Yusuf no malangga Potifar saon
39
1-2 Fai maneuk, hataholi Ismael asa loo Yusuf neni Masir neu. Nai ndia hambu hataholi ina-huuk esa, nade Potifar. Ndia ndia, malanggan neme basa soldadu mana maneak nai mane Masir uma manen. Basa boe ma Potifar hasa nala Yusuf neme hataholi mana danggan nala mai, fo dadik ata nai ndia uman. Nai ndia, MANETUALAIN tulun Yusuf, losa basa ndia uen dadik no malole. 3 Ndia malanggan nita Yusuf uen neulauk, boe ma ana bubuluk tebe-tebe MANETUALAIN tulun Yusuf. 4 Huu ndia de ndia malanggan hii Yusuf, ma namahelen. Boe ma ana so'u Yusuf dadik mandor nai uman. Ndia boe oo, fee Yusuf nakaneni ndia uman no basa pusakan nala. 5 Mulai neme Yusuf dadi mandor nai ndia, Manetualain boe oo fee baba'e-babatik neu ndia malanggan, hataholi Masir ndia. Basa ndia uma isin, pusakan, osin, ma uen nala, dadi no malole. 6 Neu faik fo Potifar nita Yusuf nakaneni basa ues no malole, huu ndia de ana ta dudu'a hata-hata bali, nalelak kada na'a.Faik ndia, Yusuf mata-aon lolen seli. 7 Ana leo nai ele bei ta dook, tehuu Potifar saon dalen tuda neun so. Boe ma ana kokoe fo Yusuf sunggu no ndia.
8 Tehuu Yusuf ta nau. De nataa nae, “Boso leo ndiak, Ina! Huu au malanggang Potifar fee au koasa fo au akaneni basa ndia uen so. 9 Nai uma ia, ta hambu hataholi fe'ek fo to'u koasa lena heni au. Huu malanggan fee au akaneni basa-basan so. Kada ina, na, au ta aena haak fo akaneni. Talo bee fo au bisa tao manggalauk leo ndiak! Ndia laban Manetualain hihiin boe!”
10 Mae leo ndiak, tehuu tungga-tungga faik, malanggan saon nambue kokoe nakandoo. Tehuu Yusuf ta mbali sana.
11 Boe ma la'i esa, Yusuf maso neni uma dale neu, fo sangga susuli ndia uen. Faik ndia, ta hambu hataholi fe'ek nai uma dale. 12 Boe ma ndia malanggan saon mai, de ana to'u nala Yusuf badun, boe ma hela nalan, de nae, “Mai leo! Hatematak ia ela kada ita dua nggata. Mai leo, fo ita dua-nggata teu sunggu.”
Tehuu Yusuf ta nau. Boe ma ana nafoki, losa posi heni badun. Boe ma nalai deak neu. Tehuu inak ndia, bei to'u nahele badu ndia.
13 Ledo-eik Potifar saon nita Yusuf nalai deak neu, la'o ela badun so, 14-15 boe ma ana nanggou hataholi mana tao ues sala, de nafada nae, “Wei! Ei mai dei! Isinaak, tou Ibrani ndia, maso au kamang. Ana sangga tao manggalauk neu au, tehuu au eki tingga-tingga. Ia, ana la'o ela badun, de nalai deak neu. Au saong, neni hataholi hada taak ia, fo kada tao nakamamaek ita!”
16 Boe ma Potifar saon to'u badu ndia, losa saon fali. 17 Nandaa no saon fali, boe ma ana tui nae, “Ka'a! Hataholi Ibrani fo Ka'a nenin ia mai ndia, isinaak ana maso au kamang, fo sangga perkosa au! 18 Tehuu au eki tingga-tingga fo oke hataholi la. Boe ma ana nalai la'o ela badun ia.”
19 Potifar namanene saon tutuin leo ndiak, boe ma ana luli nalan seli. 20 De nadenu hataholi la leu humu lala Yusuf. Boe ma ala landeen neni manek buin dale neu.
21 Tehuu MANETUALAIN ta nafalende heni Yusuf. Huu ndia de MANETUALAIN tulun nakandoo ndia, losa malangga bui ndia hii Yusuf nalan seli. 22 Boe ma ana namahele Yusuf. Huu ndia de ana fee Yusuf nakaneni basa hataholi bui la, ma basa ues malai ndia. 23 De malanggan ta mbali nakaneni hata-hata so bali, nai bui ndia. MANETUALAIN tulun Yusuf, huu ndia de basa ues nai bui ndia, dadi malole.