Yusuf ka'an nala leni Masir leu fo hasa nana'ak
42
Faik ndia, ama Yakob namanene hataholi lae, hambu hade nai Masir, boe ma ana kokolak no anan nala nae, “Ana nggala ei! Hatina de kada ei manggatuuk manadok leo iak! 2 Au amanene so lae, hambu nana'ak nai Masir. Malolenak ei miu hasa nai ele dei, fo suek ita boso mate to ndoes.”3 Basa boe ma Yusuf ka'a kasanahulun nala, lahehele fo sangga leu hasa nana'ak nai Masir. 4 Tehuu Yakob ta nau mbo'i Yusuf fadi mulianan Benyamin, fo neu sama-sama no sala. Ana dudu'a nae, “Boso losak kakanak ndia hambu soe bali!” 5 Huu hataholi sudi lai bee lamanene hambu nana'ak nai Masir so, de hataholi no'uk leu hasa nai ele. Fai ndoes ndia losa nai dae Kana'an so boe. Boe ma Yakob anan nalaa leu hasa nai ele.
6 Faik ndia, Yusuf dadik mane Masir lima konan so. Mete ma hataholi leme sudi bee mai, fo sangga hasa hade, na, Yusuf se'o neu sala. Huu ndia de neu faik fo ka'an nala losa, ala leu sendek fo fee hadak neu ndia, losa matan nala deta dae. 7-8 Neu faik fo ana nita sala, boe ma nalelak tutik kasa. Tehuu Yusuf tao aon sama leo hataholi Masir, huu ndia de ala ta lalelak kana. Boe ma ana natane sala ta no hadak nae, “Ei mima bee mai?”
Boe ma ala lataa lae, “Ai mima Kana'an mai. Ai mai sangga hasa nana'ak nai ama wakil.”
9 Boe ma Yusuf nasaneda me'i makahulun. De ana nakabibiik kasa nae, “Au ta amahele! Neu ko ei basa nggei ia, mana memete-mamakuk kala. Ei mai sangga bubuluk dae Masir buin, basa na ei sambu masafali ai, hetu!”
10 Tehuu lataa lae, “Taa, ama! Ai ia, kada ama atam mala. Tebe-tebe kada ai mai hasa nana'ak. 11 Ai basa nggai ia, ama esa. Ai ta mana memete-mamakuk, ama! Ai hataholi neulauk.”
12 Tehuu Yusuf kokolak natingga bali nae, “Heh! Masapepekok! Boso pepeko au! Memak ei ia tetebes mana memete-mamakuk kala, maa. Neu ko ei mai fo sangga bubuluk nusak ia buin nala!”
13 Boe ma ala sapa lae, “Taa, ama! Ai kada ama atam mala! Ai mima dae Kana'an mai. Ai tolanook sanahulu dua, ma ai basa nggai ama esa. Ai fadi mulianan, nahani no ama, ma esa bali, taak kana so.”
14 Boe ma Yusuf nataa nasafali nae, “Taa! Hata fo au kokolak isinaak ndia, tetebes so! Ei ia memak mana memete-mamakuk kala. 15 Naa! Ei musi fee buti dei, fo au bubuluk ae, ei kokolam isinaak ndia, memak tetebes do taa. Au soo! Mete ma ei fadi mulianam ndia, ta neni ia mai, na, ei ta bisa la'o ela nusak ia! 16 De ei hele mala hataholi esa, fo neu nala ei fadi mulianam neni ia mai. Fe'ek kala, au kena sala. Au nau ita ei kokolam ndia tetebes, do taa. Mete ma taa, na, ei memak tetebes mana memete-mamakuk kala.” 17 Boe ma Yusuf nadenu kena sala, faik telu nai bui dale.
18 Neu faik katelun, boe ma Yusuf kokolak no sala leme bui dale nae, “Au ia, hataholi esa fo mana bii Manetualain. Ma au tungga Ndia hihiin taa-taa. Suek ei bisa masoda, na, au sangga mbo'i ei, tehuu no heheluk esa. 19 Mete ma ei kokolak ndoos, na, ei musi matudu buti neu au. Ndia dalan leo iak: au kena hataholi esa nai bui dale. Fe'ek kala fali fo mini nana'ak fee ei bobonggim mala. Huu ala lahani ei fali mini nana'ak. 20 Boe ma ei mia ei fadim mai, fo dadik buti nae, ei ia hataholi ndoos. Fo suek au boso huku isa ei.”
Ala lamanene leo ndiak, boe ma lakaheik. 21 Boe ma esa kokolak no esa lae, “Naa! Hatematak ia, ita hambu babalak neme ita sala-singgon nala mai, fo fai maneuk ita tao ita fadin so. Ita tita ndia doidoson nalan seli so, losa ndia noke tulu-falik, tehuu ita ta mbali sana. Huu ndia de hatematak ia, ita doidoso leo iak.”
22 Ruben nasanenedak kasa nae, “Wei! Fadi nggala ei! Makahulun au ka'i ei so, fo boso tao hata-hata neu kakanak ndia, hetu! Tehuu ei ta mbali au kokolang. Huu ndia de hatematak ia, ita lemba tala Yusuf daan leo, maa.” 23 Ala lakokola leo ndiak, tehuu ala ta bubuluk lae, Yusuf bubuluk sila dede'an boe. Huu ledo-eik Yusuf kokolak no sala nenik dede'a Masir, boe ma mana kokolak saluan neni dede'a Ibrani neu.
24 Yusuf namanene ala kokolak leo ndiak, boe ma ana fo'a la'o ela sala, de mesak kana neu namatani nai mamana fe'ek. Ledo-eik namatani nate'e, boe ma ana fali neu sala. De ana nadenu hataholi mba'a lala Simeon neu sila tolanoon nala matan.
Yusuf ka'an nala fali leni Kana'an leu
25 Basa boe ma Yusuf palenda pegawen nala, fo ladai hade neu ka'an nala karon nala. Ma ladai falik esa-esak doin neu karon nala bafan. Ndia boe oo nadenu fee sala lepa-nggee. Boe ma pegawe la sila, tao tungga Yusuf palendan. 26 Basa boe ma Yusuf ka'an nala, fua karon hade la sila, leu sila banda keledein nala. Boe ma ala la'o.
27 Nai dala laladak ala hahae. Boe ma esa neme sila mai sefi heni tali karon, fo sangga fee banda keledein na'a. Tehuu ana nita doin nai hade lain. 28 Ana nggengge nalan seli! De nanggou ka'an nala nae, “Awii! Ei mai mita ia dei! Te ita soe ia so, maa! Ala fee falik au doing nai au karong dale so.”
Ala lita leo ndiak, boe ma lamanggonggoak, huu ala bii lalan seli. Boe ma ala lakokola lae, “Manetualain tao hata neu ita ia so bali?”
29 Boe ma ala la'o lakandoo. Losa Kana'an, boe ma ala tui aman, basa hata fo mana dadik so. 30 Ala lafada lae, “Ama! Mane Masir lima konan ndia, ana seli maa. Ndia kokolan, ta no hadak nalan seli. Ana nae, ai miu memete-mamaku ndia nusan.” 31 Tehuu ai mataa mae, ‘Taa! Ai ia kada hataholi ndoos, ta mana memete-mamakuk. 32 Ai hataholi neulauk. Ai basa nggai tolanook sanahulu dua. Ai ama esa. Kada esa taak kana so bali, ma mulianak nahani no ama nai Kana'an.’
33 Boe ma ama ndia nae, ‘Au sangga soba sudik, ei ia hataholi ndoos, do taa! Ei esa musi mahani ia. Fe'ek kala fali leni fee bobonggin nala hade, fo suek ala boso mate lo ndoes. 34 Ei Musi mia ei fadim mai dei. No leo ndiak, bei fo au bubuluk ei ia ta mana memete-mamakuk kala, tehuu memak ei hataholi ndoos. Boe ma au bisa mbo'i ei tolanoom fo au kenak so. Basa de au mbo'i ei sudi mini bee miu, nai nusak ia.”
35 Tui basa, boe ma ala mulai ofe sila karon nala isin. Nggengge neuk ala lita esa-esak doin, bei nai karon dale. Yakob no basa anan nala lita leo ndiak, boe ma ala bii lalan seli.
36 Basa boe ma Yakob kokolak no sala nae, “Ei tao mamopo au ana nggala so. Yusuf taak kana so bali. Simeon leo ndiak boe. Hatematak ia boe oo, ei sangga mia Benyamin bali? Ei ia, tebe-tebe sangga kada tao doidoso au!”
37 Boe ma Ruben kokolak no aman nae, “Ama! Fee Benyamin neu au leo. Au ndia tanggon-natataan. Au helu, dei fo au ua falik kana neu Ama. Tehuu mete ma taa, na, ela ama tao nisa au ana tou ana kadua nggala.”
38 Tehuu Yakob kokolak bala nae, “Ta bisa! Ei ta bole mia Benyamin. Huu ka'an Yusuf, maten so. Hatematak ia, ela kada mesak kana. Mete ma ana hambu soe nai dala laladak, na, ei tao tamba makatoto'ak au, losa au loe lates dale uu.”b