Yusuf nafada mane Masir me'in ndandaan
41
Seli teuk dua, boe ma mane Masir nalame'i. Ndia me'in, ndia nambadeik nai lee Nil bifin. 2 Nggengge neuk, ndia nita sapi ma'ao hitu. Loun nala manggadilak. Ala kalua leme lee ndia mai, fo la'a na'u lai ndia. 3 Basa boe ma sapi fe'ek hitu bali kalua leme lee ndia mai. Aon nala nggoda mana bebebok. Ala lambadeik deka-deka lo sapi ma'ao la sila. 4 Boe ma sapi nggoda kahituk kala sila, kodo heni sapi ma'ao kahituk kala sila. Boe ma manek nggengge, de ana fo'a.
5 Ta dook bali, ana namanee seluk. Boe ma ana nalame'i bali. Ana nita hade mbule neuk hitu kalua leme huu ma'ao esa mai. 6 Boe ma nita hade mbule langgak hitu bali, mana malek kala huu la'e ani matobik. 7 Boe ma basa hade mbule langgak kala sila, kodo heni basa hade mbule neuk kahituk kala sila. Basa boe ma manek fo'a. Bei fo ana bubuluk, nalame'i so bali.
8 Fo'a fafain, boe ma manek nameda ta malole. De palenda hataholi la leu loke lala basa ndolu malelak kala, ma hataholi malelak malai Masir. De ana tui me'in neu sala, tehuu ta hambu esa boe bisa bubuluk me'is ndia ndandaan.
9 Boe ma pegawe mana makaneni manek nininun ndia, bei fo nasaneda Yusuf. De nafada manek nae, “Ama manek. Au musi manaku au salang. 10 Makahulun, neu faik fo ama luli au ua au nonoong, de mandee ai mini bui dale miu, 11 le'odaek esa, boe ma ai dua nggai malame'i. Esa-esak no me'in, ma ndandaan kofe'ek. 12 Nai bui ndia boe oo, hambu hataholi Ibrani esa bei muli-soluk. Malangga bui so'un dadik malangga mana makanenik nai bui. Ai tui ai me'in neu ndia. Boe ma nafada me'is sala sila ndandaan. 13 Huu ndia de ama manek so'u falik au. Tehuu au nonoong hambu huku nisak. De basa sila, nandaa sama leo hataholi Ibrani ndia kokolan!”
14 Manek namanene leo ndiak, boe ma nadenu hataholi lai-lai leu ha'i Yusuf neme bui mai. Boe ma Yusuf neu tao neulalau ao-inan, ma nggati balo'an fo neu nasale manek. 15 Ana losa, boe ma manek kokolak nae, “Ta'e anak! Au alame'i, tehuu ta hambu hataholi esa boe bisa nafada me'is ndia ndandaan. Tehuu hambu hataholi nafada au nae, o bisa.”
16 Boe ma Yusuf nataa nae, “Ama manek. Au boe oo ta bubuluk hata-hata. Kada Manetualain mesak kana bisa nafada no teteben me'is ndia ndandaan. Neu ko Ana nau nafada ama dede'a neulauk.”
17 Basa boe ma manek tui nae, “Nai au me'ing ndia, au ambadeik nai lee Nil bifin. 18 Boe ma hambu sapi ma'ao hitu, ma loun nala manggadilak. Ala kalua leme lee ndia mai, de la'a na'u lai lee ndia bifin. 19 Boe ma hambu sapi fe'ek hitu mai bali. Tehuu sapi la sila nggoda mana bebebok. Nai dae Masir ia, au bei ta ita itak sapi nggodak mata leo ndiak! 20 Tehuu au amanggonggoak! Huu kada nggengge neuk, sapi nggodak kahituk kala sila, kodo heni basa sapi ma'ao kahituk kala sila. 21 Ala kodo basa, tehuu sapi la sila bei nggodak lahele. Boe ma au nggengge, de au fo'a.
22 Basa boe ma au amanee seluk bali, boe ma au alame'i seluk. Au ita hade mbule neuk hitu, ala kalua leme huu ma'ao esa mai. Boe ma au ita hade mbule langgak hitu bali, mana mamalek kala so, huu la'e ani matobik. 24 Boe ma basa hade mbule langgak kala sila, kodo heni hade mbule neuk kahituk kala sila. Basa boe ma au fo'a. De au tui me'is ndia neu hataholi malelak kala. Tehuu ta hambu hataholi esa boe bisa nafada ndandaan.”
25 Boe ma Yusuf nafada nae, “Ama manek. Me'i kaduak kala sila, ndandaan kada esak. Manetualain nafada memak ama manek, hata fo Ndia sangga taon so. 26 Me'is ndia ndandaan leo iak: sapi ma'ao kahituk kala sila, ma hade mbule neuk kahituk kala sila, ndia fai nakabetek teuk hitu. Sila ndandaan kada esak. 27 Boe ma sapi nggoda mana bebebok kahituk kala sila, ma hade mbule langgak kahituk kala sila, ndia fai ndoes teuk hitu.
28 De Manetualain nafada memak hata fo Ndia sangga taon so. Ndia sama leo au kokolak isinaak ndia so. 29 Dei fo ita hambu fai nakabetek losa teuk hitu nai basa mamanak nai nusa Masir. 30-31 Basa ndia, bei fo ita hambu fai ndoes losa teuk hitu. Dei fo fai ndoes ndia ana seli. Losa ta hambu nana'ak bali nai nusak ia. Basa hataholi ndoe lalan seli, losa ala ta bisa lasaneda fai nakabetek ndia bali.
32 Ama manek hambu me'is losa la'i dua, ndia ndandaan nae, Manetualain heti memak so. Ta dook bali, te hata fo Ana hetik ndia, mulai dadi so.
33 Huu ndia de au fee dudu'ak leo iak: malolenak ama manek sangga mala hataholi malelak esa, fo bisa nakaneni no malole. Boe ma so'u malan fo ana heti neulalau nusak ia. 34 Nai fai nakabetek teuk hitu ndia, malolenak ama manek so'u nala hataholi fe'ek bali, fo nakaduduluk buna-boa lenak kala. Buna-boak kala sila, ala ba'en neu lima, fo mbeda baba'ek esa. 35 Ala musi tungga ama manek palendan, fo ala ha'i hade neme basa nggolok kala malai Masir mai. Boe ma ala musi mbeda hade sila lai mbolek kala fo lanea neulalau sala. 36 Dei fo fai ndoes teu kahituk kala sila losa, na, ita bei kanana'ak. No heti leo ndiak, ta hambu hataholi mate no ndoes.”
Manek so'u Yusuf dadik ndia lima konan nai Masir
37 Manek no pegawe ina-huun nala lamanene Yusuf kokolak leo ndiak, boe ma ala tungga Yusuf dudu'an. 38 Boe ma manek kokolak nae, “Manetualain Dulan koasan memak nai Yusuf so. Huu ndia de ta bisa ai hambu hataholi fe'ek bali, fo lena heni ndia.”
39 Boe ma manek kokolak no Yusuf nae, “Manetualain nafada basa ia neu o so. Hatematak ia, bei fo ai bubuluk mae, o ia malelak. Ma o malelan lena heni basa hataholi. 40 Huu ndia de hatematak ia, au so'u o dadik au lima konang, fo o dadik malanggan nai au uma manen. Ma dei fo basa au lau-inggu nggala tungga o palendam. Kada au mesa nggau lena heni o.”
41-42 Basa boe ma manek odu nala ndeli tendan, de odun neu Yusuf lima ku'un. Boe ma ana kokolak nae, “No leo iak, au so'u o dadik au lima konang nai basa nusa Masir.” Boe ma ana papake Yusuf badu manalu banggana'uk esa ma bokolii lilo mbilas neu lesuha'in.
43 Basa de ana fee ndia nggili ndala neulau kaduan, fo Yusuf sa'e. Hambu hataholi nalaik nesik mata, fo nanggou taa-taa nae, “Wei! Soi dalak, bou! Fee hadak!a Hambu hataholi ina-huuk sangga nesik ia!” No tatao leo ndiak, manek so'u Yusuf dadik ndia lima konan nai dae Masir.
44 Basa boe ma manek kokolak no Yusuf nae, “Leo iak. O bubuluk memak au ia manek so. Ma au afada basa hataholi malai Masir ia so ae, mete ma o ta mbo'i, na, ala ta bisa tao hata-hata.”
45 Basa boe ma manek foi Yusuf nade, Safnat Panea, tungga hataholi Masir naden. Ndia boe oo nakasasaok Yusuf no inak esa, nade Asnat. Yusuf ali-aman, nade Potifera. Ndia mana makaneni anggama nai Kota On.b No leo ndiak, Yusuf dadik hataholi ina-huuk nai dae Masir.
46 Neu faik fo ala so'u Yusuf ndia, ndia teuk 30. Basa de ana la'ok ndule basa mamanak nai dae Masir. 47 Nai fai nakabetek teuk hitu ndia, osi la buna-boan no'un seli. 48 Boe ma Yusuf nakaduduluk buna-boa lenak kala sila, fo ana mbedan. Buna-boa hade neme mamanak kala mana dekak no kota sudi bee, na, ana mbedan neu mbolek manai kota ndia. 49 Losa hade fo ana nakaduduluk kala sila, no'un seli sama leo salaek malai tasi bifi, losa hataholi ta bisa sudi-tai nala sala bali.
50 Fai ndoes bei ta losa, Yusuf saon Asnat bonggi ana tou anak dua. 51 Boe ma Yusuf kokolak nae, “Manetualain tao nala au afalende heni au doidosong so, neu faik fo au kalua uma au amang uman mai.” Huu ndia de ana foi ana ulun, nade Manase (fo liin hihii leo dede'a de'ek fe'ek fo ndandaan nae, ‘nafalende’.)
52 Neu faik fo ana hambu ana kaduan, boe ma ana kokolak bali nae, “Au hambu doidosok no'un seli nai mamanak ia. Tehuu Manetualain fee au baba'e-babatik so, ma au hambu anak nai ia.” Boe ma ana foi kakanak ndia, nade Efraim.c
53 Basa boe ma fai nakabetek teuk kahituk kala sila late'e. 54 Boe ma fai ndoes teuk kahituk kala sila mulai mai, nandaa no hata fo Yusuf nafada memak so. Nai mamana fe'ek, hataholi ndoe so. Tehuu nai basa mamanak manai Masir, hambu nana'ak. 55 Doo-doo boe ma hataholi Masir asa mulai ndoe. De leu loke nana'ak nai manek. Boe ma manek nadenu sala leni Yusuf leu, fo tungga Yusuf palendan.