Yusuf nafada hataholi bui dua me'in ndandaan
40
1-3 Nai bui ndia, hambu hataholi dua dadik litak malangga mana makanenik nai mane Masir uma manen. Esak, nakaneni manek nininun. Esa bali, nakaneni manek lotin. Dua sala tao lasala manek. Huu ndia de manek luli, losa nandee sala leni bui dale leu. De dua sala leo mamanak esa lo Yusuf. 4 Boe ma malangga bui ndia palenda Yusuf fo nakaneni pegawe kaduak kala sila. Ala leo lai ndia losa teuk esa do dua.5 Le'odaek esa, pegawe kaduak kala sila lalame'i. Esa-esak no ndia me'in. Ma me'is sala sila ndandaan nala kofe'ek. 6 Fo'a mai, Yusuf mai, nita dua sala matan nala mana dale hedik. 7 Boe ma natane sala nae, “Hatina de leledon ia, ei dua nggei matam mala bemale leo ndiak?”
8 Ala lataa lae, “Le'odaek ai malame'i, tehuu ai ta bubuluk ndandaan.”
Yusuf kokolak nae, “Ta hambu hataholi esa boe bubuluk me'is sala ndandaan, kada Manetualain mesak kana. Hena ei tui dei. Dei fo au sangga ndandaan nala neme Manetualain mai.”
9 Basa boe ma hataholi mana makaneni manek nininun, tui nae, “Leo iak. Nai au me'ing, au ita ai anggol esa, 10 ba'ek telu. Ai ndia nadoo, nabuna, ma naboa mangginggik losa latuk tutik. 11 Boe ma au ita, au to'u manek nggalaa nininun. Boe ma au ha'i ala anggol boan, fo he'en neni manek nggalaan neu. Basa boe ma au loo fee manek fo ninu.”
12 Yusuf namanene leo ndiak, boe ma nafada nae, “Ama. Me'is ndia ndandaan leo iak: ba'e kateluk ndia, ndandaan faik telu. 13 Nai faik telu dalen, dei fo manek kalua heni ama neme bui mai. Boe ma ana so'u falik ama, fo makaneni seluk ndia nininun sama leo makahulun. 14 Mete ma ama ua-nalen malole leo ndiak so, na, boso mafalende heni au, baa! Mete ma ama sue au, na, tulun mafada manek, fo ana kalua heni au neme ia mai boe. 15 Huu tungga teteben, ala ha'i lakasetik au uma hataholi Ibrani la nggolon mai. Nai ia, au ta tao manggalauk hata-hata. Tehuu ta bubuluk te ala landee au uni bui ia mai, sama leo au ia hataholi manggalauk.”
16 Hataholi mana makaneni loti namanene nala me'is ndandaan neulauk leo ndiak, boe ma ana tui Yusuf nae, “Fadi. Au boe oo alame'i leo iak: au suu lembeneu telu lakatotodok. 17 Nai lembeneu manai lain, isin manek kokin mata-matak. Tehuu mbuik kala mai, de la'a heni basa kokis sila leme au langgang lain.”
18 Yusuf namanene leo ndiak, boe ma nataa nae, “Ama me'in ndandaan leo iak: lembeneu kateluk sila, ndandaan faik telu boe. 19 Nai faik telu dalen, dei fo manek nadenu hataholi mai tete heni ama langgan. Boe ma ala lolo'e ama aon neu dii. De mbuik kala mai la'a heni basa ama mbombolan.”
20 Seli faik telu, nandaa no manek fai bobonggin, boe ma ana tao feta ina-huuk fee basa pegawen nala. Ana palenda fo ala leu kalua heni pegawe kaduak kala sila, leme bui dale mai. 21 Basa boe ma ana so'u falik pegawe mana makaneni manek nininun, neu ndia pangga makahulun, fo ana nakaneni manek nininun.
22 Tehuu pegawe mana makaneni manek lotin ndia, ala londa lisan, sama leo Yusuf kokolan so.
23 Tehuu pegawe mana makaneni nininuk ndia, ta nasaneda Yusuf bali. Ana nafalende heni Yusuf so.