sama lo hataholi Ibrani.^b 33 Malangga mana makanenik ndia, heti so, fo Yusuf ka'a-fadin nala langgatuuk lasale Yusuf. Ana heti sala langgatuuk tungga teun nala, mulai neme uluk mai losa mulianak. Ledo-eik ala lita heheti nanggatuuk leo ndiak, boe ma ala heran. 34 Boe ma Yusuf heti fo hataholi mana ono-lauk kala ha'i fee ka'a-fadin nala nana'ak neme ndia mei hehelin mai. Basa sala simbo no'un sama. Tehuu ala fee Benyamin enan, no'un lena heni ka'an nala la'i lima. Basa boe ma ala la'a-linu losa lakabete lalan seli.